EKSODUS 22

Atoran tahiu gantin karugi

1“Eweh je manakau ije kongan sapi atawa tabiri palus manyambalihe atawa manjuale, musti mangganti genep kongan sapi dengan lime kongan sapi; genep kongan tabiri dengan epat kongan tabiri. 2-4Ie musti mangganti taloh je inakaue. Amon ie jaton mingkes taloh en-en, ie kabuat kareh injual kilau jipen akan gantin taloh je jari inakaue. Amon je inakau te sapi, kalidai atawa tabiri, palus tarasondau meto te magon belom dengan oloh te, ie musti mangganti genep kongan meto hapan due kongan meto.

Amon metoh hamalem ije biti oloh tarasondau manakau hong ije huma, palus ie buah patei, oloh je mampateie te dia sala. Tapi amon taloh te manjadi handau, oloh je mampateie te sala.

5Eweh je manalua metoe kuman oru intu tanae atawa kabon anggore, balalu meto te mahiwang tuntang kuman pambulan oloh beken,#22:5: Eweh … beken atawa Amon ije biti oloh manusol ije tana atawa kabon anggor, tuntang manlua apui te mangehu hapus tana … maka tempon meto te musti mambayar gantin karugi dengan asil je pangkahalape bara tana atawa kabon anggor ayue kabuat.

6Eweh je mantokan apui intu tanae kabuat palus apui te manjakit akan tanan oloh beken tuntang mangehu sampai lepah gandom je harun inggetem, maka oloh je mantokan apui te musti mambayar gantin karugi.

7Paribasae aton oloh je hakon mingkes duit atawa ramo barega ain oloh beken. Tapi rahian andau taloh je insahan te buah takau bara humae. Amon oloh je manakaue dinon, ie musti mambayar due lipet. 8Tapi amon oloh je manakaue te dia dinon, oloh je mingkese te musti iimbit akan eka sombayang; intu hete ie musti sumpah mansanan je ie dia manakau ramo je insahan intu ie.

9Intu genep auh kalahi tahiu panatau, en te tahiu sapi, kalidai, tabiri, pakaian atawa en bewei je nihau palus sondau tinai, kare oloh je mangaku kilau tempoe musti iimbit akan eka sombayang. Oloh je insanan awi Hatalla kilau oloh je basala, musti mambayar due lipet akan je puna tempoe.

10Paribasae ije biti oloh mambelom kalidai, sapi, tabiri atawa meto beken ayun oloh. Rahian limbah te meto te matei, bahimang atawa irampas musoh, padahal jaton saksie. 11Ie musti iimbit akan eka sombayang tuntang sumpah huang aran Tuhan, je ie dia manakau meto je jari imercaya dangae. Amon ie puna dia manakaue, tempoe musti mananggong karugi te; oloh je mambelome dia usah mambayar gantin karugi. 12Amon meto te inakau awi oloh beken, maka oloh je mambelome musti mambayar gantin karugi akan tempoe. 13Amon meto te imisak meto basiak, oloh je mambelome musti mamparahan tisan tulange kilau tanda akan tempoe; ie dia usah mambayar gantin karugi akan meto te.

14Amon ije biti oloh minjam ije kongan meto palus meto te bahimang atawa matei metoh tempoe jaton intu eka taloh te manjadi, je minjame musti mambayar gantin karugi. 15Tapi amon taloh te manjadi katika tempoe aton intu hete, oloh je minjame dia usah mambayar gantin karugi. Amon meto te meto je inyewa, maka karugi te inutup awi ongkos sewa te.”

Atoran tahiu hadat tuntang sombayang

16 # Deu. 22:28-29 “Eweh je mangantau ije biti oloh bawi bujang je hindai batonangan mangat batiroh dengae, musti mambayar duit palaku tuntang kawin dengae. 17Tapi amon bapae dia manyoho hatue te kawin dengan anake, hatue te musti mambayar akan bapae te duit je kare sama kahain duit palaku akan ije biti oloh bawi bujang.

18 # Deu. 18:10-11 Genep oloh je jadi tukang seher bawi je mawi sihir musti impatei. 19#Lew. 18:23, 20:15-16; Deu. 27:21 Oloh je marantep meto musti impatei.

20 # Deu. 17:2-7 Eweh je maluput parapah akan kare dewa beken kacuali akang-Ku, Tuhan, musti ihukum matei.

21 # Eks. 23:9; Lew. 19:33-34; Deu. 24:17-18, 27:19 Ela mawi katulas atawa mawi taloh je dia bujur dengan oloh bangsa beken. Ingat je bihin keton kea oloh bangsa beken intu Misir. 22Ela mangapehe kare balo tuntang nole. 23Amon keton mangapehe ewen, Aku, Tuhan, kareh mahining auh ewen amon ewen mangkariak balaku awat dengang-Ku. 24Aku kareh balait tuntang mampatei keton intu parang, sampai kare sawan keton jadi balo tuntang kare anak keton jadi nole.

25 # Lew. 25:35-38; Deu. 15:7-11, 23:19-20 Amon keton mahanjaman duit akan ije biti oloh je belom susah bara marak bangsa ayung-Ku, ela mawi ie kilau tukang minjam duit palus balaku anak duit dengae. 26#Deu. 24:10-13 Amon keton manduan baju jeket oloh beken kilau sanda akan utange, jas te musti iliam helo bara matanandau belep. 27Awi pakaian te je kilau leket intu bitie; jaton beken hapae mangalasot bitie. Amon dia ilian akae, en tinai je hapae akan kahowute metoh ie batiroh? Amon ie mangkariak balaku awat dengang-Ku, maka Aku akan mahining auh te awi Aku puna pamasi.

28 # Gaw. Ras. 23:5 Ela manawah Hatalla tuntang ela manyapa kare pamimpin huang bangsa ayum.

29Hong katika je inukas, luput parapah akang-Ku bara hasil gandom, danum anggor ayum tuntang undus saitun ayum.

Sarah akang-Ku kare anak bakas hatue. 30Kea sapi tuntang tabiri hatue je solake inakan. Nalua kare meto te melai dengan indue uju andau, palus sarah akangku hong andau je kahanya.

31 # Lew. 17:15 Keton toh ungkup ayung-Ku, tagal te meto en bewei je matei imisak meto basiak, dia tau keton kuman isie; tenga jete akan kare aso.”

Currently Selected:

EKSODUS 22: NIJ

Highlight

Copy

Compare