EKSODUS 21

Cara marentah jipen

(Deu. 15:12-18)

1Palus Tuhan hamauh dengan Moses, “Tenga akan oloh Israel kare atoran toh: 2#Lew. 25:39-46 Amon ikau mamili ije jipen bangsa ayum kabuat, ie musti bagawi akam katahin jahawen nyelo. Hong nyelo kauju ie musti imbebas tuntang dia usah mambayar en-en. 3Amon ie kanjerae bujang metoh ie jadi jipem, maka sawae dia tau omba metoh ie balua, tapi amon ie jari kawin metoh ie jadi jipem, sawae tau omba dengae. 4Amon tempoe mangawin ie dengan ije biti oloh bawi, palus ie mandino anak, maka sawae tuntang anake te ayun tempoe; ewen dia tau omba jipen je imbebas te. 5Tapi amon jipen te mansanan je ie sinta sawae, kare anake, tuntang tempoe, hayak ie dia maku imbebas, 6maka tempoe balalu mimbit ie akan eka sombayang. Intu hete jipen te inyoho mendeng basingguh intu bauntonggang atawa jihin bauntonggang eka sombayang; maka tempoe balalu mamesek pinding jipen te. Ie jadi jipee sampai hapus umure.

7Amon ije bawin oloh Ibrani injual kilau jipen awi bapae, oloh bawi te dia imbebas limbah jahawen nyelo; beken bara jipen hatue. 8Amon ie dia manyanang tempoe je handak kawin dengae, maka ie injual haluli akan oloh bakase. Oloh bawi te dia tau injual akan oloh bangsa beken, awi ie jari iawi dia adil awi tempoe je dia malalus janjie. 9Amon ije biti oloh mamili ije biti jipen bawi akan sawan anake, jipen bawi te musti iawie kilau anake kabuat. 10Amon anak hatue te kawin tinai, ie tetep mananggong kasukop panginan, pakaian tuntang salepah hak kilau je bahut akan sawae je solake. 11Amon ie dia malalus kapatut te, ie musti malapas sawae te; banae dia usah manarima duit tewus.”

Atoran tahiu kasalan oloh kalahi

12 # Lew. 24:17 “Eweh je mamukul oloh beken sampai matei, ie musti ihukum matei. 13#Num. 35:10-34; Deu. 19:1-13; Yos. 20:1-9 Tapi amon ie mamukul dia tantai ihate tuntang jaton maksude mampatei, ie tau mandari arepe akan ije eka je kareh inunjok-Ku akam; intu hete ie ingalindong. 14Tapi amon ije biti oloh balait hayak tantai ihate mampatei oloh beken, limbah te hadari akan mesbeh-Ku uka ingalindong, oloh te musti induan bara mesbeh tuntang ihukum matei.

15Eweh je mamukul bapae atawa indue, musti ihukum matei.

16 # Deu. 24:7 Eweh je manamput oloh luar bara pangatawan tundah kolae musti ihukum matei, en oloh te jari injuale atawa magon aton intu humae.

17 # Lew. 20:9; Mat. 15:4; Mrk. 7:10 Eweh je manyapa bapae atawa indue musti ihukum matei.

18Amon metoh hakalahi ije biti oloh mamukul oloh beken hapan batu atawa hapan tampare, tapi dia mampateie, ie dia ihukum. Amon oloh je imukul te sampai menter haban tagal pukul te, 19tapi rahian tau hingkat tuntang mananjong haluli dengan sukah, oloh je mamukule te musti manatambae sampai keleh tuntang mambayar gantin karugi katahin ie haban.

20Eweh je mamukul jipee je hatue atawa bawi sampai jipee te matei, musti ihukum. 21Tapi amon jipen te dia matei hong ije andau atawa kadue tempoe te dia ihukum. Karugie je dinoe tagal pampatei jipee te jari kilau hukum akae.

22Amon pire-pire oloh hatue metoh hakalahi palus ije bara ewen mawi kapehe akan ije biti oloh bawi batihi sampai ie mangelus, tapi dia kapehe hong eka beken, maka oloh te musti mambayar danda kahain je ilaku banae tuntang imakat awi kare hakim. 23Tapi amon oloh bawi te buah kapehe je labih babehat, hukuman akan kapapa te iete tahaseng imbaleh tahaseng, 24#Lew. 24:19-20; Deu. 19:21; Mat. 5:38 mata imaleh mata, kasinga imaleh kasinga, lenge imaleh lenge, pai imaleh pai, 25himang imaleh himang, lupak imaleh lupak, kembang imaleh kembang.

26Eweh je mamukul matan jipee sampai babute, musti ie malapas jipen te kilau tewus akan matae. 27Amon ije biti oloh mamukul jipee sampai bapelek kasingae, jipen te musti imbebase kilau tewus akan kasingae te.”

Taloh je musti ilalus awi tempon jipen

28“Amon ije kongan sapi hatue manandok ije biti oloh sampai matei, sapi te musti impatei mahapan cara imanting hapan batu; isin metoe dia tau kinan, tapi tempoe dia ihukum. 29Amon sapi hatue te patoh manandok, tuntang tempoe jari impingat, tapi dia manjaga meto te, palus amon sapi hatue te manandok ije biti oloh sampai matei, maka tempon meto te musti impatei mahapan cara imanting hapan batu tuntang meto te kea musti ihukum matei. 30Tapi amon tempon sapi te tau inyoho mambayar tewus, ie musti mambayar kahain je ilaku hapa manewus tahasenge 31Amon je mampatei te ije biti anak hatue atawa bawi, buah atoran te kea. 32Amon je matei te ije biti jipen hatue atawa bawi, tempon sapi te musti mambayar telo puluh duit perak akan tempon jipen te; sapi hatue te musti imanting hapan batu sampai matei.

33Eweh je manduan tutup bara ije kalin danum, atawa mangali kalin danum palus dia manutupe, balalu ije kongan sapi hatue atawa kalidai manjato akan huange, 34tempon kalin danum te musti mambayar gantin karugi akan tempon meto te; tapi ie dia tau manduan meto je matei te akae. 35Amon sapi hatue ayun ije biti oloh mampatei sapi hatue ayun oloh beken, due-due tempoe musti manjual meto je magon belom te tuntang mambagi duite. Ewen kea musti mambagi isin meto je matei te. 36Tapi amon jari ingatawan je sapi hatue te patoh manandok, tuntang tempoe dia manjagae, ie musti manggantie hapan sapi hatue je belom; ie tau manduan meto je matei te akae.”

Currently Selected:

EKSODUS 21: NIJ

Highlight

Copy

Compare