DANIEL 3

Nebukadnesar mampalua parentah uka rayat manyembah hampatong amas

1Hong sinde katika Raja Nebukadnesar manampa ije hampatong amas je kagantonge 27 meter tuntang kalombahe bilak 3 meter. Ie mampendenge intu janah Dura hong propinsi Babel. 2Limbah te raja marawei uras raja wilayah, kare gubernur, bupati, panasehat negara, bendahara, hakim, ahli hukum, tuntang uras pamimpin intu daerah uka manalih upacara maresmi hampatong je jari impendeng te. 3Limbah ewen uras dumah tuntang mendeng intu taharep hampatong te, 4ajudan raja palus mantehau hai auhe, “Kare pahari bara kare bangsa, suku tuntang basa. Hining parentah raja toh: 5Amon tarompet mahiau, inuntut auh suling, kacapi, rabab, gambus, sardam, tuntang kare pakakas musik je beken, kare pahari musti sontop manyembah hampatong amas je jari impendeng awi raja Nebukadnesar. 6Eweh je dia manumon parentah toh, balalu injakah akan apui pehon je nyalae ganda-gandang.” 7Sana mahining kare pakakas musik te impahiau, kare oloh bara hapus bangsa, suku tuntang basa, sontop tuntang manyembah hampatong amas te.

Telo sobat Daniel indawa malanggar parentah raja

8Pire-pire biti oloh Babel mangguna gawie uka mawi calaka akan oloh Yehudi. 9Ewen hamauh dengan Raja Nebukadnesar, “Belom raja katatahie! 10Raja kabuat jari mampalua parentah iete sana kare pakakas musik impahiau, uras oloh sontop tuntang manyembah hampatong amas te, 11tuntang eweh je dia manumon parentah te akan injakah akan apui pehon je nyalae ganda-gandang. 12Tapi pire-pire oloh Yehudi je jari inyarah awi Tuangku uka marentah propinsi Babel dia paduli parentah Tuangku te. Ewen te Sadrakh, Mesakh tuntang Abednego. Kare oloh te dia maku manara kare hatallan Tuangku tuntang dia manyembah hampatong amas je impendeng Tuangku.”

13Mahining auh te raja sangit toto palus manyoho uka katelo-telo biti oloh te iimbit manaharep ie. 14Raja misek ewen, “Sadrakh, Mesakh tuntang Abednego! En toto keton dia maku manyembah kare hatallangku tuntang dia kea maku sontop akan hampatong amas je jari impendeng te? 15En toh keton handak sontop manyembah hampatong te metoh musik mahiau? Amon keton dia maku, keton balalu injakah akan huang apui pehon je ganda-gandang. Tuntang dewa kueh je tau manyalamat keton bara kuasangku?”

16Sadrakh, Mesakh tuntang Abednego tombah, “Ikei dia handak mampabujur arep ikei. 17Amon Hatalla je inyembah ikei tau manyalamat ikei bara nyalan apui pehon je ganda-gandang te tuntang bara kuasan Tuangku, batantu Ie malaluse. #3:17: Amon Hatalla … malaluse, atawa: Amon puna toto itah toh manolak manyembah kare dewa ain tuanku atawa diamaku sontop akan hampatong amas je impendeng tuanku, Hatalla je inyembah ikei olih manyalamat ikei bara eka apui je hanyala ganda-gandang te tuntang bara kuasan tuangku – tuntang ie pasti malaluse. 18Tapi jaka Ie dia malaluse kea, keleh Tuangku katawan ikei dia handak manara dewan Tuangku tuntang dia kea manyembah hampatong amas je impendeng Tuangku te.”

Sadrakh, Mesakh tuntang Abednego ihukum matei

19Palus kasangit Raja Nebukadnesar mangambuar dengan Sadrakh, Mesakh tuntang Abednego, sampai baue masak-maranga. Ie marentah mangat apui pehon te iawi uju tingkat labih balasot bara je bahut. 20Palus ie manyoho pire-pire biti je paham abas bara tantarae akan manjarat Sadrakh, Mesakh tuntang Abednego, hayak manjakah ewen akan apui pehon je nyalae ganda-gandang te. 21Balalu katatelo biti oloh te imeteng dehen dengan kare pakayae iete kameja, jubah, tanggoi tuntang pakaian je beken, palus intarik akan apui pehon je nyalae ganda-gandang te. 22Awi parentah raja te paham karas, apui pehon te jari imandok gawi toto sampai nyalan apui mawi kare oloh je manggatang Sadrakh, Mesakh tuntang Abednego manokep eka apui te matei bakehu. 23Tumon te katetelo biti je imeteng dehen te manjato akan huang apui pehon je hanjala te.

24Salenga Raja Nebukadnesar tarewen toto. Ie bajeleng mendeng tuntang mantehau kare pagawaie, “En dia itah endau mameteng telo biti tuntang mantarik ewen akan huang apui te?”

Ewen tombah, “Puna toto, Tuangku.”

25Tombah raja, “Tapi mbuhen gitangku epat biti tanjo-tanjong intu bentok apui te? Ewen dia imeteng tuntang dia samasinde buah taloh en-en. Tuntang je kaepat te ampie kilau dewa.”

Katatelo oloh te iliwus tuntang impandai pangkate

26Palus Nebukadnesar manokep bauntonggang eka apui te tuntang mantehau, “Sadrakh, Mesakh tuntang Abednego, kare rewar ain Hatalla Pangkahai! Keleh balua bara apui te!” Palus ewen balua. 27Uras wakil raja, kare gubernur, bupati tuntang kare pagawai je beken mangaliling katatelo oloh te. Ewen mite ewen telo te samasinde dia buah apui. Balau ewen dia bakehu tuntang pakaian ewen dia kea, ewau asep mahin jaton intu ewen.

28Palus raja hamauh, “Tara Hatalla je inyembah Sadrakh, Mesakh tuntang Abednego. Ie jari manyoho malekat Ayue akan manyalamat katatelo reware je percaya dengae. Ewen jari malanggar parentahku tuntang labih nahuang matei bara manyembah atawa manara dewa kueh bewei, baya Hatallan ewen kabuat.

29Awi te aku marentah je genep biti bara bangsa, suku atawa bara kueh bewei, je hakotak manawah Hatalla je inyembah Sadrakh, Mesakh tuntang Abednego, akan inasang-raga tuntang humae inderep jadi toyok paramon huma je rusak. Awi jaton aton dewa je tau malalus taloh je jari ilalus Hatalla te.”

30Limbah te raja mampandai pangkat Sadrakh, Mesakh tuntang Abednego, sampai ewen jadi kare pagawai gantong hong Babel.

Currently Selected:

DANIEL 3: NIJ

Highlight

Copy

Compare