DANIEL 2
2
Nupin Nebukadnesar
1Hong ije alem, due nyelo limbah Nebukadnesar manampara marentah, ie nupi. Nupie te paham mawi ateie balisah, sampai ie dia tau batiroh tinai. 2Awi te intehaue kare ahli manujum, oloh pangaji, kare tabit, oloh je are pangatawae, akan manarang nupie. 3Metoh ewen mendeng intu taharepe, raja hamauh, “Aku nupi tuntang ateiku balisah awi aku nahuang katawan rimae!”
4Ewen tombah huang basa Aram, “Belom Tuangku katatahie! Keleh manyarita nupi te akan ikei, palus ikei akan manarang rimae.” #2:4: Bara ayat jetoh sampai lawin ayat 7 basa je ihapan iete basa Aram dia ie basa Ibrani.
5Raja tombah, “Aku jari manukas toh: Keton mansanan nupi te akangku, kalote kea rimae. Amon keton dia olih, keton akan iraga tuntang human keton akan inderep. 6Tapi amon keton olih, keton akan inengaku panenga je bahala-halap tuntang hormat je hai. Keleh mansuman metoh toh nupingku dengan rimae.”
7Ewen tombah tinai, “Keleh Tuangku mansanan helo nupi te akan ikei, limbah te ikei akan manarang rimae.”
8Mahining te raja tombah, “Bujur koangku, keton baya malumbar katika bewei, awi keton katawan je aku nahuang, 9uka mahukum keton dengan cara je sama amon keton dia olih mansanan nupi te akangku. Keton pakat harajur mananjaro tuntang mureh aku awi maharap aku akan mobah kaputusangku. Keleh suman nupi te, palus aku katawan keton tau kea manarang rimae.”
10Kare ahli te tombah, “Intu hapus kalunen jaton oloh je olih mansanan narai je ingahandak awi tuangku te. Tuntang tinai dia puji ije biti raja, aloh kilen ampin kahaie, balako kare taloh je kilau te bara kare oloh ahli manujum, oloh pangaji tuntang oloh je are pangatawae hong istanae. 11Tuangku balaku kare taloh je lalau bahali. Jaton ije biti oloh olih malalus kahandak te suali kare dewa, tapi ewen dia melai marak olon.”
12Mahining auh te raja sangit toto tuntang marentah uka mampatei uras oloh pintar je aton hong Babel. 13Balalu parentah te insanan, tuntang uras oloh pintar, tatame Daniel tuntang kare sobate inggau uka impatei.
Hatalla mansanan nupi te tuntang rimae akan Daniel
14Palus Daniel manyondau Ariokh, pamimpin pangawal raja, je jari tatap malalus hukuman matei te. 15Balalu Daniel misek ie bua-buah, mbuhen raja jari mampalua parentah je karas te. Ariokh mansuman akan Daniel taloh je jari manjadi.
16Bajeleng Daniel manaharep raja tuntang balaku inenga katika akan manarang riman nupi te. 17Palakue te inarima, palus Daniel buli akan huma tuntang mansanan uras taloh te akan Hananya, Misael tuntang Asarya. 18Inyohoe ewen balakudoa manintu Hatalla hong sorga mangat Ie masi ewen tuntang mansanan riman nupi te. Tumon te ewen dia ihukum matei hayak kare oloh pintar je beken. 19Alem te kea Hatalla mansanan rimae akan Daniel huang ije paite. Palus Daniel manara Hatalla hong sorga, 20koae,
“Hatalla je pintar tuntang abas,
tara Ie katatahie!
21Ie je pintar manukas wayah tuntang katika,
Ie mampalongkang tuntang mangkat oloh kuasa.
Ie je manenga kapintar kaharati,
hayak manenga atei je tau maharati taloh.
22Ie je mansanan rahasia je paham handalem.
Ie katawan uras je manjadi huang kakaput.
Ie inyangkulep awi sangkowong kalawa.
23O Hatalla, eka tara ain tato hiangku. Ikau inara tuntang impahai awiku.
Awi Ikau manenga pangatawan tahiu kapintar tuntang kaharati tuntang kaabas.
Palakun ikei jari ilalus Awim.
Tuntang jawab akan raja jari insanan Awim.”
Nupi te insanan tuntang inarang Daniel
24Limbah te Daniel manalih Ariokh je jari irentah mampatei kare oloh pintar intu Babel. Koan Daniel dengae, Ela mampatei kare oloh pintar te. Keleh mimbit aku manaharep raja, awi aku nahuang mansanan akae riman nupi te.”
25Bajeleng Ariokh mimbit Daniel manaharep raja Nebukadnesar palus hamauh, “Aku jari sondau marak kare oloh tawanan bangsa Yehudi ije biti oloh je tau mansanan riman nupin Raja.
26Palus raja hamauh dengan Daniel je kea inggare Beltsasar, “En tau ikau mansanan akangku nupingku tuntang kea rimae?”
27Daniel tombah, “Tuangku, jaton oloh je are pangatawae, oloh pangaji, ahli manujum tuntang ahli bintang je olih mansanan taloh te akan Tuangku. 28Tapi hong sorga aton Hatalla je tau mangarinah taloh basilim tuntang Ie jari mansanan akan Tuangku narai je akan manjadi. Toh nenga katika akan rewarm manarang nupi tuntang paite je inarima Tuangku metoh nupi te.
29Metoh Tuangku batiroh, Tuangku nupi tahiu jaman je naharep. Hatalla je mansanan kare taloh basilim tuntang mamprahae akan Tuangku narai taloh je akan manjadi. 30Rahasia toh jari insanan akan rewarm dia awi rewarm labih pintar bara eweh bewei, malengkan mangat Tuangku tau mangatawan riman nupin Tuangku te tuntang maharati kea tahiu narai je aton ingkeme huang atei Tuangku.
31Jetoh paite je gitan Tuangku: Intu taharep Tuangku aton ije hampatong! Hampatong te paham hai tuntang mangilat tapi ampie bakaike-ikeh. 32Takoloke inampa bara amas murni. Usoke tuntang penange bara perak. Kahange tuntang kanaie bara tambaga. 33Sapake bara sanaman tuntang paie belahe bara sanaman tuntang belahe tinai bara petak liat. 34Katika Tuangku mananturee, ije batu hai bakepak bara tiwing, dia aton taloh je manigonge, palus manjato buah hampatong te hong paie je bara sanaman tuntang petak liat te, sampai rotek. 35Hemben te kea sahapus bitin hampatong te baduroh tuntang jadi toyok sanaman, petak liat, tambaga, perak tuntang amas je jari rotek ramok kilau kawo hong eka mihik gandom intu wayah pandang. Toyok taloh te tantawus awi riwut, sampai jaton batisa awae tinai. Tapi batu je manderep hampatong te jadi kahain bukit tuntang mangontep hapus kalunen.
36Jete nupin, Tuangku, toh aku handak manarang rimae. 37Tuangku te rajan kare raja; Tuangku je paling hai kuasae. Hatalla hong sorga jari manenga akan Tuangku karajaan toh, kuasa, kaabas tuntang kahai. 38Tuangku injadian Awie jadi oloh kuasa intu hila kalunen je aton oloh melaie tuntang taharep uras burong dengan meto je beken. Tuangku kabuat iete takolok amas intu hampatong te. 39Tapi, limbah karajaan Tuangku hapus, akan lembut karajaan beken je dia tumon kahain karajaan Tuangku. Limbah te lembut karajaan katelo je inampengan awie kilau tambaga hong hila hampatong te, je akan manguasa hapus kalunen. 40Limbah te akan lembut karajaan kaepat, tumon katekang sanaman. Tuntang kilau sanaman je mamparotek tuntang mamparamok en bewei, kalote kea karajaan je kaepat toh akan mamparamok tuntang mamparotek kare karajaan je beken te. 41Pai tuntang kare tunjuk pain hampatong je belahe bara petak liat tuntang belahe bara sanaman te, mamparahan hong harian andau karajaan te akan tabagi-bagi. Karajaan te aton kea kaabase awi petak liat te aton iewoi sanaman. 42Kare tunjuk pai je belahe bara sanaman tuntang belahe bara petak liat rimae aton karajaan je abas tuntang aton kea karajaan je balemo. 43Sanaman hewoi dengan petak liat te mananda kea karajaan te akan nahuang mampaabas arepe dengan malalus kawin campur, tapi gawi te ngahus, kilau sanaman kea dia tau hinje jadi ije dengan petak liat. 44Hong katika kare raja te marentah, Hatalla hong sorga akan mampendeng karajaan je dehen sampai katatahie tuntang je dia tau impakalah awi bangsa je kueh bewei. Karajaan te akan mamparotek uras karajaan je beken te. 45Diakah Tuangku jari mite tahiu je jaton manigonge, ije batu bakepak bara tiwing palus mantakan tuntang mamparotek hampatong sanaman, tambaga petak liat, perak tuntang amas te? Hatalla je hai mamparahan akan Tuangku narai je harian andau manjadi. Nupi te tau imercaya tuntang katarangan rewarm buah.”
Daniel manarima upah bara raja
46Palus raja Nebukadnesar sontop intu taharep Daniel tuntang manenga parentah uka Daniel ihormat tuntang akae iluput parapah je ingehu tuntang kare parapah je beken. 47Raja hamauh, “Toto, Daniel, Hatallam je paling hai marak kare Hatalla. Ie je kuasa mahunjun kare raja, tuntang mangarinah kare taloh basilim. Aku katawan taloh te awi ikau jari olih manarang riman taloh basilim toh.” 48Limbah te Daniel inenga pangkat je gantong, inenga are panenga je bahala-halap, tuntang iangkat jadi gubernur Babel, tuntang iawie jadi kapalan je pangagantonge mahunjun uras panasehat istana. 49Tapi awi palakun Daniel, raja manyarah propinsi Babel te uka irentah awi Sadrakh, Mesakh tuntang Abednego, tuntang Daniel kabuat melai hong istana ain raja.
Currently Selected:
DANIEL 2: NIJ
Highlight
Copy
Compare
Share
Want to have your highlights saved across all your devices? Sign up or sign in
