AMOS 3
3
1Hining auh peteh Tuhan toh, o bangsa Israel je jari iimbit balua bara Misir awi Tuhan! Tuhan hamauh, 2“Bara kakare bangsa hong kalunen, keton bewei bangsa je kasenang-Ku tuntang ihaga-Ku. Jete bukue dosan keton hai, tuntang aku batantu mahukum keton.”
Kapatut gawin nabi
3En tau due biti oloh halisang haya-hayak dia barunding labih helo?
4En singa intu parak kayu manyakungkong amon ie hindai dinon panginae?
En anak singa mahiau huang liange amon ie hindai dinon taloh en-en?
5En burong tau tajabak huang parangkep amon parangkep hindai inenan?
En parangkep tau lekas amon jaton taloh je tame parangkep?
6En oloh lewu dia hagenjeh amon mahining tarompet tanda parang?
En tau ije lewu buah calaka, amon Tuhan dia manyohoe?
7Pangkahai Tuhan dia puji malalus taloh en-en amon dia mansanan rancana Ayue akan kare nabi, kare rewar Ayue.
8Amon singa manyakungkong, eweh je dia mikeh?
Amon Tuhan Hatalla, hakotak, eweh tau suni tuntang dia mansanan auh peteh Aie?
Karusak Samaria
9Sanan toh akan kare oloh je melai intu istana Misir tuntang Asdod, “Keleh hapumpong intu kare bukit kaliling Samaria. Ite karidu hai hayak gawin kararat je ilalus intu hete.”
10 Tuhan hamauh, “Kare oloh te manyuang istana ewen mahapan kare ramo je dinon ewen bara gawin kararat tuntang kakaras. Ewen mahin dia katawan gawi je bujur. 11Awi te lewun ewen akan ingapong musoh. Dinding lewun ewen imparusak, tuntang istana ewen irampok.
12Sama kilau ije biti sakatik je mandino baya ije kapasang pai atawa ije katetek pinding tabiri je inangkarap awi singa, kalote kea baya isut biti bewei oloh je akan batisa bara oloh lewu Samaria je metoh toh manga-mangat menter intu eka batiroh je mangat.”
13 Tuhan, Hatalla Je Jaton Tikas Kuasae tuntang Pangkahai hamauh, “Keleh toh manantuani tuntang mampingat turonan Yakob. 14#2 Ra. 23:15 Hong andau Aku mahukum oloh Israel tagal dosae, Aku akan manganan kare mesbeh intu Betel. Genep mesbeh akan imelek kare tapakae sampai manjato akan petak. 15Kare huma akan wayah sadingen tuntang kare huma akan eka malayan kaheka wayah pandang akan imparusak-Ku. Kare huma je imakaian dengan gading akan baderep; kakare huma je hai akan hancor.
Currently Selected:
AMOS 3: NIJ
Highlight
Copy
Compare
Share
Want to have your highlights saved across all your devices? Sign up or sign in
