AMOS 2

Moab

1 # Yes. 15:1–16:14, 25:10-12; Yer. 48:1-47; Es. 25:8-11; Sep. 2:8-11 Tuhan hamauh, “Oloh lewu Moab jari kinjap mawi dosa, awi te batantu Aku akan mahukum ewen. Ewen manawah raja Edom je jari matei te, ganan ewen mungkar kubure hayak manduan kare tulange tuntang mamapuie manjadi kawo. 2Awi te Aku akan manyoho apui akan lewu Moab, tuntang manusul lepah lingis kare kota Keriot. Oloh Moab akan matei intu bentok auh karidun parang, metoh tarompet impahiau, tuntang lahap parang inangkariak. 3Oloh ije mimbing kuasa intu Moab tuntang kakare oloh ije marentah akan impatei awi-Ku.”

Yuda

4 Tuhan hamauh, “Oloh Yuda jari kinjap mawi dosa, awi te aku batantu akan mahukum ewen. Ewen malanggar kare parentah-Ku tuntang dia paduli kare auh ajar-Ku. Ewen impalayang awi kare hatalla beken ije inyembah awi tato hiang ewen. 5Awi te, Aku akan manyoho apui akan tanah Yuda tuntang manusul lepah lingis kare dinding kota Yerusalem.”

Hukuman akan Israel

6 Tuhan hamauh, “Oloh Israel jari kinjap mawi dosa, awi te batantu Aku akan mahukum ewen. Oloh bujur je dia olih manahor utange, jari injual ewen manjadi jipen. Kalote kea gawin ewen dengan oloh je belom susah je dia olih manahor utange, aloh utang te baya tumon regan ije kapasang sandal. 7Ewen mahenyek oloh korik je jaton eka kaharape, tuntang dia paduli oloh je belom susah. Bapa tuntang anak batiroh dengan ije jipen bawi je sama, sampai mamapa arang-Ku je barasih. 8Intu genep eka sombayang, kare oloh batiroh hunjun baju je induan ewen kilau sanda bara oloh je belom susah. Intu Human Hatallan ewen, ewen mihop anggor ije induan ewen bara kare oloh je butang dengan ewen.

9 # Deu. 3:8-11 Aloh kalote, o ungkup-Ku, akan keton aku mambinasa oloh Amori je gantong sama kilau batang lentang tuntang dehen kilau batang tabalien. 10Keton jari iimbit-Ku balua bara Misir, tuntang ingagalangku mahalau padang tunis benyem epat puluh nyelo katahie. Tanah oloh Amori jari inengaku akan keton jadi lewon keton kabuat. 11#Num. 6:1-8 Aku jari mintih pire-pire bara anak keton akan manjadi nabi, tuntang pire-pire oloh tabelan keton akan manjadi oloh Nasir.#2:11: Nasir: Oloh Israel je manempo Hatalla tuntang mamali arepe dia mihop anggor, atawa mihop taloh je bahari, ewen te dia manggunting balaue tuntang dia manigong hantu (ite Num. 6:1-8). En dia jete toto, o oloh Israel? Aku, Tuhan jari hakotak.

12Tapi keton manenga anggor akan indu ihop oloh Nasir, sampai ewen malanggar sumpah Nasir. Tuntang keton mangahana kare nabi manyampai auh petehku. 13Toh aku akan mahenyek keton sampai petak, sampai keton manarahing kilau auh kareta je sarat dengan gandom. 14Oloh je balias hadari mahin dia olih maliwus arepe; oloh abas akan nihau kaabase, tinai oloh menteng akan dia tau manyalamat arepe. 15Oloh je mamanah dia olih tahan, oloh je balias hadari dia akan tau hadari, tuntang oloh je manongkang kuda dia akan liwus. 16Hong andau te tantara je pangkahanyie mahin malekak pakakas parange, palus hadari. Aku, Tuhan jari hakotak.”

Currently Selected:

AMOS 2: NIJ

Highlight

Copy

Compare