LUKAS 6:27-49 “Tanaa mako Akuoi in mobogoi in koyow kon i monimu inta moibog mokidongog kon i-Nakó: kotabibí in saturumu, bo pogaidbí kon inta mopia kon intau inta moyaat in gina kon inimu. Barakataibí in intau int | Alkitab Singog In Mongondow Masa In Tanaa (INOMOG)

LUKAS 6:27-49 INOMOG

“Tanaa mako Akuoi in mobogoi in koyow kon i monimu inta moibog mokidongog kon i-Nakó: kotabibí in saturumu, bo pogaidbí kon inta mopia kon intau inta moyaat in gina kon inimu. Barakataibí in intau inta nogodi-godimai kon inimu bo sambayangaibí in intau inta nogaid kon inta diá mopia kon inimu. Bo aka oyúon in intau monokap kon putongimu toḷosi, yo ogoi doman in putongimu toḷosi. Bo ki ine in mogagow kon jubahmu, yo ogoi doman in ḷambungmu. Aka intau moigum kon inimu yo ogoiai mako in sia; bo aka kapunyaanmu bo inagow, yo donaaidon igumonmu bui. Bo onu in koibog monimu popoaid in intau kon i monimu, dá popoaid doman kon i monia in natua. Aka moiko bo tongá motabi kon intau inta motabi doman kon inimu yo onubí in mangaḻenea? Intau doman mita baradosa in motabibí doman kon intau inta motabi kon i monia! Bo aka moiko bo tongá doman mogaid kon inta mopia kon intau inta ain nopoaid kon mopia kon inimu, yo onubí in mangaḻenea? Intau baradosa momia doman kon natua! Bo aka moiko bo mopoḷuan in doit tongá kon i monia inta mokopobui yo onubí in mangaḻenea? Intau baradosa in mopoḷuan doman in doit kon intau baradosa ibanea, onda intua igumondon bui monia! Sabanarnea in deemanbí natua! Nanaabí in musti aidan monimu: Kotabibí in saturumu bo aidai in onu inta mopia kon i monia, bo popoḷuanaibí in mosia, táe donaai potayakan kon kauntungan in mosia. Aka natua in aidan monimu, yo moiko in motarimabí kon bungai in oaidmu inta moḷoben totok bo moiko in mobaḻí doman ki adí mita i Allah Inta Totok in moḷantud. Sin Sia in mopiabí doman kon intau mita inta diá motaau mosukur kon i Allah bo kon intau mita moraat. Musti potonop monimu kon gina in totabi kon tumpaḷa intau ná ki Amámu nopuḻing doman in totabi kon intau!” “Donaai in moiko mohakim kon intau, sinbá diá doman hakimon i Allah in moiko. Bo donaai doman mohukum kon intau. Sinbá diá doman hukumon i Allah in moiko. Ampungaibí in intau inta kotaḷá kon i monimu, sinbá ampungan doman i Allah in taḷá monimu. Pobogoibí kon intau ibanea; sinbá ogoian doman i Allah in moiko moiḻiu kon inta inogoimu kon intau ibanea.” Onda intua ki Yesus in nongonguman bui kon poumpamaan tanaa, kai-Nia, “Degá motaau aka intau bilog bo mokapit kon intau doman bilog? Tantú taya dua tua in tumpaḷabí moḷabú kon bubú. Murí in diábí moiḻiu kon gurunea. Táe aka murí tatua bo nopaḷutdon nobalajar, yo sia in motongkaidon in gurunea. Nongonu sin moiko in moindoibí kon puḻing kon i utatmu, táe balak kon bonu in matamu in diábí kinotaauanmu? Ná ondabí in moiko motaau moguman kon i utatmu, ‘Uḻe, onda bá inggamáanku in puḻing kon matamu nion’, sedang balak kon matamu in diábí indoianmu muna? Ei intau mongomunapik! Poḷuaipa muna in balak kon bonu in matamu. Bá matamu in motarangdon totok bain tua bo iko in motaau mopoḷuai in puḻing kon mata i utatmu.” “Diábí in pangkoi inta mopia in mopomungai in bungai inta diá mopia. Natua doman diábí in pangkoi inta diá mopia in mopomungai in bungai mopia. Sin nongkon bungainea kotaauanbí in pangkoinea. Sin bo bonganga in diábí mopomungai in ḷantat andeka díat diábí mopomungai in anggur. Intau inta mopia in mogaidbí doman kon inta mopia sin ginanea in pinuḻingan in inta mopia. Táe intau inta moraat in mogaidbí doman kon inta moraat sin ginanea in pinuḻingan domandon in inta mongoraat. Sin onu inta siningog in bibig yo tua in iḷumuaibí nongkon ginanea.” “Nongonu sin moiko in mokuukbí kon i-Nakó, ‘Tuhan, Tuhan,’ bokaka bo doíbí in mogaid kon onu inta pinoki aid-Ku? Pomuḷoi in intau inta namangoi kon i-Nakó bo moibog mokidongog kon singog-Ku poḷat doman dumudui kon onu inta pinoki aid-Ku. Onu degá in motaau-Ku popotongakaian kon inia tua? Sia in naonda bo intau inta noposindog in baḷoi. Intau tatua in nongaḻi muna kinoonag bodongka nogaid kon pondasi nongkon batu. Naonda in ḷunud moḷoben, bo baḷoi tatua inuntag in ḷunud tatua, baḷoi tatua in diá noḻiaimai sin ain pinosindog kon pondasi inta noroton. Táe ki ine inta nokodongog kon singog-Ku, tongá doí mogaid kon onu in pinoki aid-Ku, intau tatua in naonda bo intau inta noposindog in baḷoi kon tudu in butá inta diá in pondasinea. Naonda in inuntag in ḷunud, baḷoi tatua baḷú noumpag; bo nogoguyaat totok!”

Read LUKAS 6

Compare All Versions: LUKAS 6:27-49