YEREMIA 31
31
Israel nobui mangoi kon butánea tontaní
1Ki Tuhan in noguman, “Moiangoibí in wakutunea Akuoi mobaḻí Allah in bayongan suku in Israel, bo mosia in mobaḻí umat-Ku. 2Kon padang gurun Akuoi ain noponiata in tabi-Ku kon i monia inta ain noiḷagui kon popatoi. Kon dodai in umat in Israel notayak kon koodoman, 3nongkon noyayú Akuoi nokipogontong kon i monia.
Ei umat Israel, nongkon koḻipodpabímai Akuoi umuran monotabi kon i monimu, bo umuranbí doman in Akuoi moponiata kon Akuoi in umuranbí motabi kon i monimu. 4Bangusamu in baḻíon-Kubí ponango-nangoian ná dungkuḷmai. Komintanpa doman moiko in mogamábí kon rebana bo motayok takin ḷunganga in gina. 5Moiko in mobukabí kon gobá in anggur kon buḷud in Samaria, bo ki inta nomuḷa in mosipúbí doman kon bungainea. 6Totuu, moiangoibí in wakutunea in moḷoḷukad mita kon kotá in momaḷú kon buḷud in Epraim, ‘Koḻigai in kita motakod kon Sion, kon i Tuhan Allah naton.’ ”
7Ki Tuhan in noguman,
“Podondongdon takin ḷunganga in gina kon i Israel, umat-Ku –
bangusa inta pinoḷontú nongkon bayongan in bangusa.
Podondongdon in dondong dodayow, bo potaaudon
‘Ki Tuhan ain noposaḷamat kon i inta ki agat in umat-Nea.’
8Nongkon utuan dinia-Ku in mosia nobui;
sinipun-Ku in mosia nongkon popod mita in butá.
Intau bilog bo intau ḻempeng in moyotakinbí monia,
bobay doman inta bagu nononggadí bo bobay inta dongkadon mogoḷat kon wakutu mononggadí.
Mosia komintan in mamangoi
mobayongbí totok in mamangoi in butá tanaa.
9Mosia in mayá takin moḷabú in ḷuá,
Ḻipoion-Ku bo kapiton-Ku in mosia.
Diaan-Ku in mosia mongin tampat mita inta mobayong in tubig,
mongin daḷan motondodai inta diá in kopintudan.
Kon i Israel, Akuoi in naonda bo ki amá;
Epraim in ki adí-Ku ḷoḷaki guya-guyang.”
10Ki Tuhan in noguman,
“Indongogai ei bangusa mita!
Potaaudon in koyow-Ku modapot kon ḷoḷan in dagat
Umat-Ku inta ain pinorarit-Ku
in sipunon-Kubí bo biagon
naonda bo gombala moḷukad kon dombanea.
11Umat in Israel ain pinosaḷamat-Ku,
bo pinoḷuat-Kudon nongkon bangusa inta moropot.
12Mosia in mamangoi in Tombuḷud in Sion
takin pogot motamburiang,
poḷat modondong takin pia in gina
popisí in bayongan inta inogoi-Ku kon i monia,
gandum, ḷana, anggur, sapi bo domba.
Mosia in mobaḻídon naonda bo taman inta mobayong in tubignea,
bo diábí kodaitan in onu bo onu.
13Kon dodai intua mongodeaga mita in motayok
takin kinoibog in gina.
Guyanga bo tayow mobiag tumpaḷa moḷunganga in gina,
sin Akuoi in moḻipoibí kon i monia.
Kuyang in gina monia baḷuian-Ku in pia in gina,
robonoḷ in gina baḷuaian-Ku in ḷunganga in gina.
14Imang mita in poguḻíon-Kubí in kaanon inta mobayong totok;
bo bayongan inta paraḷuon in umat-Ku ogoi-Kubí.
Akuoi, ki Tuhan, inta noguman.”
Tabi i Tuhan kon Israel
15 #
Kḻn. 35:16-19; Mat. 2:18 Ki Tuhan in noguman,
“Kon Rama kinodongogan in ombaḷ,
bo amui inta takindon in ajar in gina.
Ki Rahel in nongombaḷ kon i adínea mita,
sia in doíbí ḻipoion sin diádon in mosia.
16Gogaiai in ombaḷmu bo paḻitai in ḷuámu!
Diábí doman inta diá in mangaḻenea in inta iḷongasimu kon i adímu mita.
Kon inimu oyúonbí in tontuḻínea,
ki adímu mita in mobui nongkon butá in musung.
17Oyúon in kamang kon inimu in kobiagan moiduduimai;
ki adímu mita in mobuibí kon ḻipú tontaní.
18Dinongog-Ku umat in Israel noguman takin robonoḷ in gina,
‘O Tuhan, kami naa in naonda bo biag inta diápa iyonok
táe sinundú-Mu in kami sinbá motoindudui,
bo tanaa kami in nosadiadon mobui mangoi kon ini-Mu.
Dá, diádon in kami mobui,
o Tuhan, Allah nami.
19Iko ain sinoḻikudan nami,
táe nomanasaḷ in kami kon aid tatua.
Naonda in ihukum-Mu in kami,
kinumuyung in kami sin norobonoḷ in gina.
Nooyá in kami bo nobaḻí mokooyá
popisí in binaradosadon kon dodai in noguodpa.’
20Israel, iko in adí inta kinotabi-Ku totok,
adí inta totok in kinotabi, batoḷ in dodob-Ku.
Pomuḷoi indoyóon-Ku in iko
kotoropan-Ku in iko takin tanob.
Iko in pinomia-Ku
takin nopuḻing in tabi.
21Tomponuotaidon in daḷan mita, posindogdon in tomponuotnea mita
tayakdon in daḷan inta binayáanmu koḻipod.
Ei, Israel, pobuidon!
Pobuidon mangoi kon kotámu mita inta dungkuḷ.
22Modapot in toonu moḻia-ḻiaw in ginamu,
ei bangusa inta diá motoindudui kon i-Nakó?
Akuoi in nomaḻídon kon inta mobagu kon dunia,
tobatú inta diá notombuḷoi – naonda bo bobay diá motombuḷoi in moḷukad kon ḷoḷaki.”
Kobiagan mopia in umat i Allah kon singgai moiduduimai
23Ki Tuhan Inta Totok in mokawasa, Allah in Israel in noguman, “Aka umat-Ku binaḻí-Kudon ponango-nangoian ná dungkuḷmai, dá kon butá in Yohuda bo kon ḻipúnea mita yo kodongogandon bui intau in moguman,
‘Igumon mako ki Tuhan in momarakat kon tombuḷud motusi#31:23: tombuḷud motusi: Buḷud in Sion in tobatú tombuḷud kon Yerusalem inta nobaḻí tongosilai in daerah in Baḷoi Tuhan bo komaḻig. kon Yerusalem
tampat pogutunan inta ain sinantú kon i-Nia.’
24Intau in mogutun kon Yohuda bo kon ḻipúnea mita. Kon tua in oyúon bidon in monononggobá bo mononombobiagon kon sapi bo dombanea. 25Mosia inta moḷopí in poguḻíon-Ku bui, bo inta moḷungkoyó popisí in ginogoi in pobotugon-Ku. 26Kon dodai intuata intau in mogumandon, ‘Naonda in nosiug noḷoḷot, mopiadon in korasaanku.’
27Akuoi, ki Tuhan, in noguman kon moiangoibí in wakutunea butá in Israel bo Yohuda puḻingan-Ku in intau bo bobiagon. 28Ná koḻipod Akuoi noḷukad kon i monia sinbá kon singgai moiduduimai Akuoi in morabut, morumbun bo morimumud kon i monia, natua doman Akuoi in moḷukad kon i monia sinbá Akuoi in moginrigon bo moposindog kon i monia bui. 29#Yeh. 18:2 Kon dodai intua intau in diá bidon moguman bui,
‘Guyanga mokaan kon inta moboil,
ingipon i adínea in mongilu,’
30táe ki ine bidon inta nokaan kon noboil, yo ingiponnea bidon tontaní in mongilu. Batúan in intau in matoibí popisí in dosanea tontaní.”
31 #
Mat. 26:28; Mrk. 14:24; Luk. 22:20; Kor.1. 11:25; Kor.2. 3:6 Ki Tuhan in noguman, “Moiangoibí in wakutunea Akuoi momia kon dodandian mobagu takin umat in Israel bo Yohuda. #Ibr. 8:8-12 32Táe dodandian tatua in deemanbí ná dodandian inta pinomia-Ku takin mogoguyang monia kon dodai in mosia kinapit-Ku iḻumuai nongkon Mesir. Umpaka in Akuoi naonda bo ki buḷoi monia ḷoḷaki, táe mosia in nonoḻikud kon dodandian-ku takin i monia. 33#Ibr. 10:16 Naa in dodandian mobagu inta bain pomiaan-Ku takin umat in Israel: Hukum-Ku mita in tagúon-Ku kon bonu in gina monia, bo paison-Ku kon gina monia. Akuoi in mobaḻí Allah monia, bo mosia in mobaḻí umat-Ku. 34#Ibr. 10:17 Diá bidon paraḷu tobatúmai in intau nongkon i monia in mositundúan bá monotaau kon i Tuhan. Sin mosia komintan, moḷoben mointok, in monotaau bidon kon i-Nakó. Taḷá mita monia in ḻiongon-Ku bidon, dosa mita monia in ampungan-Kubí. Akuoi, ki Tuhan, ain nosingog.”
35Mata in singgai sinadia i Tuhan
sin monimbayag kon tungkuḷ in singgai;
buḷan bo tundi mita
in monimbayag kon tungkuḷ in doḷom.
Dagat in kinaui-Nea dá mobokoḷ monomburá,
Ki Tuhan Inta Totok in mokawasa, tuata in tangoi-Nea.
36Ki Tuhan in nodandi, “Aka hukum in dunia naa bo diápa mobaḷui
yo Israel in tantúbí oyúon saḷaku bangusa.
37Aka kuma kon singgai tobatú bo koukuran in ḷangit,
bo apad in butá kotaridian,
kon dodai intuata Israel in indoíon-Kudon
popisí in bayongan in aid monia inta moraat.
Akuoi, ki Tuhan, ain nosingog.”
38Ki Tuhan in noguman, “Moiangoibí in wakutunea bayongan in Yerusalem posindogon bui saḷaku kotá-Ku, nongkon Ḷangkeang in Hananeel modapot in Bonawang Sikunea. 39Nongkon tua bares in sigadnea mopobayá in Tombuḷud in Gareb, bo moboyuk ná Angob. 40Sinangkub in ḷopá tatua, inta pinaké saḷaku poḷoḷobongan bo tampat poḷoḷumbúan kon apat, bo bayongan in gobá tudunea kon bingkí in Ongkag in Kidron modapot kon Bonawang in Kabaḷo mopobayá ná pomukaan, in pinotondídon kon i-Nakó. Kotá in Yerusalem in diábí rumbunon bui andeka rimumudon.”
Currently Selected:
YEREMIA 31: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
