YESAYA 9

1 # Mat. 4:15 Bangusa inta nobiag kon bonu in sindip

mokoontongdon kon bayag moḷoben.

Inta nogutun kon bonu in oḻinow in popatoi

sinimbayagan in sindar nobayag.

2 # Mat. 4:16; Luk. 1:79 Tuhan, inogoian-Mu in mosia in ḷunganga moḷoben,#9:2: Kamungkinan moḷoben mangaḻenea Inogoian-Mu in mosia in ḷunganga moḷoben. Podudui in naska in Ibrani: Binaḻí-Mu in bangusa tatua nodugang nobarong.

Binaḻí-Mu in mosia norogiow.

Nopia totok in gina monia popisí in kopopia-Mu,

naonda bo intau inta noḷunganga in gina

kon tungkuḷ in nosipun kon bungai in boyó,

andeka nosilai kon inta inagow kon parang.

3Iko ain nogamá kon binabanea inta nobogat

bo kayu pomomotaanan nongkon obaganea.

Iko in nonaḷow kon bangusa monondorot tatua

inta nopogutú kon umat-Mu.

Notongkai ná dungkuḷmai

kon tungkuḷ in Iko nonaḷow kon tontara in Midian.

4Singog in sapatu in tontara inta kodongogan

bo ḷambungnea inta nopuḻing in dugú,

modait kaanon in tuḷú.

5Adí tobatú ain pinononggadí kon i naton;

kita in pinonotabian in ḷoḷaki tobatú.

Sia in mobaḻí itoi naton.

Sia in sinangoian:

“Monononggina Mobijaksana”#9:5: Mobijaksana andeka: mokoherang. “Ki Allah Inta Motorindog”.

“Ki Amá Inta Mononoi”. “Datu in Dodamean”.

6 # Luk. 1:32-33 Sia in momarenta saḷaku datu buí i Daud,

kawasaannea totok in moḷoben.

Butánea in umuran modame bo mobiag mooyúon;

pomarentaannea in pinodoyon kon hukum bo koadilan tanaa mako modapot in mononoi.

Ki Tuhan Inta Totok in Mokawasa notantúbí kon mogaid kon tua.

Ki Tuhan in mohukumbí kon Israel

7Ki Tuhan ain nopoḷabú in hukuman kon dodatuan in Israel. 8Bayongan in intau in Israel bo intau in Samaria in monotaaubí kon ki Tuhanbí inta ain nogaid kon tua. Tanaa moḷoḷatú in mosia bo motosiḷantud. Guman monia, 9“Baḷoi mita nongkon tela noumpagdon, táe buibí posindogon nami in baḷoi mita mobagu inta pomiaan nongkon batu. Pangkoi mita in ara pinupuḷdon, táe baḷuaianbí nami in kayu ḷokuyú in Libanon inta totok in mopia.”

10Ki Tuhan ain nopotabá kon musung monia#9:10: Kamungkinan moḷoben mangaḻenea musung monia; podudui in naska Ibrani: musung mita i Rezin. sin monayow kon i monia. 11Bangusa in Siria kon dotá pomukaan bo bangusa in Pilistin kon dotá toyopan in nogagow kon Israel. Táe ki Tuhan in sinumorúpabí bo umuranpa mohukum.

12Bangusa in Israel diápa doman nomanasaḷ, umpakabí ain ihukum i Tuhan Inta Totok in mokawasa; mosia in diápa doman in tobat kon i-Nia. 13Tuamai in tongá tosinggai in ki Tuhan in nohukum kon i itoi mita in Israel bo rayatnea. Pinongkó bo iḷumbú-Nea in uḷu bo iputnea. 14Uḷunea in guhanga mita in ḻipú bo intau mita inta ihoromat, iputnea in nabi mita inta nobogoi in totundú mita inta mokoḷaḻe. 15Itoi mita in bangusa tatua ain nopoḷaḻe bo nopodoḻiok kon rayat. 16Bangusa tatua ain nonaḷámai kon Tuhan bo moromúdon bo bayongan in tosingogon monia moraat. Tuamai in kon sigad in tayow mobiag mita diá tobatúmai in sinaḻiban i Tuhan. Sia in diábí notabi kon boba-bobay mita bo uno-unon. Táe ki Tuhan in sinumorúpabí bo umuran mohukum.

17Kororaat in bangusa tatua in nonurub naonda bo tuḷú inta noḷeḷep kon dogami. Dokotnea in naonda bo kayuon noturub inta nopodamonik in poyok mobarong. 18Ki Tuhan Inta Totok in mokawasa sinumorú totok, bo hukuman-Nea in naonda bo tuḷú inta moborambang bo bangusa tatua in kayu inta pinondudub inta nodaitnea kinaan. Diábí tobatúmai in intau in motabi kon i utatnea. 19Kon sinangkub in butá tatua mosia mogagow bo mokaan kon onukabí in motaau kaanon, táe diábí in mosia mokorasa kon mobotug. Nodapotbí in mosia mokaan kon topotakin mita monia tontaní! 20Intau in Manasye bo intau in Epraim mositubuan, bo moyotakin monayow kon Yohuda. Táe ki Tuhan in sinumorúpabí bo umuran mohukum.

Currently Selected:

YESAYA 9: INOMOG

Highlight

Copy

Compare