YESAYA 10
10
1Moboditodon in moiko inta nogaid kon hukum mita inta diá moadil sin pondorot kon bangusa-Ku. 2Pinongin aid natua moiko in moḷamboi kon intau bogá mokouḻí kon hak bo koadilan, bo mogagow kon kapunyaan in boba-bobay mita bo uno-unon. 3Onu in pomiaan monimu kon singgai ki Allah mohukum kon i monimu? Onu in aidanmu kon dodai in Sia mopoangoi in anib nongkon ḻipú inta moyayú? Ki ine in pokituḷungan monimu? Kon onda in pobunian monimu kon kaoyúonanmu tatua? 4Ukurmu in tongábí ḻimodon kon parang andeka diaan nobaḻí intau inta dinakop. Táe ki Tuhan in umuranpabí tumorú bo tantú mohukum.
Datu in Asyur pinaké i Tuhan nohukum
5 #
Yes. 14:24-27; Nah. 1:1–3:19; Zep. 2:13-15 Ki Tuhan in noguman, “Moboditodon in Asyur! Asyur in pakéon-Ku nobaḻí sambok bo popangkuḷ sin momongkug kon intau mita inta kinotugatan in torú-Ku. 6Akuoi in nopotabá mangoi kon Asyur sin monubu kon bangusa-Ku inta nonaḷámai kon i-Nakó bo nopomuká kon torú-Ku. Akuoi in nopotabá in Asyur sin mogagow bo monakow bo moritak kon bangusa-Ku naonda bo ḷobud kon daḷan.”
7Táe datu in Asyur oyúon in tomayánea tontaní. Sia in moniat momaké in aid motogat bo moyopú kon mobayong in bangusa. 8Sia in dinumodia, gumannea, “Tongguḷu in tontaraku mita in komintanbí datu! 9Inagowku in kotá mita in Kalno bo Karkemis, Hamat bo Arpad. Inagowku doman in kotá mita in Samaria bo Damsyik. 10Sinaḷowku in dodatuan mita inta nosumba kon berhala mita inta mokawa-kawasa nongkon onu inta oyúon kon Yerusalem bo Samaria. 11Samaria bo bayongan in berhalanea ain iyopúku. Natua doman in aidankubí kon Yerusalem takin komintan berhala inta sinumba kon tua.”
12Táe ki Tuhan in noguman, “Aka inta aidan-Ku kon Buḷud in Sion bo Yerusalem tatua ain nopaḷut, Akuoi in mohukumbí kon datu in Asyur popisí in ḷoḷatú bo dodianea.”
13Datu in Asyur mongambungangaḷ, kainia, “Tua komintan inaidanku pinongin kawasaku tontaní. Akuoi in mobijaksana bo mopandoi. Pinopatanku in sigad mita in bangusa mita, bo inagowku in tongkaaḷ monia. Naonda bo bantong akuoi in noritak kon intau mita inta nomarenta. 14Bangusa mita kon dunia naonda bo pugad in ḷagapan; nogampangkubí totok in nogamá kon kapunyaan monia, naonda bo intau norakup kon natu inta sinaḷáan kon pugad. Diábí in koḻikip in mongaḻikokab, diábí in mobuká kon popadoknea andeka mociap.”
15Táe ki Tuhan in noguman, “Degá motaau in boḻiung in dumodia kon intau inta mopomaké kon inia? Degá garagaji in moponti-ponting in intau inta nopomaké kon inia? Deemanbí bobobak in nobuat kon intau, táe intaubí in motonggó kon bobobak.”
16Popisí in intau in Asyur ain dinumodia, ki Tuhan Inta Totok in mokawasa in mopoangoibí in yampoi in takit sin mohukum kon porwira mita inta mongotorindog. Mosia in ponikonbí in patú totok naonda bo tuḷú inta tantú momokak. 17Ki Allah inta motusi, sindar in Israel, in mobaḻíbí naonda bo dokot in tuḷú inta kon bonu in tosinggai momokak kon bayongan in yagi-yagi, nodapot in dogami mita. 18Kayuon mita inta moromon bo gobá mita inta mopia kon butá in Asyur in yompatonbí modait, naonda bo intau notakit inta nororiga dapot in minatoi. 19Pangkoi mita in kayu in dongka bidon topiḻik, dá mongoadí in mokoiap bidon kon tua.
Tongá topiḻik in intau posaḷamaton
20Moiangoibí in wakutunea ki agat in bangusa in Israel inta nokoḷagui in diá bidon mopoandoḷ in ukurnea kon bangusa inta mongongawasa inta gogió momutú kon i monia, táe umandoḷ bidon kon i Tuhan, Allah inta mokudus in Israel. 21Ki agat in bangusa Israel inta noyakagdon in mogogai bidon mogaid kon inta moraat kon i Allah inta motorindog. 22#Rm. 9:27 Umpaka intau in Israel tanaa notongkai in kobayongnea in bungaion kon dagat, tongábí tongonumai in mobui mangoi. Hukuman i Tuhan in nodiugdon, bo totuu kon patusbí bo moadil in bangusa tatua in yopúon. 23Oo, sinangkub in butá in rimumudonbí i Tuhan Inta Totok in mokawasa; tuata in simpod in singog i Tuhan, bo diábí in motaau baḷuian bui.
Ki Tuhan in mohukumbí kon Asyur
24Ki Tuhan Inta Totok in mokawasa noguman kon umat-Nea inta nogutun kon Sion, “Dika moondok kon intau in Asyur, umpaka mosia mondorot bo mopogutú kon i monimu ná inta pinomia in intau in Mesir koḻipod. 25Kon bonu in wakutu motoyong torú-Ku kon inimu mogogaidon, bo mosia in yopúon-Ku. 26Akuoi Ki Tuhan Inta Totok in mokawasa, in mosambokbí kon i monia in sambok uwoi, ná Akuoi nosambok kon intau in Midian kon Buḷud in batu Oreb. Asyur in hukumon-Kubí, ná Akuoi nohukum kon Mesir. 27Kon tungkuḷ intua Akuoi in mopoḷuatdon kon i monimu nongkon pinondorotan in Asyur, bo mosia in diá bidon mongawasa kon i monimu.”#10:27: Kon bonu in naska in Ibrani oyúonpa in dugangnea toḷu nokata inta diá nosilang in mangaḻenea.
Musung nonubu
28Tontara in Asyur ain nogagow kon kotá in Ayat.#10:28: Tontagá: Kotá tanaa bo kotá mita ibanea inta sinangoi kon bonu in tontagá 28-32 noiukat kon diug in Yerusalem, kon kinoouput in daḷan inta bayáan in mononubu inta nonubu nongkon utuan. Mosia in noitaḻibdon kon Migron! Tongkaaḷ monia in sinaḷáan kon Mikhmas! 29Mosia in noitaḻibdon kon iḷoḷanan bo nogogai kon Geba! Intau kon kotá in Rama gugur mako, bo intau in Gibea, kotá i Datu Saul, ain noḷagui. 30Karakdon, ei intau in Galim! Indongogaidon, intau in Laisya! Tubagaidon, intau in Anatot! 31Intau in Madmena bo Gebim noḷagui nogadop. 32Singgai in naa musung kon kotá in Nob, bo kon tua mosia morangkom kon koyungkum potundú kon Buḷud in Sion kon kotá in Yerusalem.
33Ki Tuhan Inta Totok in mokawasa in mogumpagbí kon i monia naonda bo tanga inta pinongkó nongkon pangkoinea. Inta totok in mobambar bo inta moḷantud kon sigadnea in pupuḷonbí bo umpagon. 34Ki Tuhan in mogumpagbí kon i monia naonda bo pangkoi in kayu kon yuak in kayuon pinupuḷ in boḻiung. Umpaka in mosia moropot ná pangkoi in kayu inta totok in motoyang kon Libanon, mosia in moumpagbí doman!
Currently Selected:
YESAYA 10: INOMOG
Highlight
Copy
Compare
Share
Want to have your highlights saved across all your devices? Sign up or sign in
Alkitab Singog In Mongondow Masa In Tanaa © Indonesian Bible Society, 2016.
