YESAYA 8

Ki adí i Yesaya nobaḻí tomponuot kon bangusa tatua

1Ki Tuhan in noguman kon inakó, “Gamádon in batu pomomaisan moḷoben, bo paisdon kosilang:#8:1: kosilang andeka noḷoben andeka inta kobacaan in bayongan intau. ‘Pogagowan inta Mokaḻet, Pogagowan inta moḻikat’.#8:1: Pogagowan inta Mokaḻet, Pogagowan inta moḻikat: Kon bonu in singog in Ibrani Maher-Syalai bo Hash-Bas. 2Oinídon in sakusi doyowa inta motaau pirisayaan, ki Imang Uria bo ki Zakharia, ki adí i Yeberekhya.”

3Diá noonggot kon tua ki buḷoiku sidiadon. Naonda in ki adí nami pinononggadí, ki Tuhan in noguman kon inakó, “Tangoiai in sia ‘Pogagowan inta Mokaḻet, Pogagowan inta Moḻikat.’ 4Sin kon dodai in adí tatua diápa motaau moguman ‘Amá’ bo ‘Iná’, bayongan in kaoyúonan in Damsyik bo bayongan in pakakat inta inagow in Samaria in akutondon pobayá kon i datu in Asyur.”

Ki datu in Asyur namangoi

5Ki Tuhan nosingog bui kon inakó, 6Guman-Nea, “Bangusa tanaa nondoí kon tubig inta moḷonong nongkon Tapá in Syiloah,#8:6: Tapá in Syiloah: Tapá inta noiḻig nongkon tobatú bokaká moḷoben kon dotá in pomukaan kon Yerusalem. bo nosanang#8:6: nosanang: Tongonumai in terjemahan ibanea: nokuyang in gina andeka: moondok andeka: mourot. takin ki Datu Rezin bo ki Datu Pekah. 7Tuamai in Akuoi, ki Tuhan, mopoangoi kon i datu in Asyur bo bayongan in tontaranea sin monubu kon Yohuda. Mosia in monubu naonda bo Ongkag in Eprat inta moiḻebe-ḻebet bo nomuḻing kon pompangnea mita. 8Mosia in momuntag kon Yohuda naonda bo ḷunud modapot in sigogow bo monaḷom kon bayongan in yagi-yagi.”

Ki Allah in kotaki-takin naton!#8:8: Allah … naton, andeka: koḻikip-Nea mita in songkaan kon ḻimonik in sinangkub in butá. Igumon mako ki Allah kotaki-takin naton. Koḻikip-Nea inta nobuká moḷukad kon butá naton.

9Poyosipundon takin urot, ei bayongan bangusa! Indongogaidon ei popod mita in butá! Posadiadon moparang, táe takin gina inta mourot! Oo, posadiadon, táe takin urot! 10Pomiadon kon tomayá, táe bayongan tua diábí in motuoi. Gamádon in bontow in tosingogon, táe diábí in baragunanea, sin ki Allah in kotaki-takin nami.

Ki Tuhan nobogoi in tompoingat kon i Yesaya

11Akuoi in kinawasa i Tuhan bo inogoian in tompoingat sinbá dika dumudui kon daḷan inta binayáan in bangusa tatua. Guman-Nea, 12#Pet.1. 3:14-15 “Dika duíon yopopog onu inta kai monia in yopopog, bo dika moondok kon onu inta kinoondok monia. 13Toropdon kon Akuoi, ki Tuhan Inta Totok in mokawasa in motusi. Tongábí Akuoi in musti koondokmu. 14#Pet.1. 2:8 Popisí in Akuoi Totok in motusi, Akuoi in nobaḻí batu kopopintudan kon rayat in Yohuda bo Israel, bo poyogaḷap inta modomok kon intau in Yerusalem. 15Mobayong in intau in moḷabú moipintud bo tompaḻían. Mosia in moibonubí kon bonu in poyogaḷap.”

Imaḷow kon mopoigum in topotundú kon mongongundam

16Moiko, murí-ku mita musti motagú bo moḷukad kon koyow mita inta inogoi i Allah kon inakó. 17#Ibr. 2:13 Ki Tuhan ain nogadop kon buí i Yakub, umat-Nea, táe mopirisayabí in akuoi bo umandoḷ mako kon i-Nia.

18 # Ibr. 2:13 Naa in akuoi bo adí mita inta inogoi i Tuhan kon inakó. Ki Tuhan Inta Totok in mokawasa inta nomarenta kon Buḷud in Sion, nopotabá kon inami mobaḻí tomponuot kon umat in Israel.

19Táe intau mita in mopotabábí kon i monimu mopoigum in topotundú nongkon mongongundam mita inta gumombong bo inta mongumi-ngumit. Intau mita tatua in mogumanbí, “Patus aka degá in kita mopoigum in topotundú kon dimukud mita popisí in inta nobiagpa?”

20Tubagai nanaa, “Indongogai in totundú in Tuhan! Intau inta diá nosingog podudui in totundú tatua, diábí in kamang.”#8:20: Kon bonu in naska Ibrani tontagá tanaa diá nosilangmai in mangaḻenea.

Sempo in roriga

21Intau mita inta noiḷangkam bo ginogoi in nobaya-bayáanbí mako in kon butá tatua. Popisí in malarat in kaanon, mosia in umuran tumorú nodapot in mopogodi-godimai kon datu bo kon Allah monia. Kon ondaka in pobobuian monia, moidamonik 22andeka moiḻimonag, mosia in diábí mokoontong kon onu bo onu koḻikudbí in roriga bo goḷom mobunod inta mokokoningkim. Mosia in pogambatbí kon tampat inta sindip tatua.

23Táe butá tatua in diábí umuran koantugan in roriga modapot in mononoi.

Datu kon singgai moiduduimai

Butá mita inta pinogutunan in suku mita in Zebulon bo Naptali in nokoimontandon inanggap i tuhan totok in moompá. Táe kon singgai moiduduimai, sia in mopohoromatbí kon bayongan in butá nongkon Dagat Toyuak bo mopobayá ná pomukaan modapot kon Ongkag in Yordan, sedang bo modapotbí in Galilea inta pinogutunan in intau ango-angoi.

Currently Selected:

YESAYA 8: INOMOG

Highlight

Copy

Compare