YESAYA 7

Koyow tobatú kon i Datu Ahas

1 # Dat.2. 16:5; Taw.2. 28:5-6 Ki Datu Ahas in ki adí ḷoḷaki i Yotam ki ompu i Uzia. Kon tungkuḷ in sia nomarenta kon Yohuda, nobaḻídon in parang. Dá ki Rezin datu in Siria, bo ki Pekah ki adí ḷoḷaki i Remalya datu in Israel, namangoi nonubu kon Yerusalem. Táe mosia in diábí nokoagow kon kotá tatua.

2Kon dodai in ki datu in Yohuda nokodongog kon tontara in Siria in sinumuotdon kon butá in Israel bo nobaḻídon totakin, sia takin bangusanea totokdon in noondok, nodapot in gugurdon mako in mosia naonda bo pangkoi in kayu inta dinandú in tompot.

3Ki Tuhan in noguman kon i Yesaya, “Diadon in ki adímu ki Syear Yashub#7:3: Syear Yashub: Tangoi tanaa kon bonu in singog in Ibrani mangaḻenea: Tongonumai in bui mamangoi. bo bayádon pokipodungkuḷ kon i Datu Ahas. Iko in moyodungkuḷneabí kon popod in got in tabang kon ḻimonikan, kon pomomataan in momomatá mita. 4Pogumandon kon i datu kon sia in musti tantú mosadia bo umuran mokopoonow. Dikabí in sia moondok andeka motoboḻingo. Torú i Datu Pekah bo i Datu Rezin takin tontaranea intau mita in Siria tatua in diábí noiḻiu kon doyowa in oḷuton inta nonompoyok. 5Siria in ain noyopopog in Israel bo datunea. 6Mosia in moibog monubu kon Yohuda bo nopogogondok kon intau inta nogutun kon tua sinbá dumotá kon i monia, bo noduí kon i adí ḷoḷaki i Tabeel nobaḻí datu.

7Táe Akuoi ki Tuhan, moguman kon tua in diábí mobaḻí, 8sin Siria in diábí moropo-ropot nongkon Damsyik iná in kotánea, bo Damsyik in diábí moropo-ropot nongkon i Datu Rezin. Umpaka kon bonu in onom nopuḷú bo ḻima notaong, Israel in mosila-silaibí modapot in diádon monahang saḷaku bangusa. 9Israel in diábí morop-ropot nongkon Samaria, ibukotánea, bo Samaria in diábí moropo-ropot nongkon i Datu Pekah.

Aka moiko diá totu-totuu mopirisaya kon i-Nakó,, notantú bidon kon moiko in diábí mokotongod.”

Tomponuot in Imanuel

10Ki Tuhan in nopotaau in koyow ibanea kon i Ahas: 11“Poigumdon sinbá ki Tuhan Allahmu in mobogoi in tobatú tomponuot kon inimu, pinomayá nongkon dunia in intau minatoi kon ḻimonag, andeka nongkon ḷangit kon ḻimonik.”

12Ki Ahas in notubag, “Akuoi in doíbí moigum kon tomponuot. Akuoi in doíbí monungkuḷ kon i Tuhan.”

13Bo ki Nabi Yesaya in noguman, “Aka natua, indongogai uḻe buí i Datu Daud! Diápa tugat in moiko in monungkuḷ kon kososabar in intau, modapot in moiko in monungkuḷ doman kon kososabar i Allahku? 14#Mat. 1:23 Tanaa, ki Tuhan tontaní in mobogoi in tomponuot kon inimu: Mongodeaga tobatú#7:14: Tosingogon in Ibrani inta sinonmangaḻean in ‘mongodeaga’ mangaḻenea in mongodeaga noguod inta tugatdon in umurnea pobuḷoion, bo diábí in mangaḻenea tontaní ‘porawan’. Pinomakéan in singog ‘porawan’ kon bonu in Mat. 1:23 motundú kon terjemahan Dodandian Koyongan kon bonu in singog in Yunani inta pinomia diá nogaat kon ḻima nogatut notaong nopaḷut kon i Yesaya. inta sidia in mopononggadíbí in ḷoḷaki tobatú inta sinangoiannea Imanuel.#7:14: Imanuel: Tangoi tanaa kon singog in Ibrani mangaḻenea “Ki Allah in kotaki-takin naton.” 15Kon tungkuḷ in tugatdon in koḷobennea monantú kon tosingogonnea tontaní, ḻipú tatua in mobiagdon mooyúon.#7:15: mobiagdon mooyúon: Podudui in naska Ibrani: Sia in monginumbí kon susu bo biluk. Kokaanon tatua in pinoyotogot in pinomangkoian kinobaḻian in Israel. 16Sin kon dodai in wakutu tatua diápa moiangoi, ḻipú doyowa inta pinarenta in datu mita inta kinoondokmu tatua in taḷaanbí diádon in intau.

17Ki Tuhan in mopoangoibí in datu in Asyur, bo iko takin motoḷuadímu takin rayatmu in mokorasa kon singgai mita inta nopuḻing in roriga inta motoyang totok nongkon onu inta ain nokoimontan kinorasaan monimu pinangkoi kon kinobotakan in dodatuan in Israel bo Yohuda.

18-19Kon tungkuḷ intua ki Tuhan in mogoiníbí kon intau in Mesir bo intau in Asyur, bo bangusa doyowa tatua mamangoi naonda bo paanan in ḷangow bo pasukan inta noḻibut kon oyuk mita noirib bo sigad mita in batu karang. Mosia in momumbunbí kon batúan in bo bonganga bo bayongan in tampat inta ḻimbuyun.

20Ki Tuhan in monondanbí kon datu in Asyur sin mopomia kon Israel naonda bo intau mongongarug inta mongarug komintan kon buok bo bubuḷ kon awak.

21Kon dodai intua, aka intau tobatú momiag kon sapi tobatú batánea bo bembé tongá doyowa, 22yo tubig in teté in bobiagon tatua in moiḻiubí kon tugat poinumon kon intau mita inta ki agatnea kon butá tatua. Totuu, mosia in monginumbí kon susu bo biluk.

23Kon tungkuḷ intua gobá mita in anggur inta kon batúannea pinomuḷaan kon pangkoi in anggur toribu bo inta boḻinea in toribu in doit saḷaka, in kobiagan in bo bonganga. 24Intau inta mayá intua musti modia kon piot bo puḷunea, sin sinangkub in butá tatua nopuḻing in bo bonganga. 25Bo butá kon buḷud inta biasamai tonggobaan bo ponompinomuḷaan in nopuḻing doman in bo bonganga, modapot in intau diádon mokobaḻí mayá intua. Butá tatua in tongádon mobaḻí pongongaanan in sapi bo domba.”

Currently Selected:

YESAYA 7: INOMOG

Highlight

Copy

Compare