MAZMUR 89
89
Nyanyian tempo'nyo tinokanmo nu balaa'
1 #
1Raj. 4:31
Nyanyian pangajalan i Etan, mian nu aha Ezrahi.
Kanonongan nu Tumpu Anu Daka' na Kuasa-Nyo.
2Kalibosan nu Belento, o, Tumpu, saja'mo ku nyanyiakon,
kanonongan nu Belento saja'mo ku bebakon sampe molundu-lundu na tulunan.
3Kalana ku sumbu' na kalibosan nu Belento sampe toka sidu-sidutu',
kanonongan nu Belento mahoson hondo susumo langit.
4Belento notataemo, “Aku nombaumo palajanjian
tiba mian anu pinile'anKumo;
Aku binasumpa'mo hi Daud, posaihon-Ku:
5 #
2Sam. 7:12-16, 1Taw. 17:11-14, Mzm. 132:11, Kis. 2:30 ‘Kalaja'an nu beleyum sabole-boleh ku potinjo sampe toka sidu-sidutu',
molundu-lundu na tulunan nu beleyum ka' to maku-makumpu nu beleyum monjojoongi.’ ”
6Sidang nu aha mian nu suluga' nompuji'mo palabuatan nu Belento anu okabangangi,
ka' nonyanyiakonmo kanonongan nu Belento o, Tumpu.
7Aita' mae i langit madi' ko anu susumo Belento o, Tumpu,
madi' ko malaekat nu suluga' anu mompokakanai Belento.
8Belento oholomati nu aha to mia-mian anu susi',
nakabuhuk hondo nu aha iwi-iwi' anu montikubi mae Belento.
9O, Tumpu, Tumpu Anu Daka' na Kuasa-Nyo, ihe na anu susumo Belento na kohosonnyo?
Belento manonong hondo i han iwi-iwi' o, Tumpu.
10Belento mongkuasai ambai anu daka' hondo na bokonnyo,
ka' nompobelentimo bokonnyo anu okabuhuk hondo.
11I Rahab, ulo daka-daka' nu ambai, i hungku'anmo nu Belento ka' pinateanmo nu Belento,
lima nu Belento anu tala-talalo hondo mahoson na nompatundu'mo iwi-iwi' na anu monsampobali' Belento.
12Langit ka' tano' Belento na tumpu-Nyo,
dunia ka' iwi-iwi' na isinyo Belento na nompotimbali.
13Belentomo na nompotimbali utara ka' selatan,
Bungkutnyo nu Tabot ka' Hermon nontaligalaimo Belento.
14Talalo hondo daka' na kuasa nu Belento
ka' talalo hondo daka' na kahosonan nu Belento!
15Ka'adilan ka' atulan aijo'mo na bau usoinyo nu kalaja'an nu Belento,
kalibosan ka' kanonongan otoa i han iwi-iwi' apaa na anu, nubau nu Belento.
16Mohumpak ka'ima'an na kantumuu'an nu bansa anu lame' na kinyonyoanyo monsombah Tumpu,
anu tumuu' i uno nu jingka de Belento tokamo mae o, Tumpu.
17Sansina-sinaa aha sanang na kinyonyoanyo ka' sabole-boleh palesaya,
kalana kanonongan nu Belento.
18Belento nompo'untungmo hondo kami mahampate,
kalana samata-mata kanonongan nu Belento sahingga kami inguntungmo na nahampate.
19Kalana anu nonjagai mae kami aijo'mo mian anu pinile'anmo mae nu Belento, o, Tumpu;
tomundo' mami Belento Tumpu Israel na tumpunyo anu Susi'.
Tumpu nojanji'mo hi Daud
20Naipuan mae tempo'nyo Belento nanintoa,
Belento nompoto'imo hi posaihon nu Belento ano tulu-tulutan.
“Aku nontulungimo samian anu baani hondo,
samian anu pinile'an-Kumo aijo' hi aha mian da'isan ka' i hangkatkumo na sanggonyo.
21 #
1Sam. 13:14, 16:12, Kis. 13:22 Aku nongkabotmo i Daud, posaihonku,
ka' jinujuhankumu nu lanya' susumo biasa opake de mohangkatmo samian timbali tomundo'.
22Kahosonan-Ku saja' monjagai ia,
kuasang-Ku na mompohoson ia.
23Ia madi' nupoko ala nu patundu' nu anu monsampobali',
ka' madi' nupoko ala nusansala nu mian anu ma'idek na kinyonyoanyo.
24Iwi-iwi' na anu monsampobali' ia Ku pateimo,
Ku patei maumo pa' ihe na anu mongka'ideki ia.
25Aku sabole-boleh mongkalibosi ia ka' mongkanonongi ia,
ka' ku potimbalimo da mompaka pahosonmo na kakuasa'annyo.
26Kalaja'annyo ku paka po'ewamo,
lengkat mae i Ambai anu i Totonga'nyo toka-toka i Kaunyo nu Efrat.
27Ia notataeje mae hi beleng-Ku, ‘Belentomo na Tuumangku,
Tumpu Allah-ngku anu monjagai mae, ka' anu momposalamat aku.’
28 #
Why. 1:5
Ku potimbalimo na ia ana-Ku mo'ane anu tumpenyo,
anu talalo hondo talasanggo hi aha to tomu-tomundo' iwi-iwi'.
29Ia sabole-boleh ku kalibosi sampe toka sidu-sidutu',
anu jinanji'-Kumo hi ia sabole-boleh mahoson madi' mongabali'.
30Kalaja'annyo sabole-boleh Ku potinjo susumo langit daagi' sabole-boleh aita' i buan nu tano',
molundu-lundu na makumpu nu aha monjojoongi aijo'.
31Panyo de lee' nu aha molanggai atulanku,
ka' madi' tumuu' mombatuki palentah-ngKu,
32de aha madi' mompajuli anu tinantukan-Kumo
ka' madi'mo montuluti atulan-Ku,
33aha Ku dokemo salaku bau pohukum kalana aha nolanggaimo atulan-Ku,
ka' Ku bee'imo balaa' kalana dosa' nu aha iwi-iwi'.
34Panyo aku sabole-boleh mongkalibosi i Daud,
ka' madi'mo mongabali' na kanonongan-Ku.
35Anu jinanji'-Kumo hi ia madi'mo Ku kolilimi,
sa'angu' pe'e na anu jinanji'-Kumo madi'mo daagi' ku potundei.
36Ola minsan na aku binasumpa' panyo nukonamo sampe toka sidu-sidutu'
i uno nu sanggong-Ku anu susi';
aku madi'mo ahi' mombaleko'i i Daud.
37Kalaja'annyo sabole-bole totahan susumo batu nu sinaa daagi sabole-bole otoa,
molundu-lundu na anak makumpu nu aha monjojoongi.
38Kalaja'annyo sabole-boleh daagi' susumo bitu'on,
anu aita mae i kundom, saja' mae monsakisi'i.”
Nohangimo i tomundo kalana pinatundu'mo
39Panyo uuka aiya Belento nontambuha'imo i tomundo,
Belento nompojohokmo ka' madi'mo nongkali-kalinga mian anu pinile'anmo nu Belento.
40Madi'mo kupojadi na palajanjian nu Belento hi posaihon nu Belento,
makota'nyo i lumbu'akonmo nu Belento i uno nu hensek.
41I hobo'akonmo nu Belento na pagan mesen iwi-iwi' i kota' kajojoongannyo,
bentengnyo iwi-iwi' i hobo'akonmo nu Belento.
42Iwi-iwi' na mian anu motulu ikiijo' nompohuhuakonmo balangnyo,
ia lewa'mo kinokojoan nu aha anu mompaha ohani.
43Belento nompo'untungmo nahampate aha anu monsampobali' mae ia,
ka' iwi-iwi' na mian anu nongewa mae ia i lame'mo.
44Ka' mule' toongonnyo anu bau pahampate nu aha pinotimbalimo nu Belento madi' ningkaliangan,
Belento madi'mo nontulungi ia, nahampate.
45Kakuasa'annyo anu tinalasanggomo hondo pinobelentimo nu Belento,
kadelanyo nu kalaja'an ingalinmo nu Belento nokaiyong i tano'.
46Ka'umolitauannyo kinodo'anmo nu Belento,
ka' kinulubanmo nu Belento na ia nu ambang.
Do'a mongkakase da opobebasmo
47Hipian na kopinnyo na Belento madi'mo mae manintoa o, Tumpu?
Hipian na kopinnyo na Belento motambuha' anu sumomo apu na komoaknyo?
48Inau'akon mae na aku talalomo hondo kinodo' na umunku aiya,
pinotimbalimo nu Belento na mian anu ko nyawanyo panyo madi' tumuu' batu.
49Ihe na moko ala tumuu' sidu-sidutu' ka' mule' madi' silaka?
Ihe na anu moko ala bebas da madi' minsoop i bolo' nu kubun?
50O, Tumpu, iya na tanda pontoan kalibosan nu Belento anu momonanyo mae,
anu jinanji'mo nu Belento hi Daud salaku tanda kanonongan nu Belento?
51Inau'akon mae o, Tumpu, mosiamo ahi' na posaihon nu Belento aiya lewa'mo o'alu,
aku saja'mo pinopo'ambang nu to bansa-bansa.
52To mia-mian anu monsampobali' Belento nompopo'ambangmo i tomundo' anu pinile'anmo nu Belento, o, Tumpu,
lewa' mongkokojoi ia maumo pa' moya na ia mamba.
53O, puji' na Tumpu sampe toka sidu-sidutu'.
Timbaliakonmo mae susumo uuka! Amin!
Currently Selected:
MAZMUR 89: LAILOE
Highlight
Copy
Compare
Share
Want to have your highlights saved across all your devices? Sign up or sign in
