MAZMUR 88
88
Do'a mongkakase da otulungi mae
1Nyanyian. Mazmur nu aha sa'anakan mae i Korah. Anu mongkapalai panyanyi. Ingala i lagu nu nyanyian: Mahalat Leanot, Nyanyian pangajalan i Heman, mian nu Ezrahi.
2O, Tumpu, Tumpu Allah anu nomposalamatmo aku,
de sinaamo aku mongkakasemo hi Belento,
de pihimo aku mangadapmo hi Belento.
3O'amalakon da do'angku toka ahi' hi Belento,
potombihingakon mae na anu ku kakase aiya.
4Nanjoo'mo na kasusa'an anu nontokaimo mae aku;
kasilakan aiyamo mae i ahop nu sabatan.
5Aku sumomo mian anu mintatau'mo mokaiyong i bolo' nu kubun,
mian anu ningkotmo na kahosonan.
6Aku pinala'ianmo aijo' hi mian anu sinilakamo,
sumomo mian anu pinateanmo, nanimbandangmo i uno nu kubulan,
susumo mian anu kinolilimanmo nu Belento totu-totu'u,
mian anu madi'mo daagi' nutulungi nu Belento.
7Aku ingalinmo nu Belento i uno nu bolo' anu maleeng hondo
i uno nu liang nu kubun anu maleeng hondo ka' mule' pintung.
8Tambuha' nu Belento na nompaka piboatimo aku nokaiyong
aku nahutemo kalana ingutunanmo nu tambuha' nu Belento.
9To mia-mian anu mompahasumbu' tiba aku pinojo'onmo nu Belento hi belengku,
ka' pinotimbalimo nu Belento na aku da mompobubun nganga' nu aha.
Aku pinojoongmo nu aha kiijo' i unonyo ka' madi'mo noko ala nosabat,
10matangku madi'mo talalo nontoa-toa kalana sinansalamo.
Sansina-sinaa aku mongkakase hi Belento, o, Tumpu,
ka' balado'a ku potala na limangku.
11Te mian anu sinilakamo na pompotoan nu Belento anu okabangangi?
Te aha daagi' po'ule' tumuu' ka' mompuji' Belento?
12Te toho' mule' kalibosan nu Belento opolele i uno nu kubulan,
ka' mule' kanonongan nu Belento i tampat kasilakan?
13Te Belento nombau anu okabangangi ko anu monsumbu' kiijo' i uno nu pintung,
kabai kanonongan nu Belento i lipu' kajojoongan nu anu kinolilimanmo?
14Panyo aku mongkakase da otulungi mae nu Belento o, Tumpu,
de subu-subumo ku potokamo hi Belento na do'angku.
15O, Tumpu kadaka' Belento madi'mo mongkalinga aku?
Kadaka' Belento mosiloimo madi'mo montoa mae aku?
16Daagi' pe'e ise-ise' na aku sinansalamo, ka' iyoo'mo nu kasilakan,
aku madi'mo kinogawe apa-apaa na montanggung hukuman nu Belento.
17Tambuha' nu Belento anu okabuhuk hondo nohionsuhimo aku,
kabaanian nu Belento anu okabuhuk hondo nolambanimo mae aku sahingga aku sinilakamo.
18Sansina-sinaa tambuha' nu Belento sumomo iaba' anu nontikumo mae aku
nontumbuhimo mae aku lengkat mae iwi-iwi na tampat.
19To sanga-sangalungku anu mompahasumbu' hondo pinojo'onmo nu Belento hi belengku,
memo ahi' kapintungan na monsangalui mae aku.
Currently Selected:
MAZMUR 88: LAILOE
Highlight
Copy
Compare
Share
Want to have your highlights saved across all your devices? Sign up or sign in
