MAZMUR 86
86
Do'a mongkakase da otulungi mae
1Do'a i Daud.
Potombihingakon mae na do'angku, o, Tumpu, ka' taami mae na aku,
kalana aku kasiasi ka' madi' mahoson.
2Jagaiakon mae na kantumuu'anku, kalana Belento mongkalibosi mae aku,
posalamatakon mae na posaihon nu Belento aiya anu pinalesayamo hi Belento.
3Belentomo na Tumpungku, kalibosi mae na aku o, Tumpu
kalana sansina-sinaa aku balado'a hi Belento.
4O, Tumpu, polame'akon mae na kinyonyoa nu posaihon nu Belento aiya,
kalana hi Belentomo na pomboanku kinyonyoangku.
5Belento manonong, o, Tumpu, ka' kahanda' mongampuni,
mian anu balado'a hi Belento, saja' nukalibosi nu Belento,
nukalibosan anu madi' ko kamingkotannyo.
6Boli mae okolilimi na do'angku, o, Tumpu,
potombihingakon mae na potataengku mongkakase da otulungi mae.
7Tempo'nyo aku sinusa'mo, aku binalado'amo hi Belento,
kalana belento montaami mae aku.
8O, Tumpu, madi' ko tumpu sangga'at susumo Belento
madi' ko anu moko ala mombau apa-apaa susumo anu binaumo nu belento.
9 #
Why. 15:4
Iwi-iwi' na bansa anu pinotimbalimo nu Belento saidi' mae, tokamo o Tumpu
kahanda' monsombah Belento ka' mompuji' Belento anu talasanggo aijo'.
10Kalana Belento mahoson ka' baani ka' mombaumo hahan anu okabangangi,
olamo samata-mata Belentomo na Tumpu.
11Pogulu'akon mae, apaa na anu, nu kahanda'i hi belengku, o, Tumpu,
da ku batuki ka' ku tuluti totu-totu'u;
potimbali mae na aku da tulu-tulutan ka' totu-totu'u na kinyonyoangku.
12Aku montalima kase hi Belento, totu-totu'u hondo na kinyonyoangku,
o, Tumpungku;
aku mompuji'mo kakuasa'an nu Belento sampe toka sidu-sidutu'.
13Kalana Belento saja' mongkalibosi aku, ka' kalibosan nu Belento tahahumo hondo;
Belento nohangkatmo nyawangku da boli jojoong kaiyong i uno nu kubun.
14O, Tumpu, mian anu buulon mambamo mae montumbuhi aku,
sanggombu na mian anu toto sisinggi kahanda'mo mompatei mae aku;
aha madi'mo mompajuli Belento.
15Panyo Belento, o, Tumpu, Tumpu anu pangkalibosi ka' manononghondo,
sabaan hondo, saja' mongkalibosi, ka' manonong.
16Palahatikan ka' kalibosi mae na aku,
pohosonakon mae, ka' posalamatakon mae na aku, susumo tinangku,
aku suele monsombah ahi' Belento.
17Bee'i mae tanda na aku, da pontoan taalu' Belento mongkanonongi ahi' mae aku, o, Tumpu
da mian anu mongka'ideki mae aku, ma'ambangmo,
de nutoamo mae nu aha na Belento montulungimo mae aku ka' mohase'mo mae aku.
Currently Selected:
MAZMUR 86: LAILOE
Highlight
Copy
Compare
Share
Want to have your highlights saved across all your devices? Sign up or sign in
