MAZMUR 85
85
Do'a mongkakase da mohumpak ka'ima'an na kantumuu'an nu bansa
1Anu mongkapalai panyanyi. Mazmur nu aha sa'anakan i Korah.
2Belento mongka'ima'i tano' nu Belento o, Tumpu
kantumuu'an nu aha Israel po'ule'mo pinokopianan nu Belento.
3Belento nongampuni dosa' iwi-iwi' nu mian anu palesayamo hi Belento;
ingampunanmo nu Belento na kasala'an nu aha iwi-iwi'.
4Aha madi'mo tinambuha'an nu Belento;
tambuha' nu Belento anu taha-tahahumo po'ule'mo ingampunan nu Belento.
5Po'ule' mae pokopiani na kantumuu'an mami o, Tumpu Allah anu momposalamat kami,
bolimo po'ule' otambuha'i mae na kami.
6Pa' sidu-sidutu'mo na belento montambuha'i mae kami,
ka' sabole-bolemo motambuha' sampe molundu-lundu na tulunan?
7Po'ule' mae pohosonakon na kami
da lame' na kinyonyoa nu kami mian anu palesayamo hi Belento, kalana tinulunganmo nu Belento.
8Potoa mae hi kami da osumbu' mami taalu' sabole-boleh ahi' na Belento mongkalibosi mae, o, Tumpu,
bee'i mae na kami kasalamatan anu lengkat mae hi Belento.
9Aku nohongomo potatae nu Tumpu;
ia nonjanji'mo ka'ima'an nu kantumuu'an hi kita, mian anu palesayamo hi Ia,
asan kita bolimo po'ule' mombau dosa'.
10Memang Ia ko kahanda' momposalamat anu tulu-tulutan.
Tumpu anu talasanggo hondo jojoongmo i lipu'to aiya.
11Kalibosan ka' tulu-tulutan mompaha singkabotmo
ka'adilan ka' kadamean mompaha tanggo-tanggogolimo.
12Tulu-tulutan nu manusia molengkatmo mae i dunia aiya,
ka' ka'adilan nu Tumpu montoamo mae lengkat i langit.
13Tumpu mombee'imo mae anu ma'ima',
sahingga tano' to mombee'imo hasinnyo.
14Ka'adilan na mamba mae momona, ka' momposadia kajalanan-Nyo lapas aijo' tokaje mae na Tumpu.
Currently Selected:
MAZMUR 85: LAILOE
Highlight
Copy
Compare
Share
Want to have your highlights saved across all your devices? Sign up or sign in
