MAZMUR 84
84
Saja' monginau' Laigan nu Tumpu
1Anu mongkapalai panyanyi. Ingala i lagu nu nyanyian: Gitit. Mazmur nu aha sa'anakan i Korah.
2Ma'ima' ka' momposanang hondo kinyonyoa na kajojoongan nu Belento,
o, Tumpu Anu Daka' na Kuasanyo!
3Kinyonyoangku talalo hondo saja' monginau' Laigan nu Belento,
santuu'ku ka' butongku montaligalaimo Tumpu anu tumuu'.
4Ka' mule' tomonsi' toto ise-ise binee'anmo laigan
ka' tomonsi petajuk suele binee'anmo sa'angu' na peta,
bau pompojoongan nu aha soma'nyo koko mezbah nu Belento,
O, Tumpu Anu Daka' na Kuasanyo, Tomundo'ku ka' Tumpu-ngku.
5Totu-totu'u mohumpak ka'ima'an na mian anu jojoong i laigan nu Belento,
ka' saja' monyanyi, nyanyian anu bau pompuji' Belento.
6Mohumpakmo ka'ima'an na mian anu obee'imo kahosonan nu Belento,
ka' anu ko kinyonyoa mamba montoa Bungkutnyo nu Sion.
7Hau-haunyo aha lumajang motulu i bangka'nyo nu Ahelat,
tampat aijo' binali'anmo nu aha tinimbalimo mata nu uee,
ujan anu momona tinudun nabohos hondo aijo', salakumo balakat.
8Kahosonan nu aha nompaka pintuangmo,
tempo'nyo ilumajang namba i Sion, i tampat nu Tumpu iwi-iwi' na anu oholomati nanintoamo mae.
9Potombihing mae na do'angku, O, Tumpu Anu Daka' na Kuasanyo,
potombihingakon mae, O, Tumpu i Yakub.
10Balakatiakon mae na tomundo' mami, O, Tumpu,
jagaiakon mae na mian anu pinile'anumo nu Belento.
11Maumo 1.000 na sinaa na jojoong i tampat sangga'at
panyo lebe ma'ima' maumo ola sansinaa na jojoong i Laigan nu Belento.
Anu nompile'imo da timbali bau ponjagai sabatan Laigan nu Tumpu-ngku
asan boli jojoong i laigan nu mian anu ma'idek na kinyonyoanyo.
12Kalana Tumpu na monjagai kita ka' tomundo' anu talasanggo hondo,
anu mongkalibosimo mae kita ka' i hangkatnyomo na sanggonto.
Ia saja' montalima maumo pa'apaa asan anu ma'ima' na opoita
kona hi mian anu kantumuu'annyo madi' ko anu ma'idek.
13O Tumpu Anu Daka' na Kuasanyo,
mohumpak ka'ima'an na kantumuu'an nu mian anu palesayamo hi Belento.
Currently Selected:
MAZMUR 84: LAILOE
Highlight
Copy
Compare
Share
Want to have your highlights saved across all your devices? Sign up or sign in
