MAZMUR 83
83
Do'a mongkakase da otulungi mae na mongewa sampobali'
1Sa'angu' na nyanyian. Mazmur i Asaf.
2O Tumpu, boli tongo,
boli ola basolung lima ka' momohokot.
3Soba toa, na anu monsampobali' beleyum molambanimo mae,
to mia-mian anu mongka'ideki belento motomuhukmo mae.
4Aha nombaumo tanga'an anu ma'idek da o'ewamo na mian anu palesayamo hi Belento;
ka' nonsale'akonmo da o'ewamo na to mia-mian anu nujagai nu Belento.
5Aha notataemo, “Imbo' da osilakaimo iwi-iwi' na bansa Israel,
da sanggo nu aha madi'mo daagi' o'inau'.”
6Iwi-iwi' na bansa nosa'angu'mo,
ka' nombaumo kasangaja'an mongewamo Belento:
7bansa Edom ka' Ismael,
to mia-mian nu Moab tiba Hagar;
8bansa Gebal, Amon tiba Amalek,
bansa Filistea ka' mule' anu monjojoongi Tirus.
9Ka' mule' Asyur suele nosa'angu'mo tiba aha,
nowakinimo mae lee' i Lot.
10 #
Hak. 4:6-22, 7:1-23 Baumo na aha susumo mian nu Midian,
susumo i Sisera tiba i Yabin i Kaunyo nu Kisyon.
11Anu sinilakamo kiijo' mae i Endor,
ka' tinimbalimo lompo' nu tano'.
12 #
Hak. 7:25, 8:12 Baumo na to pola-polaya' nu aha susumo hi Oreb tiba hi Zeeb,
patundu'mo na anu mongkuasai aha susumo hi Zebah tiba hi Salmuna,
13kalana aha notataemo,
“Imbo' da ojojoongintomo na tano' kajojoongan nu Tumpu.”
14O Tumpu, sagakonmo na aha susumo abu',
susumo haat nupuhimo nu mombun.
15Susumo apu anu mompapuimo alas,
moak nu apu anu montoyo'imo bungkutnyo iwi-iwi'.
16Loloi'mo na aha nu antong daka' nu Belento,
potolokengkeng na aha nu baleba' anu makansang hondo nu Belento.
17O, Tumpu Allah, bakas na aha lewa' o'alu,
da nu akui nu aha na kakuasa'an nu Belento.
18Bakas na aha saja' opopo'ambang ka' saja' mongoa'i mabuhuk,
bakas na aha silaka kalana nusaduakon lewa'mo o'alu.
19O'amalakon da nusumbu' nu aha taalu' olamo ahi' Belento na Anu matangkas na Kuasa-Nyo
Tumpu, anu mongkuasai songko-songko na dunia.
Currently Selected:
MAZMUR 83: LAILOE
Highlight
Copy
Compare
Share
Want to have your highlights saved across all your devices? Sign up or sign in
