MAZMUR 80
80
Do'a da oposalamat na mian
1Anu mongkapalai panyanyi. Ingala i lagu nu nyanyian: Bunga Bakung. Mazmur mongkona han anu sinakisianmo i Asaf.
2 #
Kel. 25:22
O, Polaya' nu Israel, potombihingakon mae,
Belento na nolaya'mo lee' i Yusuf susumo potu'on, sanggombu.
Belento na anu sinumuhangmo aita' i malaekat,
tinokamo mae, na'ima'mo hondo na tinoa, hi ahop i Efraim, Benyamin tiba hi Manasye.
3Potoamo mae na kakuasa'an nu Belento hi kami,
ka' tokamo mae posalamat na kami.
4O, Tumpu, po'ule' mae pokopianiakon na' kantumuu'an mami;
polibos maena montoa kami,
da kami salamat.
5O, Tumpu Anu Daka' na Kuasa-Nyo,
sampe toka hipian na kopinnyo na Belento motambuha',
maumo mian anu palesayamo hi Belento balado'amo?
6Kami lewa' humang aijo'mo na kaanon mami anu binee'mo nu Belento
lolu' nanjoo'mo hondo na o inum mami.
7Pinojohokmo nu Belento na to bansa-bansa anu mompaha ohani
mompahantuda'akon mae tano' mami
aha anu monsampobali' mae kami kinumojomo kalana sinanangmo.
8O, Tumpu, Anu Daka na Kuasa-Nyo po'ule' mae pokopianiakon na kantumuu'an mami;
polibos mae na montoa kami,
da kami salamat.
9Mian anu palesayamo hi Belento sumomo kau' anggur anu i lalinmo mae nu Belento lengkat mae i Mesir.
Bansa haha aijo' sangga'at i laa'mo nu Belento,
lantas sinu'anmo nu Belento na kau' aijo' i lipu' nu aha.
10Belento nontoukaimo tano' da bau kajojoongan nu aha;
sahingga ia nimbakatmo leleeng ka' nonsongkohimo iwi-iwi' na lipu'.
11Ia nohohungimo to bungku-bungkutnyo
ka' to panga-panga'nyo
nombolungimo kau' aras anu toto tale-talenga'nyo.
12Panga'nyo toto ise-ise' nantademo manta-mantan tinoka-tokamo i Ambai anu i Totonga'nyo,
iwi-iwi' na londeknyo tinoka-tokamo i Kaunyo nu Efrat.
13O, Tumpu, kadaka' tinua'akonmo nu Belento na balabatnyo,
sahingga de ko mian anu motulu montipumo bua'nyo?
14Bau' nu kuhat lewa'mo mombangkedi sampe nahutakmo,
ka' kinaanmo nu binatang anu jojoong i tampat padang na lewa' mongkaan.
15O, Tumpu, Anu Matangkas na Kuasa-Nyo, po'ule'mo mae toka,
toa mae lengkat atina' i suluga' ka' palahatikan mae mian anu palesayamo hi Belento.
16Posalamat mae na mian anu sumomo kau' anggur
anu posi Belento na nosu'an,
ka' sumpenyo nu anggur anu pinohosonmo nu Belento.
17Anu monsampobali nonta'amo ka' nompapuimo;
bakasmo na aha da silakamo nu tambuha' nu Belento.
18Jagai mae na mian anu pinile'anmo nu Belento,
anak nu manusia anu pinohosonmo, nu Belento da Belentomo na Tumpu-Nyo.
19Sahingga kami madi'mo daagi' mompala'i Belento;
jagaiakon mae na kantumuu'an mami,
sahingga kami mompuji'mo Belento.
20O, Tumpu, Anu Daka' na Kuasa-Nyo,
polibos mae na montoa kami,
da kami salamat.
Currently Selected:
MAZMUR 80: LAILOE
Highlight
Copy
Compare
Share
Want to have your highlights saved across all your devices? Sign up or sign in
