MAZMUR 81
81
Nyanyian de mombaumo lamean
1Anu mongkapalai panyanyi. Ingala i lagu nu nyanyian: Gitit. Lengkat hi Asaf.
2Nyanyiakon na nyanyian anu bau pompuji' Tumpu, anu timbalimo kahosonanto.
Opolame' na montaligalai Tumpu i Yakub.
3Hapa'i na gandang, ka' lewa'mo panyanyi,
kuti' na gambuus ka' kasapi', po'ima' na onyi'nyo da molibos na mohongo.
4 #
Bil. 10:10
Puhi na tolompet de tokamo na sinaa momolame'an mo na kita,
i bau-bauon bitu'on bu'ou ka' bitu'on timpodonmo.
5Kalana han aijo' sa'angu' na atulan hi aha Israel,
sa'angu' na palentah lengkat mae hi Tumpu i Yakub.
6Ia nombaumo sa'angu' na katantuan hi bansa Israel,
tempo'nyo Ia nambamo nongewa Mesir.
Aku nohongomo basa' anu madi' ku sumbu',
7“Aku nompasi'akonmo kolonon anu maboat atina' i bikoang nu beleyum,
ka' nompengasmo kalanjang anu o kolon atina' totoong i lima nu beleyum.
8 #
Kel. 17:7, Bil. 20:13 Tempo'nyo belemiu sinusa'mo, belemiu notataemo mae nongkakase,
sahingga aku nomposalamatmo belemiu.
I uno nu gohung pipinaninsulukanku tinaamankumo mae na belemiu,
inguji'kumo na belemiu i mata nu uee Meriba.
9Potombihing mae na pokinde'ku o, belemiu mian anu palesayamo hi belengku,
O, Israel, de belemiu mongka'oho' mohongo Aku!
10 #
Kel. 20:2-3, Ul. 5:6-7 Boli ko anu atina' hi belemiu daagi' ko anu palesaya hi pilogot sangga'at,
boli monsombah pilogot nu aha mian anu i salipu'an.
11Akumo na Tumpu nu belemiu,
anu nolaya'mo mae belemiu nosabat lengkat mae i Mesir.
Tempo'nyo belemiu no'ohopmo kalana madi'mo ko anu okaan, binee'an-Kumo anu okaan na belemiu.
12Panyo mian anu palesayamo hi belengku, madi'mo mohongo-hongo aku.
Israel madi'mo tinulu-tulutan hi belengku.
13Kalana aijo' pinojoho-Kumo na aha da pinanggagamo,
bakasmo na aha da mombatukimo posi pongka'oho' nu aha.
14Ha, de maluannyo mian anu palesayamo hi belengku mohongo-hongomo aku,
de maluannyo aha tulu-tulutanmo hi belengku,
15saba' aku sampamo lia-lia' mompatundu' sampobali' nu aha,
ka' mompokalahmo iwi-iwi' na anu mongewa aha.
16Mian anu mongka'ideki mae aku, ku patundu'mo,
aha mohumpakmo hukuman sampe toka sidu-sidutu'.
17Panyo mian anu palesayamo hi belengku, Ku bee'i mongkaan gandum anu pinile'anmo,
ka' Ku pobosumo nu juu' nu uani' anu o sunu i uno nu alas.”
Currently Selected:
MAZMUR 81: LAILOE
Highlight
Copy
Compare
Share
Want to have your highlights saved across all your devices? Sign up or sign in
