MAZMUR 73
73
KITAB KO TOTOLU'NYO
73–89
Ka'adilan nu Tumpu
1Mazmur i Asaf.
Manonong hondo na Tumpu Allah hi mian anu palesayamo hi Ia,
ka' mule' hi mian anu kinyonyoanyo hodi'.
2Panyo no banga'mo na pikilanku
me ise-ise' aku madi'mo pinalesaya hi Tumpu,
3kalana aku nongka'idekimo mian anu saja' takabun,
salatan aku nontoamo mian anu ma'idek na kinyonyoanyo nohumpakmo dale'.
4Kalana aha madi' nongoa'i lanit,
butong nu aha mahoson ka' mule' madi' panyakiton.
5Aha madi' nongoa'i kasusa'an
madi' tinokan mae nu balaa' susumo mian sangga'at.
6Kalana aijo' aha binuulonmo,
ka' saja' singgi na mompalentah.
7Kiijo' i uno nu kinyonyoa nu aha tombulokmo maena kalakuan anu ma'idek,
aha saja' mompopikilakon tanga'an anu toto ide-idek.
8Aha lewa' mongalu ka' mule' lewa' mompobau-bau anu madi' totu'u,
ka' ko bubuunmo, motombuhuk kalana kahanda'mo mompakisa.
9Aha mompisala'imo Tumpu kiita' i suluga'
ka' lewa' monsisik anu madi' totu'u hi to mia-mian anu i dunia aiya,
10sahingga suele mian anu palesayamo hi Tumpu montulutimo aha,
ka' mule' palesayamo hi sisik nu aha.
11Aha notatae, “Tumpu madi' monsumbu',
Anu Matangkas na Kuasanyo madi' mangalati'”
12Sumo aijo'mo na kalakuan nu mian anu ma'idek na kinyonyoanyo;
kantumuu'an nu aha tenda, halata' nu aha ko pintu-pintuangnyomo.
13Ola palansuma' na aku monjagai kinyonyoangku da belesi';
madi' kogunanyo na aku mompimpali dosa'.
14Kalana sansina-sinaa aku saja' nu tokai mae nu balaa';
de subu-subumo aku osakisamo.
15De aku motataemo sumo aijo',
aku nombaumo anu madi' ma'ima' hi to ana-anak lee' nu belemiu.
16Panyo tempo'nyo aku binala'usahamo da kusumbu' na han aijo'
aijo' talalo hondo mahan hi belengku.
17Ahennyo aku ninsoopmo i Laigan nu Tumpu
lantas aku nangalati'mo mosia na kantumuu'an nu mian anu ma'idek
na kinyonyoanyo saidi' mae imihinyo.
18Pinojoongmo nu Belento na aha i jalan anu malondo,
ka' pinojohokmo nu Belento na aha da silakamo.
19Ola sinangkinihap aha sinilakamo
talalo ahi' okabuhuk na kina'ahenannyo nu aha,
20Susumo anu ingipi subu-subu mae okolilimimo
salatan Belento nobungkutmo, o, Tumpu aha mule' suele madi'mo tinoa-toa.
21Salatan aku nompele-pele'mo
ka' kinyonyoangku sumomo anu sinusuk,
22aku pinonga'mo ka' madi'mo nangalati'
aku sumomo binatang i ahop nu Belento.
23Panyo aku na sabole-boleh ahi' saja' koko hi Belento
Belento na nontoongimo mae limangku koanan.
24Belento na lewa'mo nolaya aku nu pokinde'
ka' saidi' mae nu talima na aku nu kaholomatan.
25Ihe na anungku kiita' i suluga', olamo ahi' samata-mata Belento?
Madi' ko anu ku ka'ima'i sangga'at i dunia aiya, olamo ahi' samata-mata Belento.
26Maumo ahi' santuu'ku ka' butongku madi'mo moko ala mombau apa-apaa,
Belento na timbali bau kahosonanku, o, Tumpu;
Belento na anu talalo ku taha'imani
sampe toka sidu-sidutu' molingkudui iwi-iwi' apaa na anu daagi' hi belengku.
27Mian anu mompala'i Belento mohumpak kasilaka'an,
nu silakai nu Belento na mian anu madi' tulu-tulutan hi Belento.
28Panyo de belengku na totu-totu'u ahi' ma'ima' hondo na jojoong koko hi Tumpu.
Tumpu na ku bau tampat pihohunganku
da aku moko ala mombebakon iwi-iwi' apaa na anu binau-Nyomo.
Currently Selected:
MAZMUR 73: LAILOE
Highlight
Copy
Compare
Share
Want to have your highlights saved across all your devices? Sign up or sign in
