MAZMUR 72
72
Bau pondo'akon tomundo
1Do'a i Salomo.
O, Tumpu, pogulu'akon mae na atulan nu Belento hi tomundo,
bee'iakon ka'adilan nu Belento hi anak mo'ane nu tomundo.
2O'amalakon da ia momputusi apa-apaa hi mian anu palesayamo hi Belento obatuki hondo-hondo na atulan,
ka' mompokona kaputusan opo adin ahi', hi mian anu sinakisamo.
3De timbali da lipu' mami mohumpakmo ka'ima'an ka' kantumuu'an anu sanang,
ka' daagi' ko ka'adilan hi songko-songko na bansa.
4O'amalakon da i tomundo' montinjohi hak nu mian anu nu palentah,
montulungi to mia-mian anu kasiasi ka' mompatei anu lewa' monsakisa aha.
5O'amalakon da ia tataap mompalentah sidu-sidutu' nupolundu-lunduakon i tulunan sa'angu' toka i tulunan sa'angu'
sapinnyo daagi' ko batu nu sinaa ka' daagi' ko bitu'on.
6O'amalakon da ia sumomo ujan anu tudun i padang anu mateges,
sumomo ujan daka' anu nongueeimo iwi-iwi na ale'.
7O'amalakon da ka'adilan sabole-boleh obau kopinnyo ia mompalentah,
ka' kasanangan nu kantumuu'an boli kokakulangannyo kopinnyo daagi' ko bitu'on.
8 #
Za. 9:10
Kalaja'annyo mompaka pintuangmo lengkat mae i ambai santoanyo toka-toka i ambai santoanyo mule',
ko ewanyo lengkat mae i sasu kabete'an toka-toka i sasu kinsoban.
9Mian anu monjojoongi i padang tampat anu mateges matundu'mo hi ia
ka' anu monsampobali ia tolodadupumo i ahop nu tengkenyo.
10To tomu-tomundo' nu aha Tarsis ka' iwi-iwi' na togong momboamo hi ia palasombahan.
To tomu-tomundo' nu aha Arab ka' Etiopia
tokamo momboa mae pombayan hasin.
11Iwi-iwi' na to tomu-tomundo' tolodadupumo i ahopnyo,
iwi-iwi' na bansa baumo posaihonnyo.
12Kalana ia nompobebasmo anu lewa' osakisa anu madi'mo, moko ala mombau apa-apaa,
ka' mian anu kinasiasimo anu nomoitamo tulung hi ia.
13Ia mongkalibosi mian anu kinasiasimo ka' mian anu nu palentah,
ka' momposalamatmo kantumuu'an nu mian anu talalomo hondo kinasiasi.
14Ia mompobebasmo aha da madi'mo lewa' obee'i kasansalan ka' anu saja' opalentah, nusinggi,
kalana kantumuu'an nu aha ko angga'nyo hondo hi ia.
15Higahiakon na i tomundo salaku mian daka'!
O'amalakon da nusombahkon mae nu aha Arab hi ia na mosoni'.
O'amalakon da ia saja' odo'akon sansina-sinaa
ka' mule' saja' mohumpak balakat.
16O'amalakon da gandum saja' sida hondo ka' madi' kokamingkotannyo i songko-songko na lipu',
ka' iwi-iwi' na puge'nyo kahomo anu mingguna na hasinnyo.
O'amalakon da tano'nyo ma'omuk susumo Bungkutnyo nu Libanon,
ka' anu monjojoongi kota'nyo ko pintu-pintuangnyomo sumomo hemput i tampat padang anu ewa.
17O'amalakon da sanggo i tomundo saja' o inau' sampe toka sidu-sidutu',
ka' mompaka togilele na sanggonyo kopinnyo daagi' ko batu nu sinaa.
O'amalakon da tobansa-bansa mongkakase hi Tumpu da obalakati susumo ia,
ka' iwi-iwi' na mian montaloakonmo ia, tukoonyo nu aha ia nohumpakmo ka'ima'an.
18Opuji' na Tumpu, Tumpu nu aha Israel!
Ola Ia na timbali mombau han anu okabangangi.
19Opuji' na sanggo-Nyo anu talasanggo sampe toka sidu-sidutu';
o'amalakon da songko-songko na dunia mobuke nu anu mompotalasanggo Ia!
Jadimo mae sumo uuka, Amin!
20Sumo uuka na do'a i Daud, anak i Isai.
Currently Selected:
MAZMUR 72: LAILOE
Highlight
Copy
Compare
Share
Want to have your highlights saved across all your devices? Sign up or sign in
