MAZMUR 71
71
Do'a nu mian anu langkai'mo hondo ka' binengkele'mo hondo
1Hi Belentomo na bau pihohunganku, o Tumpu,
boli opojohok na aku opopo'ambang.
2Pobebasmo mae na aku, kalana Belento adin,
potombihingakon mae na aku ka' posalamatakon mae na aku.
3Potimbalimo mae susumo bungkutnyo nu batu na belento da bau pihohunganku,
anu dengke, na saja' ku poko ala ku sahak.
Kalana Belento nontantukanmo momposalamat aku,
Belentomo na bau pihohunganku ka' pingkonganku.
4O, Tumpu-ngku potumuu'akon mae na aku da madi' nusilakai nu mian anu ma'idek na kinonyoanyo,
i kuasa nu to mia-mian anu uesan ka' buhingison.
5Kalana Belentomo na anu ku taha'imani o, Tumpu,
o, Tumpu, aku pinalesayamo hi Belento salatanmo pe'e aku daagi' olitau.
6Sumo uukamo na kinopinno na aku tinumuu', aku ola saja' maninseha hi Belento;
Belento nonjagaimo mae aku salatanmo pe'e aku i hampe, sahingga aku saja' mompuji' Belento.
7Kantumuu'anku baumo sonto hi mian da'isan,
kalana Belentomo na anu mahoson monjagai mae aku.
8Aku saja'mo, mompuji' Belento,
sansina-sinaa ku bebakon na katalasanggoan nu Belento.
9Boli ola aku nu'alin nu Belento de aku langkai'mo kabai Bengkele'mo,
boli opala'i na aku de aku madi'mo mahoson,
10kalana iwi-iwi' na anu monsampobali' mae aku mombisalakonmo aku,
to mia-mian anu kahanda'mo monsilakai mae aku nosa'angu'mo.
11Koonyo nu aha, “Ia pinala'ianmo nu Tumpu;
imbo' da otuloi'to ka' ohakop to na ia,
kalana madi'mo ko anu momposalamat ia.”
12Boli Belento majo'on aiya hi belengku, o, Tumpu Allah,
o, Tumpungku sampamo mae tulungi na aku.
13Bakas da mian anu montumbuhi mae aku
opopo'ambangmo ka' osilakaimo.
Bakas da mian anu kahanda'mo, monsilakai mae aku,
bingongmo ka' mongoa'imo ma'ambang.
14Panyo aku na saja' ahi' montaha'imani Belento,
ka' lebe saja'mo ahi' mompuji' Belento.
15Sansina-sinaa ku sisikakon
apa-apaa na palabuatan nu Belento anu adin,
ka' kasalamatan anu lengkat mae hi anu madi'-Mo opoko ala obilang.
16Ku puji' na palabuatan nu Belento anu daka' hondo o Tumpu Allah,
ku bebakon momoya na ka'adilan nu Belento,
ola ka'adilan nu Belento.
17O Tumpu, Belento nompokinde'imo mae aku salatanmo pe'e ma'isa i langkai' ka' binegkele',
sangkut uuka aiya ku sisikakon na kalaja nu Belento anu okabangangi hondo.
18O Tumpu, boli opala'i na aku,
sangkut aku langkai'mo ka' bengkele'mo ka' uanonmo,
da kabaanian ka' kuasa nu Belento ku bebakon,
hi iwi-iwi' na tulunan anu aiya mae i ahop.
19O Tumpu, ka'adilan nu Belento matangkas hondo sumo langit;
daka' hondo na hahan anu binaumo nu Belento;
ihe na moko ala mompokakanai Belento?
20Belento nombee'imo mae aku manjoo' hondo na kasansala'an anu toto boa-boat,
panyo Belento po'ule' mae mombee'i aku kahosonan ka' po'ule' mompotumuu' aku anu i lamunmo.
21Belento po'ule'mo mompotimbali aku da lebe oholomati,
ka' po'ule' mule' momposanang kinyonyoangku.
22Aku mompuji'mo Belento okuti'akon gambuus,
kalana Belento manonong, o, Tumpungku.
Aku monyanyiakonmo anu bau pompuji' Belento okuti'akon kasapi',
o, Tumpu susi' na Israel.
23Aku nontaligalai kalana sinanangmo hondo na kinyonyoa,
ka' nonyanyiakonmo bau pompuji' Belento.
Santuu'ku ka' butongku manyanyi lame'mo hondo,
kalana Belento nomposalamatmo mae aku.
24Sansina-sinaa ku bebakon na ka'adilan nu Belento,
kalana to mia-mian anu kahanda'mo monsilakai mae aku
pinatundu'moka' pinopo'ambangmo.
Currently Selected:
MAZMUR 71: LAILOE
Highlight
Copy
Compare
Share
Want to have your highlights saved across all your devices? Sign up or sign in
