MAZMUR 66
66
Nyanyian bau pompuji' ka' pontalima kaseh
1Anu mongkapalai panyanyi. Sa'angu' na nyanyian.
Taligalai lame-lame' na Tumpu, o, belemiu mian anu jojoong i songko-songko na dunia!
2Panyanyimo ka' popodaka' na sanggo-Nyo,
oholomati na Ia nu nyanyian anu bau pompuji-puji'.
3Taloakon hi Tumpu,
“Totu-totu'u okabangangi hondo na anu binaumo nu Belento!
Anu monsampobali' tinundu'mo hi Belento ka' talalomo hondo nabuhuk
kalana daka' hondo na kakuasa'an nu Belento.
4Songko-songko na dunia tinolodupumo nonsombah Belento,
aha nanyanyimo nompuji' sanggo nu Belento.”
5Tokamo mae ka' tonto'i apaa na anu binaumo nu Tumpu,
totu-totu'u okabangangi hondo na anu binaunyomo iwi-iwi' hi aha mian!
6 #
Kel. 14:21, Yos. 3:14-17 Ambai ingabali'-Nyo tinimbali tano' anu kinantisanmo,
mompolee' mami notaapmo nokiijo' i santoanyo i lumajang tengke.
Sahingga kami i lame'mo kalana palabuatan-Nyo.
7Ia baani hondo na mompalentah ka' kopinnyo,
sampe toka sidu-sidutu'.
Iwi-iwi' na bansa nujagai nu Tumpu,
da anu lewa' mombau gau' ma'idek madi' timbali ko bubuun hi Ia.
8Opuji' na Tumpu mami, o, to bansa-bansa,
loobo'akon daka-daka' na belemiu mompuji' Ia!
9Ia nonjagaimo mae kami da sabole-bole tumuu',
ka' madi' mompojohok kami da silaka.
10O, Tumpu Belento nonguji'mo mae kami
susumo mian anu nonsuangmo tambaga i apu da osumbu'
na tambaga aijo' pa' totu-totu'u madi' ko galo'nyo.
11Pinojohokmo nu Belento na kami da kinonamo nu so'o,
ka' binee'anmo nu Belento kalaja na kami anu maboat hondo.
12Pinojohokmo nu Belento na kami da pinahampeja'akonmo nu anu monsampobali' mae kami;
kami so'mo nontului iyaba' ka' apu.
Panyo uuka aiya kami binoamo mae nu Belento
i tampat anu manjoo' hondo na hasinnyo ohumpak i kiijo'.
13Aku momboamo i laigan nu Belento koloban anu opotunu
ka' ku ganapimo na anu jinanji'kumo hi Belento.
14janji' anu tinaloakonkumo
tempo'nyo aku tinokanmo nu kasusa'an.
15Ku sombahkonmo hi Belento
na koloban anu opotunu, anu pinile'ankumo na binatang, aijo'mo,
mee', domba ka' sapi' lakinyo,
tibuknyo mintotonjomo mokiita' i langit.
16Tokamo mae ka' potombihingmo, o, belemiu iwi-iwi' mian anu tulu-tulutan,
da ku sisikakonje hi belemiu na anu binaumo nu Tumpu hi belengku.
17Aku nongkakasemo nomoita tulung hi bele-Nyo;
uuka aiya ku nyanyimo na bau pompuji' Ia.
18De bisuannyo aku sanang na mompotutugakon kalakuan anu ma'idek,
tantumo Tumpu madi' mompotombihing mae.
19Panyo Tumpu nompotombihingmo mae aku,
Ia nonsetujuimo apaa na anu kinakase'kumo.
20Aku mompuji'mo Tumpu Allah kalana Ia nombee'imo mae apaa na anu pinoitangkumo i do'angku,
ka' madi' kokamingkotannyo na mongkalibosi mae aku.
Currently Selected:
MAZMUR 66: LAILOE
Highlight
Copy
Compare
Share
Want to have your highlights saved across all your devices? Sign up or sign in
