MAZMUR 64
64
Do'a mongkakase da ojagai mae
1Anu mongkapalai panyanyi. Mazmur i Daud.
2O, Tumpu potombihingakon mae na do'angku de aku susa'mo,
posalamatakon mae na nyawangku da boli nusilakai mae nu anu monsampobali' mae ka' anu saja' mompobuhuk mae.
3Jagaiakon mae na aku da boli nusilakai mae nu anu lewa' basangaja' mombau anu palaganta,
ka' mule' tanga'an nu to mia-mian anu pande hondo na mongakali ka' saja' mombau anu ma'idek.
4Nu potimbalimo na jila' nu aha matajom susumo bajak,
ka' montaeakonmo potatae nu aha anu laloasa hondo susumo pana'.
5I tampat paninsulukan nu aha, nubebakonmo mae nu aha na sisi-sisik anu madi' totu'u,
aha madi' mabuhuk na lewa' mompobau-bau mian anu madi' ko sala'nyo.
6Aha jinunjuhi'mo i tanga'an nu aha anu ma'idek hondo,
ka' basale'mo da mompokonamo so'o;
koonyo nu aha madi' koanu montoa.
7Aha montanga'imo mombau anu ma'idek, ka' montaloakonmo,
“Kami batanga'mo mombau kapandean anu mongakali.”
Kinyonyoa ka' pikilan nu aha manusia, maleeng hondo
madi' opoko luntok.
8Panyo nupana'akonmo nu Tumpu na pana'-Nyo mokiijo' hi aha,
ka' monti-montiik ahi' aha belaonmo.
9Aha silakamo kalana potatae nu aha na monsaduakon;
iwi-iwi' na anu montoa kino bilok-bilokmo.
10Lantas iwi-iwi' na mian mabuhukmo;
aha mompotutugakonmo apaa na anu binaumo nu Tumpu
ka' mombebakonmo apaa na anu binau-Nyomo.
11Sahingga iwi-iwi' na mian anu ma'ima' na kinyonyoanyo lame'mo,
kalana nontoamo apaa na anu kinalaja'nyomo nu Tumpu.
Aha mihohungmo hi Ia;
iwi-iwi' na mian anu hodi' na kinyonyoanyo binilahimo.
Currently Selected:
MAZMUR 64: LAILOE
Highlight
Copy
Compare
Share
Want to have your highlights saved across all your devices? Sign up or sign in
