MAZMUR 59
59
Do'a mongkakase da ojagai mae
1 #
1Sam. 19:11
Anu mongkapalai panyanyi. Ingala i lagu nu nyanyian: Boli mompatei. Mazmur i Daud; tempo'nyo i Saul nompokaumo mian namba nondoyoni laigannyo da opateimo na ia.
2O, Tumpu-ngku, posalamatakon mae na aku da madi' nupatei nu to mia-mian anu monsampobali' mae aku,
jagaiakon mae na aku da madi' nusilakai mae nu to mia-mian anu montumbuhimo mae aku.
3Polapasakon mae na aku da madi' nusilakai mae nu to mia-mian anu ma'idek na kinyonyoanyo,
potumuu'akon mae na aku da madi' nusilakai nu to mia-mian anu lewa' mompatei.
4Soba toa, na aha nolambanimo mae kahanda'mo mae monsilakai aku,
to mia-mian anu toto buhingison nosa'angu'mo mongewamo mae aku;
padahan misa' kalana aku nombaumo dosa'
kabai nombaumo anu madi' o akui mae, o Tumpu.
5Misa' mule' kalana kasala'anku
aha kinosia-sia'mo mae ka' mogogou mae.
6Tinjomo mae, o, Tumpu Anu Matangkas na Kuasa-Nyo, tulungimo mae na aku.
O, Tumpu Israel, sakisiakonmo mae.
Pobungkutmo mae, ka' hukumo na to bansa-bansa,
bolimo mongkalibosi mian anu ma'idek na kinyonyoanyo anu saja' mombau ka'idekan.
7De malomo aha minsusule'mo,
mohu'akonmo mae susumo dedeng ka' montikubimo mae kota.
8Aha me saja' mompobau-bau ka'mongalu mae
potatae nu aha matajom hondo sumomo ahi' bajak,
nusangka nu aha madi' ko anu mohongo.
9Panyo Belento mongkokojoi aha, o, Tumpu,
iwi-iwi' na bansa haha aijo' nu alu nu Belento.
10Belentomo na timbali bau kahosonanku, olamo Belento na anu ku taha'imani,
Belentomo na tampat popalaianku o, Tumpu.
11Kalana Tumpungku manonong Ia tinokamo mae hi belengku,
pinobakasnyomo na aku montoa anu monsampobali' mae aku Nupatundu'mo.
12Boli osilakai na aha o, Tumpu,
da bansangku boli mongkolilimi,
ola ahi' aha bolimo oposa'angu' ka' opatundu'mo na aha nu kuasa nu Belento,
o, Tumpu anu non jagaimo mae kami.
13Kalana aha binaladosa'mo nu potatae nu aha;
bakasmo da aha nukonamo nu katabuulan nu aha,
kalana aha mongka'ima'i lewa' montotobi'akon ka' mombaleko'i.
14Silakaimo na aha kalana nonsaduakonmo da Belento notambuha'mo, o, Tumpu,
silakaimo na aha iwi-iwi' bolimo ko anu mompotumuu'.
Sahingga batu-batu mian monsumbu'je taalu' Tumpu na mompalentah nu Israel,
ka' Ia mompalentah songko-songko na dunia.
15De malomo aha minsusule'mo mae
mohu'akonmo mae susumo dedeng ka' montikubimo mae kota'.
16Aha mamba momoya molio anu okaan,
ka' mintaumo de madi'mo mobosu.
17Panyo aku monyanyiakonmo kahosonan nu Belento;
de subu-subumo aku manyanyimo hoso-hoson,
monginau kalibosan ka' kanonongan nu Belento.
Kalana Belentomo na tampat popalaianku,
tampat pihohunganku de susa'mo.
18O, Tumpu, kahosonanku, ku nyanyimo na nyanyian bau pompuji'-puji' Belento,
kalana Belentomo na tampat pihohunganku,
o, Tumpu anu ku kalibosi.
Currently Selected:
MAZMUR 59: LAILOE
Highlight
Copy
Compare
Share
Want to have your highlights saved across all your devices? Sign up or sign in
