MAZMUR 145
145
Nyanyian bau Pompuji'
1Bau pompuji' lengkat hi i Daud.
Aku mompopodaka'mo Belento, o, Tumpungku ka' Tomundo'ku,
ka' mompuji'mo Belento sampe toka sidu-sidutu'.
2Sansina-sinaa aku montalima kasemo hi Belento,
ka' mompopodaka'mo Belento sampe toka sidu-sidutu'.
3Kalana Tumpu talasanggo ka' talalo hondo opuji',
katalasanggoan-Nyo madi' opoko ala okiop.
4Molundu-lundu na tulunan nu mian mompuji'mo apaa na anu binaumo nu Belento,
ka' mombebaakonmo kabaanian nu Belento.
5Aha mompolelemo katalasanggoan ka' kaholomatan nu Belento,
palabuatan nu belento oka-okabangangi, lewa'mo ku potutugakon.
6Aha mombebakonmo palabuatan nu Belento anu talalo hondo okabuhuk
kakuasa'an anu daka' hondo nu Belento kubebakonmo.
7Mian monsisikmo iwi-iwi' kanonongan nu Belento,
ka' monyanyiakonmo ka'adilan nu Belento.
8Tumpu aijo' pangkalibosi ka' pangkanonongi,
madi' sampa motambuha' ka' saja' mongkalibosi.
9Ia manonong hi batu-batu mian,
ka' nukalibosi iwi-iwi' apaa na anu pinotimbali-Nyomo.
10Iwi-iwi' na anu pinotimbalimo nu Belento mompuji'mo Belento, o, Tumpu,
iwi-iwi' na anu pinalesayamo hi Belento montalima kasemo hi Belento.
11Aha mompopodaka'mo kuasa nu Belento salaku Tomundo',
ka' monsisikmo kabaanian nu Belento.
12Da nusumbu' nu mian iwi-iwi' na palabuatan nu Belento anu daka' hondo,
ka' kalaja'an nu Belento anu talasanggo hondo ka' talapuji' hondo.
13Kapalentahan nu Belento sampe toka sidu-sidutu',
kakuasa'an nu Belento tataap sampe molundu-lundu na tulunan.
Tumpu saja' mongganapi iwi-iwi' apaa na anu jinanji'-Nyomo,
Ia talalo hondo mongkalibosi iwi-iwi' apaa na anu binau-Nyomo.
14Tumpu montulungi mian anu i uno nu kasusa'an,
Ia montinjohi mian anu madi' panggaga.
15Iwi-iwi' na anu ko nyawanyo montaha'imani Belento;
Obee'i nu Belento mongkaan na aha de tempo'nyomo nu pongkaanan.
16Oganapi nu Belento iwi-iwi' na kapalaluan nu aha,
sahingga aha madi' kakulangan.
17Tumpu adin hondo i han iwi-iwi' apaa na anu Nu bau
ka' talalo hondo nu kalibosi apaa na anu binau-Nyomo.
18Ia ohani hi mian anu mongkakase hi Ia,
ka' mongkakase hi Ia tiba kinyonyoa anu madi' tageo'.
19Ia momposanang kinyonyoa nu to mia-mian anu tulu-tulutan;
Ia mompotombihing apaa na nu kakase nu aha ka' momposalamatmo aha.
20Ia monjagai batu-batu mian anu mongka'ima'i,
panyo anu ma'idek na kinyonyoa-Nyo nu patei.
21Aku saja'mo mompuji' Tumpu,
O'amalakon da anu-Nyo iwi-iwi' apaa na anu ko nyawanyo
mompuji'mo sanggo nu Tumpu
sampe toka sidu-sidutu'.
Currently Selected:
MAZMUR 145: LAILOE
Highlight
Copy
Compare
Share
Want to have your highlights saved across all your devices? Sign up or sign in
