MAZMUR 139
139
Tumpu talalo hondo monsumbu' ka' anu nompotuu'mo sinin na apaa
1Anu mongkapalai panyanyi. Mazmur i Daud.
O Tumpu, Belento mompangalati'i aku
ka' monsumbu' aku.
2Belento na monsumbu'mo iwi-iwi' apaa na anu binaungkumo;
maumo majo'on na Belento panyo monsumbu' pikilanku.
3Belento montoa aku
maumo aku mokalaja kabai milawe,
Belento monsumbu' iwi-iwi' apaa na anu binaungkumo.
4Aitu pe'e ma'isa aku motatae,
Belento nonsumbu'mo apaa na anu kahanda' ku taloakon.
5Belento nontiikubimo mae aku, titiikup,
ka' jinaganmo mae na aku nu kuasa nu Belento.
6Talalo hondo maleeng na ilimu' nu Belento aijo',
madi'mo nupoko tokai nu pikilanku.
7Moya na aku mamba da madi' nukona nu kuasa nu Belento?
Moya na popalaianku da majo'on i ahop nu Belento?
8De aku moliba' i langit, Belento kiita' mae
de aku hoyot i dunia nu anu sinilakamo kiijo' suele daagi' ko Belento.
9De aku lumap motulu i sasu kabete'an
kabai jojoong kiijo' mae i pus nu sasu kinsoban anu majo'on hondo,
10kiijo' mae suele Belento montulungi aku;
kiijo' mae suele na lima nu Belento molaya' aku.
11De ku poita da pintung mongkukumbungi aku,
ka' jingka anu titiikup hi belengku malomo,
12saba' pintung aijo' madi' ahi' mompintungi Belento;
malom aijo' majingkamo susumo sinaa,
ka' pintung aijo' susumo jingka.
13Belento na nompotimbali toto sa'angu' na bagian nu butongku,
ka' nontali'mo aku i uno nu ma'alum nu tinangku.
14Ku puji' na Belento kalana aku talalo ahi' ma'ima'!
Iwi-iwi' na anu binaumo nu Belento okahelani ka' talalo ahi' okabangangi,
totu-totu'u ku sumbu' na han aijo'.
15Salatan bungkungku iwi-iwi' pinotimbalimo,
pinokopiananmo na nompoguntang i ma'alum nu tinangku,
panyo no'insu'mo ikiijo' madi' ku sumbu-sumbu',
aku madi' sulu-sulu' sahingga madi' nutoa nu Belento.
16Nutoa nu Belento na aku tempo'nyo aku daagi' kandu-kandung hitinangku,
iwi-iwi' tinulismo i uno nu kitab nu Belento;
iwi-iwi' na sinaa polo'mo tinantukan mau ma'isa pe'e
ko anumo sa'angu' na tinampu'unankumo pinotimbali.
17Talalo hondo susa' na aku monsumbu' pikilan nu Belento, O, Tumpu,
ka' talalo hondo manjoo' na ngangahannyo!
18De ku bilang, lebe manjoo' molingkudui bone';
de aku mobulamo, daagi' sabole-boleh ahi' ku potutugakon na Belento.
19De timbali da mian anu ma'idek na kinyonyoanyo nupateimo nu Belento, O, Tumpu,
pojo'onakon mae hi belengku na to mia-mian anu lewa' mombubusakon baso'!
20Aha lewa' mompobau-bau han anu ma'idek mongkona Belento
ka' lewa' monsumpa'akon anu madi' totu'u mongkona iwi-iwi' na kota' nu Belento.
21O, Tumpu, ku ka'ideki na mian anu mongka'ideki Belento,
kinyonyoangku nompele-pele'mo hi mian anu panggaga hi Belento!
22Aha talalo hondo ku ka'ideki,
ka' ku anggapmo salaku sampobali'.
23Selidiki mae na aku o, Tumpu, ka' palesa mae na kinyonyoangku,
uji' mae na aku ka' sumbu' mae na pikilanku.
24Toa mae pa' ko anu ma'idek i uno nu butongku,
ka' laya' mae na aku i jalan anu sampe toka sidu-sidutu'.
Currently Selected:
MAZMUR 139: LAILOE
Highlight
Copy
Compare
Share
Want to have your highlights saved across all your devices? Sign up or sign in
