MAZMUR 107
107
KITAB KO OLIMA'NYO
107–150
Opuji' na kanonongan nu Tumpu
1 #
1Taw. 16:34, 2Taw. 5:13, 7:3, Ezr. 3:11, Mzm. 100:4-5, 106:1, 118:1, 136:1, Yes. 33:11 “Montalima kaseh hi Tumpu kalana Ia manonong,
kalibosan-Nyo sampe toka sidu-sidutu'.”
2Saja' opo uli-ulit na montaloakon aijo',
o belemiu anu nongoa'imo kasusa'an panyo pinosalamatmo.
3Belemiu anu jinojoongmo i tano' nu mian pinosihuk-Nyomo lengkat i to kampu-kampung anu isalipu'an,
lengkat mae i kabete'an ka' i kinsoban, utara ka' salatan.
4Daagi' ko anu lewa'mo namba momoya i tampat padang anu mateges,
ka' madi'mo nonsumbu' jalan mamba i kota' da bau kajojoongan.
5Aha no'ohopmo ka' negotmo
ka' madi'mo ko anu otaha'imani.
6I uno nu kasusa'an aha nongkakasemo hi Tumpu,
ka' Ia nompobebasmo aha da madi'mo mongoa'i kasansala'an.
7Ia nolaya'mo aha da nontulumo jalan anu hodi'
nambamo i kota' da bau kajojoongan.
8Pantasmo na aha montalima kaseh hi Tumpu kalana kalibosanNyo,
kalana apa-apaa na anu binau-Nyomo, anu mompobangang hondo manusia.
9Kalana Ia nompopuasmo mian anu i negotmo,
ka' nombee'i molabi-labi mian anu no'ohopmo
nu iwi-iwi' na anu ma'ima'.
10Daagi' ko anu pinosoopmo i uno nu kapintungan,
mian anu tinalungku'mo nongoa'imo kasansala'an kalana pinungumo nu lante' besak,
11kalana aha notomuhukmo hi Tumpu
ka' madi'mo nompajuli palentah nu Anu Matangkas na Kuasanyo
12Ia nomposusa'mo kinyonyoa nu aha kalana binee'anmo kalaja anu maboat;
aha notua'mo ka' madi'mo ko anu notulungi.
13Aha i uno nu kasusa'an nomoitamo tulung hi Tumpu,
ka' Ia nompobebasmo aha da madi'mo mongoa'i kasansala'an.
14Aha i uno nu pikat, sinabatakon-Nyomo,
ka' nombotu'akonmo lante' besak anu pinompungu aha.
15Pantasmo na aha montalima kaseh hi Tumpu kalana kalibosan-Nyo,
kalana apa-apaa na anu binau-Nyomo anu mompobangang hondo manusia.
16Kalana i hobo'akon-Nyomo iwi-iwi' na tumban tambaga,
ka' nohansuhimo iwi-iwi' na besak, anu binau ponsupati.
17Daagi' ko anu ponga' ka' nongoa'imo kasansala'an, kalana to dosa-dosa' nu aha,
ka' pinosakisamo kalana kasala'an nu aha.
18Aha bubunmo nongoa'i iwi-iwi na anu okaan,
ukun nu aha silaka, ohanimo.
19I uno nu kasusa'an, aha nomoitamo tulung hi Tumpu,
ka' Ia nompobebasmo aha da madi'mo mongoa'i sakisa.
20Ia nompa'alinmo aha ola pinalentah-Nyo,
ka' nompolapasmo aha da boli minsoop i bolo nu kubun.
21Pantasmo na aha montalima kaseh hi Tumpu kalana kalibosan-Nyo,
kalana apa-apaa na anu binau-Nyomo anu nompobangang hondo manusia.
22Sahanyo aha montalima kaseh ka' momboa anu osombahkon,
ka' mule' mombebakon apa-apaa na anu binau-Nyomo, olaguakon nu nyanyian anu bilahi.
23Daagi' mule' ko anu motulu i ambai sumake' kapan,
molio anu okaan i ambai anu ewa hondo.
24Aha nontoamo apa-apaa na anu binaumo nu Tumpu,
anu binau-Nyomo ka' okabangangi i ndalangon.
25Kalana palentah-Nyo tinobungmo na mombun makansang
ka' nompotimbalimo bokon toto daka-daka'.
26Iwi-iwi' na kapan i hangkatnyomo nokiita' i langa,
lantas i lumbu'akonnyomo nokaiyong i lananyo nu ndalangon.
To mia-mian madi'mo daagi' ko kabaanian na
mongahopi balaa' anu daka' hondo sumo aijo'.
27Aha pinusingmo ka' naha tinomba tombabihingmo
sumomo mian anu nalangumo ka' madi'mo ko anu nu sumbu-sumbu'.
28I uno nu kasusa'an aha nomoitamo tulung hi Tumpu,
ka' Ia nompobebasmo aha da madi'mo mongoa'i sakisa.
29Tambusisi' anu talalomo nakansang pinalentah-Nyomo da balentimo,
iwi-iwi' na bokon tinendamo.
30Aha sinanangmo kalana mombun mombun makansang tinomboliumo;
binoa-Nyomo na aha i palalabuan anu opanjolongi.
31Pantasmo na aha montalima kaseh hi Tumpu kalana kalibosan-Nyo,
kalana apa-apaa na anu binau-Nyomo anu mompobangang hondo manusia.
32Aha nombebakonmo katalasanggoan nu Tumpu hi bubu' aha mian anu palesayamo hi Ia,
ka' mompuji'mo Ia i palahimpunan nu to tu'a-tu'anyo.
33To kau-kaunyo ingabali'-Nyomo tampat padang anu mateges,
mata nu uee tinimbalimo tano' anu kinantisanmo.
34Tano' anu molumba' pinotimbali-Nyomo tampat padang anu napoyu'mo nu timuson,
kalana palabuatan ma'idek nu to mia-mian anu jinojoong ikiijo'.
35Tampat padang anu mateges pinotimbali-Nyomo talaga,
tano' anu motis pinotimbalimo mata nu uee.
36To mia-mian anu mo'ohop pinojoong-Nyomo kiijo' mae,
aha nombaumo kota' da bau kajojoongan nu aha.
37Aha nonsaumo bine' i ale' nu aha iwi-iwi' ka' nonsu'anmo anggur,
lantas nongalamo hasinnyo nanjoo' hondo.
38Tumpu nombalakatimo aha da nanjoo' na anak nu aha,
ka' binatang potuu'on nu aha nompaka panjoo'mo.
39Panyo aha pinatundu'mo ka' madi'mo nanjoo'
kalana kasansala'an ka' talalomo pinosakisa hondo.
40Tumpu nompatundu'mo anu mongkuasai aha,
ka' nompalentahmo aha lewa' namba i tampat padang anu mateges anu madi' ko jalannyo.
41Panyo mian anu kasissi pinobebas-Nyomo da aha madi'mo mongoa'i kasusa'an,
auan nu aha nompaka panjoo'mo sumomo gombuan nu domba.
42Mian anu hodi' na kinyonyoanyo montoa aha ka' lame'mo,
panyo anu ma'idek na kinyonyoanyo opomomo'mo.
43O'amalakon da mian anu pande mompotutugakon iwi-iwi' aijo'
ka' mongakui tukoonyo Tumpu sabole-boleh mongkalibosi.
Currently Selected:
MAZMUR 107: LAILOE
Highlight
Copy
Compare
Share
Want to have your highlights saved across all your devices? Sign up or sign in
