MAZMUR 105
105
Tumpu ka' mian anu palesayamo hi Ia
(1Taw. 16:8-22)
1Pontalima kasemo hi Tumpu, bebakon na kakuasa'an-Nyo anu daka' hondo,
sisikakon na palabuatan-Nyo hi to bansa-bansa.
2Onyanyi na nyanyian anu bau pompuji' Tumpu,
polele iwi-iwi' na anu binau-Nyomo, anu nompobangangmo mian.
3Iamo na Tumpu Anu Susi' hondo,
bilahimo mae kalana kita aiya Ia na Tumpunyo,
iwi-iwi' na anu monsombah Ia tionyo ahi' balame-lame'mo.
4Poita na kahosonan hi Ia,
saja' osombah na Ia.
5-6O, lee' mae i Abraham, posaihonnyo,
ka' lee' mae i Yakub, mian anu pinile'an-Nyomo,
boli okolilimi na anu binaunyomo iwi-iwi' apaa na anu nompobangangmo mian,
sabole-boleh o'inau' apaa na anu tinantu kan-Nyomo.
7Tumpu Aijo'mo na Tumpunto,
apaa na anu tinantukan-Nyomo aijo' opake i songko-songko na dunia.
8Ia madi' mongkolilimi apaa na anu jinanji'-Nyomo
anu jinanji'nyomo opake sampe toka sidu-sidutu'.
9 #
Kej. 12:7, 17:8, 26:3 Anu jinanji'-Nyomo aijo' binauNyo hi Abraham,
ka' lapas mae hi Ishakmo;
10 #
Kej. 28:13
lantas pinotatap hi Yakub da
timbali bau palajanjian toka sidu-sidutu hi mian nu Israel.
11Ia notataemo, “Tano' nu Kana'an Ku bee'mo hi beleyum
baumo pusaka' nu beleyum.”
12Naipuan mae mian anu palesayamo hi Tumpu tumuu' kiijo' mae ola susumo mian anu lengkat mae i salipu'an
konjoo'nyo nu aha ola sangkiding.
13Aha ola lewa' mamba molali-lalin lengkat mae hi bansa sangga'at mamba hi bansa sangga'at,
molalin lengkat i sa'angu' na lipu' mamba i lipu' sangga'at.
14 #
Kej. 20:3-7
Panyo Tumpu madi' ola mompojohok maumo pa' ihe na monsansala aha;
kalana monginau' aha, sahingga to tomu-tomundo pinokinde'annyomo,
15“Boli lewa' mamba mompoposia mian haha aijo' anu pinile'an-Kumo,
boli mombau anu ma'idek hi to nabi-nabi-ngKu!”
16 #
Kej. 41:53-57
Tumpu nompotokamo mae tempo' nu kakulangan i anu okaan i lipu' aijo',
ka' anu pinosadiamo na anu okaan iwi-iwi' ingalamo.
17 #
Kej. 37:28, 45:5 Panyo Tumpu nonsaimo samian namba momona,
lantas aha nambaje i mihi, aijo'mo i Yusuf, anu pinobalukmo susumo posaihon.
18 #
Kej. 39:20–40:23
Tengkenyo pinungumo nu lante' besak,
gogohongnyo pino'olo'anmo lante' besak.
19Ahennyo tinimbalimo na anu lewa' sinangka-sangkanyo jadi i butongnyo,
ia pinototu'umo nu potatae nu Tumpu.
20 #
Kej. 41:14
Lantas tomundo' nu Mesir, anu mongkuasai to bansa-bansa,
nonsabatakonmo ia i uno nu talungku'.
21 #
Kej. 41:39-41
Ia binee'anmo kalaja mongkalesang laigan nu tomundo',
ka' binee'anmo kuasa mongkuasai iwi-iwi' na halata'nyo i tomundo';
22ka' suele hak mongatun to mia-mian anu ko pangkatnyo mokalaja hi tomundo',
ka' mongatun aha to tu'a-tu'anyo.
23 #
Kej. 46:6, 47:11 Lantas i Yakub nambamo nokiijo' mae i Mesir,
ka' jinojoongmo ikiijo' mae salaku mian anu lengkat mae i salipu'an.
24 #
Kel. 1:7-14
Tumpu nompaka tuangimo da mian anu palesayamo hi ia mompaka panjoo'mo,
sahingga aha lebemo nahoson, i lingkuduanmo nu aha na mian anu mongewa aha.
25Ia nombali'imo kinyonyoa nu aha mian Mesir, sahingga nongka'idekimo mian anu palesayamo hi Ia,
ka' lewa'mo nongkabisa'i madi'mo hondo adin hi to posa-posaihonnyo.
26 #
Kel. 3:1–4:17
Lantas Ia nonsaimo i Musa posaihonnyo,
ka' i Harun mian anu pinile'an-Nyomo.
27Kiijo' mae i Mesir aha nombaumo hahan anu okabangangi,
hahan anu daka' hondo na binaumo nu Tumpu,
28 #
Kel. 10:21-23
ka' aha tulu-tulutan hondo hi palentah-Nyo.
Lantas Tumpu nompopikatmo lipu' aijo'.
29 #
Kel. 7:17-21
Kaunyo nu aha ingabali'-Nyomo susumo baso',
sahingga iwi-iwi' na ikannyo i natemo iwi-iwi'.
30 #
Kel. 8:1-6
Bahangkakak sinumosingka'mo i lipu' nu aha,
ka' suele nompinsoopimo laigan nu tomundo'.
31 #
Kel. 8:16-17, 8:20-24 Kalana pinalentahmo nu Tumpu Allah, lalo singkapmo tinoka
ka' iwi-iwi' na momot sinihukmo i songko-songko na lipu'.
32 #
Kel. 9:22-25
Ia nombuhensehakonmo mae eis binau pinombolosi ujan,
ka' pinotokamo mae na kilat anu pinojo-pojohonjitmo.
33Ia nontua'akonmo kau' anggur ka' kau' ara,
ka' nontua'akonmo iwi-iwi' na kau' nu aha.
34 #
Kel. 10:12-15
Kalana pinalentah-Nyomo sahingga tinokamo mae na kihi-kihi',
manjoo' hondo madi' opoko bilang na konjoo'nyo.
35Aha nongkaanmo iwi-iwi' na anu sinu'an i ale',
ka' kinaannyomo iwi-iwi' na isi nu ale'.
36 #
Kel. 12:29
Lantas sinilakannyomo na anak tumpe anu to momo'ane,
hi aha toto sangauwan na mian nu Mesir.
37 #
Kel. 12:33-36
Lapas aijo' bansa Israel sinabatakon-Nyomo ka' binoa-Nyomo
aha nomboa mosoni' ka' salaka;
iwi-iwi' na aha mahoson ka' madi' ko anu masakit.
38Mian nu Mesir nongkabuhukmo ha' nansihimo na bulu na montoa aha,
jadi aha sinanangmo na nontoa mian nu Israel nambamo.
39 #
Kel. 13:21-22
Tumpu nongkokamo kundom da bau pohohungi mian anu palesayamo hi Ia,
ka' apu na bau ponjingkai de pihimo.
40 #
Kel. 16:2-15
Aha nompoitamo, sahingga pinotoka-Nyomo mae na pipido,
aha binee'an-Nyomo roti anu lengkat mae i suluga' sahingga nobosumo.
41 #
Kel. 17:1-7, Bil. 20:2-13 Biniha'-Nyo na bungkutnyo nu batu sahingga tinolotimbimo mae na uee,
anu no'ilimo susumo kaunyo i tampat padang anu mateges na tano'nyo.
42Kalana saja' nu inau' nu Tumpu na anu jinanji'-Nyomo,
hi Abraham, posaihon-Nyo.
43Sahingga i lame'mo na mian anu palesayamo hi Ia salatan binoa-Nyomo,
to mia-mian anu pinile'an-Nyomo lewa'mo nolo ais.
44 #
Yos. 11:16-23
Tano' nu to bansa-bansa binee'-Nyomo hi aha,
iwi-iwi' na ale' nu aha, ahamo mian anu palesayamo hi Ia na tumpu-Nyo,
45da mian anu palesayamo hi Ia aijo', tulu-tulutan hi atulan-Nyo iwi-iwi',
ka' montulutimo iwi-iwi' na palentah-Nyo.
O puji' na Tumpu!
Currently Selected:
MAZMUR 105: LAILOE
Highlight
Copy
Compare
Share
Want to have your highlights saved across all your devices? Sign up or sign in
