MAZMUR 104
104
O puji' na Tumpu anu nompotimbalimo
1O puji' na Tumpu, o santuu'ku.
Talalo hondo talasanggo na Belento, o, Tumpungku!
2Belento nibaju'mo nu jingkele'an ka' kaholomatan,
ka' ningkukumbungmo nu jingka.
3Belento nongkokamo langit susumo kemah,
ka' nompotinjomo Laigan nu belento kiita' mae i langit i bawo nu uee.
Kundom haha aita' binaumo kareta nu Belento,
polipik nu mombun aijo' na binau kasake'an nu Belento.
4 #
Ibr. 1:7
Mombun binaumo anu lewa' nu pokau nu Belento
ka' kilat binaumo posaihon nu Belento.
5Dunia binaumo hoso-hoson nu Belento i tampat anu pinaningkoannyo,
sahingga madi'mo gayu'an sampe toka sidu-sidutu'.
6Belento nongkukumbungimo nu ndalangon anu talalo hondo ewa,
ueenyo noletabimo bawonyo nu bungkutnyo iwi-iwi'.
7Salatan sineganmo nu Belento, uee aijo' no'ilimo
mabohos hondo na no'ili kalana talalo ahi' daka' na potatae nu Belento.
8Uee no'ilimo nontulu bungkutnyo nokaiyongmo i bangka'nyo,
anu pinotoukamo nu Belento na tampatnyo.
9Tinantukanmo nu Belento na potempasannyo anu madi' timbali nu tului,
da bolimo po'ule' moletabi dunia.
10Belento nompodaagi'mo bulakan da bau mata nu uee i iwi-iwi na bangka'nyo,
panga'nyo nu kaunyo no'ilimo i olotnyo nu puge'nyo iwi-iwi',
11da bau ponginuman nu binatang iwi-iwi' i uno nu ale',
ka' madi'mo megot na keledai iwi-iwi' i uno nu alas.
12Madi' majo'on ikiijo' na to tomo-tomonsi' mimpeta;
aha lewa'mo umonyi' i olo-olot nu hon nu kau'.
13Lengkat mae i langit tinuduna konmo mae nu Belento na ujan nokaiyong i bungkutnyo,
dunia kahomo apa-apaa na anu pinodaagi'mo nu Belento.
14Belento nompotumuu'mo hemput da nu otot nu binatang,
ka' anu nukaan nu mian manjoo' na ngangahannyo nu sosu'anon.
Sahingga ia timbali mosu'an apa-apaa,
15ka' mohumpakmo bua'nyo nu anggur anu o'inum ka' momposanangmo.
Ka' suele lanya' nu zaitun anu mompotimbali ohupnyo mabuliniasmo,
ka' kaanon anu mompohosonmo butongnyo.
16Kau' nu Tumpu iwi-iwi' mohumpakmo ujan anu molabi-labimo
ka' lontio' kiijo' i Libanon anu pinosi su'annyo.
17Ikiijo'mo na to tomo-tomonsi' mimpeta
tomonsi' ranggung mimpeta aita' mae i tuu'nyo.
18Bungkutnyo anu toto tangka-tangkas binaumo kajojoongan nu mee' anu ma'ela' i alas;
palanduk maninsulukmo i batu gahanggan.
19Belento nompodaagi'mo bitu'on da bau pontanda'i lonu,
batu nu sinaa nusumbu' na tempo'nyo ia makakinsapmo.
20De Belento montau'akonmo mae pintung, sinaa malomo,
ka' iwi-iwi' na binatang ma'ela' i alas motuhekapmo.
21Singa anu toto bata-bata'nyo nintaumo molio anu nu sa'u,
mompoita kaanon anu pinotoukamo nu Tumpu.
22De batu nu sinaa bete'mo aha mopalaimo
ka' manilukutmo i tampat panilukutan nu aha.
23Lantas mosabatmo na manusia kahanda'mo mombau anu nu bau,
ka' mokalajamo sangkut sinaa malom.
24Talalo hondo manjoo' na anu pinotimbalimo nu Belento, Tumpu,
iwi-iwi' pinotutugakonmo nu Belento ima-ima' na nompotimbali;
dunia nobuke'mo nu anu pinotimbalimo nu Belento.
25Toamo ahi' na ambai akaong banta-banta ewa hondo,
ka' mule' anu ko nyawanyo mau anu daka' mau anu ise',
madi'mo opoko bilang.
26 #
Ayb. 41:1, Mzm. 74:14, Yes. 27:1 Ikiijo'mo na kapan iwi-iwi' lewa' talabut,
ka' Lewiatan binatang molokoimbu anu pinotimbalimo nu Belento lewa' mahaik.
27Aha iwi-iwi' montaha'imani tulungan nu Belento
da mohumpak anu okaan de tempo'mo nu pongkaanan.
28Belento na mombee'i, ka' aha na mongala montoluki
Belento na montoukai, ka' aha na mongkaan sampe ma'osa.
29De Belento molipai madi'mo montonto'i, aha mabuhukmo;
de o alamo nu Belento na santuu'nyo nu aha, aha silakamo,
ka' po'ule'mo timbali abu' susumo, momonanyo mae.
30Panyo de aha nubee'imo nu Belento santuu', aha po'ule'mo opotimbali;
Belento po'ule'mo, mombee'i kantumuu'an anu bu'ou i dunia.
31O' amalakon da Tumpu anu talasanggo aijo' tataap sabole-boleh sampe toka sidu-sidutu'!
O' amalakon da ia saja' lame' hi anu pinotimbalinyomo!
32Ia montonto'i dunia ka' mompotimbali langkakatan
bungkutnyo iwi-iwi' i henggonyo, sahingga nosabatmo mae na tibuknyo.
33Aku manyanyimo mompuji' Tumpu i uno nu kantumuu'anku,
manyanyi bau pompuji' Tumpu Allah-ngku
i uno nu kantumuu'anku de aku daagi' tutuu'.
34O' amalakon da nyanyianku sanang na ia mohongo,
kalana Iamo na nompolame' kinyonyoangku.
35Pobakasmo da mian anu binaladosa'mo madi'mo otoa aiya i dunia,
pobakasmo da mian anu ma'idek na kinyonyoa silakamo ingko-ingkot.
O puji' na Tumpu, o santuu'ku!
O puji' na Tumpu!
Currently Selected:
MAZMUR 104: LAILOE
Highlight
Copy
Compare
Share
Want to have your highlights saved across all your devices? Sign up or sign in
