AMSAL 14
14
1Sa'angu' na auan timbali maju kalana pande na boune mongatun
panyo nu idei nu kaponga'annyo.
2Mian anu madi' tageo' na kinyonyoanyo mabuhuk ka' moholomati Tumpu Allah;
panyo kantumuu'an nu mian anu tageo' na kinyonyoanyo mongambangi Ia.
3Kalana kaponga'annyo, mian anu waweng saja mosi puji butongnyo;
panyo mian anu pande nu jagai nu posi potataenyo.
4De madi' ko sapi' bau pompajeko hasin nu ale' madi' ko anu ohumpak;
panyo kahosonan nu sapi' anu ohumpak na hasin nu ale' manjoo'mo.
5Sakisi anu madi' tageo' na kinyonyoanyo saja' montaeakon anu sahondo-hondonyo;
panyo sakisi anu madi' opalesaya saja' baleko'.
6Mian anu takabun madi' timbali pande;
panyo mian anu pande dengke na balagulu'.
7Boli masangalu tiba mian anu ponga';
madi' ko anu nu ajanakon hi beleyum.
8Mian anu pande monsumbu' mompopikilakon apaa na anu tionyo obau,
panyo mian anu ponga' nu akali nu kaponga'annyo.
9Mian anu ponga' madi' mompajuli pa' dosa'nyo o ampuni kabai madi';
panyo mian anu manonong mongindi da o ampuni na dosa'nyo.
10Lame' kabai susa' kiijo' una-una' i uno nu kinyonyoanyo;
panyo mian sangga'at madi' moko ala mongoa'i.
11Laigan nu mian anu manonong tataap madodo;
panyo laigan nu mian anu ma'idek na kinyonyoanyo mohobo'mo.
12 #
Ams. 16:25
Daagi ko jalan anu otoa hodi';
panyo imihinyo mae jalan aijo' mompanjolongimo kasilakan.
13Moko lapas kumojo ugaat ko anumo humang;
panyo kalame'an timbalije mule' mingahen nu kasusa'an.
14Mian anu ma'idek na kinyonyoanyo saidi' mae monta'up bua'nyo nu palabuatannyo anu ma'i-ma'idek aijo';
panyo mian anu manonong saidi' mae mohumpak bua'nyo nu palabuatannyo anu mano-manonong aijo'.
15Mian anu ponga' mompalesaya sinin na potatae;
panyo mian anu pande na saja' ahi' bapikin ima-ima' na mombau apa-apaa.
16Mian anu manonong saja' balajaga-jaga ka' mati kojo'on ipalabuatan anu ma'idek;
panyo mian anu ponga' pusing na ubaknyo lapas mae sanangje na kinyonyoanyo.
17Mia nanu saja' motambuha' ponga' na mompopikilakon apa-apaa;
panyo mian anu pande sipatnyo sabaan.
18Mian anu madi' ko anu nupisumbu-sumbu' timbalimo ponga';
panyo mian anu pande mompaka pintuangmo na ilimu'nyo.
19Mian anu ma'idek na kinyonyoanyo saidi' mae ta'aluk hi mian anu madi' tageo' na kinyonyoanyo;
mongkakase da okalibosi.
20Mian anu kasiasi madi' oka'ima'i nu tosanga-sangalunyo;
panyo mian anu kaya manjoo' na balaa'nyo.
21Ihe na mongalu mian sangga'at mombaumo dosa';
panyo ihe na mongkanonongi mian kasiasi saidi' mae kantumuu'annyo sanang.
22Ihe na bala usaha mombau han anu ma'ima' saidi' mae opalesaya ka' oholomati;
panyo ihe na montanga'i palabuatan anu ma'idek jalannyo sinala'mo.
23Sinin na usaha daagi ko ka untungannyo;
panyo sisik anu madi' kogunanyo monsaduakon mian kasiasi.
24Mian anu pande opuji' kalana kapandeannyo;
panyo mian anu punga' osumbu' kalana kaponga'annyo.
25De samian na sakisi motatae totu'u, ia mompotumuu' nyawanyo;
panyo de ia baleko' ia monsangaluimo sangalunyo.
26Mian anu tulu-tulutan hi Tumpu madi' lewa' pusing na bapikin;
ka' to utu-utusnyo ko anu monjagai.
27Tulu-tulutan hi Tumpu aijo'mo na polengkatan mae nu kasanangan nu kantumuu'an;
ka' jalan bau pompojo'on kasilakan.
28Anu mohangkat sanggo itomundo' talasanggo kalan layatnyo da'isan;
panyo de madi' ko layatnyo ia madi' moko ala balakuasa.
29Mian anu pande madi' sampa pusa;
panyo mian anu ponga' madi' moko ala sabaan.
30Kinyonyoa anu madi' lewa' mangada' momposehat butongnyo;
panyo anu saja' pusa nakinyonyoa sumomo panyakit anu monsilakai.
31Ihe na manonong hi mian anu kasiasi, moholomatimo Tumpu Allah-nyo;
panyo ihe na mongkabisa'i mian anu lupe sumomo mongalu anu Nompotimbali ia.
32Mian anu ma'idek na kinyonyoanyo mohumpak kabinasa'an kalana palabuatannyo anu ma'idek;
panyo mian anu manonong madi' opoposia kalana hodi' na kinyonyoanyo.
33Kapandean bapikin saja' kiijo' i uno nu pikilan nu mian anu manonong;
panyo pikilannyo nu kabisa'i nu pikilan nu mian anu ponga'.
34Kaadilan ka' kanonongan mohangkat sanggo ma'ima' nu bansa;
panyo dosa' monsaduakon bansa timbali ma'ambang.
35Tomundo' sanang hi pegawenyo anu pande;
panyo ia pusa hi pegawenyo anu madi' moko ala molakukan kalaja'nyo.
Currently Selected:
AMSAL 14: LAILOE
Highlight
Copy
Compare
Share
Want to have your highlights saved across all your devices? Sign up or sign in
