AMSAL 13
13
1Anak anu pande mompalahatikan de tuumanyo mombee'i pokinde';
panyo mian anu ko bubuun madi' mongka'oho' de opisala'i.
2Potatae nu mian anu manonong saja' mohumpak dale';
panyo mian anu tageo' na kinyonyoanyo saja' singgi.
3Mian anu mongati-ati na motatae kantumuu'annyo madi' ko anu mompoposia;
panyo mian anu yayamo na motatae saidi mae mohumpak kasusa'an.
4Anu moluluk manjoo' na anu nu ka'ima'i panyo sa'angu' pe'e madi' ko anu nu humpak;
panyo mian anu makeke mokalaja mohumpak apaa na anu nu ka'ima'i.
5Mian anu madi' tageo' na kinyonyoanyo mongka'ideki anu baleko';
panyo kalakuan nu mian anu ma'idek na kinyonyoanyo mongambangi ka' opisala'i.
6Palabuatan anu madi' tageo' na kinyonyoanyo montinjohi mian anu hodi' na kantumuu'annyo;
panyo palabuatan anu ma'idek na kinyonyoanyo mompatei mian anu baladosa'.
7Daagi ko mian anu mingadi-adi' mian anu kaya padahan madi' ko halata'nyo;
daagi ko anu mingadi-adi' kasiasi padahan talalo ahi' kaya.
8Mian anu kaya tionyo ahi' mompokaluan doi da kantumuu'anyo madi' ko mian anu mompoposia;
panyo mian anu kasiasi madi' ko anu kahanda' mompatei.
9Mian anu palesaya sumomo sahaya anu majingka hondo;
panyo mian anu ma'idek na kinyonyoanyo sumomo sulu' anu mopoho'mo.
10Takabun ola monsaduakon painggagan
panyo mian anu pande mongka'oho' montalima pangajalan.
11Kakaya'an anu ohumpak ola dengke-dengke malia' hondo maga'a;
panyo halata' anu ohumpak toto sangkiding saidi mae mompaka pintuang.
12De anu lewa' o ima-imani madi' opoko ala ohumpak, kinyonyoa susa'mo hondo,
panyo de anu okahanda'i ohumpakmo sanangmo na kinyonyoa.
13Mian anu montee pangajalan nu Tumpu monsilakai buntongnyo;
panyo mian anu tulu-tulutan hi atulan nu Tumpu Allah saidi mae mohumpakmo tamboonyo.
14Pangajalan nu mian anu pande aijo'mo na polengkatan mae nu kasanangan i uno nu kantumuu'an;
de ko anu kahanda' mompatei pangajalan aijo' na mompotumuu'.
15Mian anu manonong oholomati;
panyo mian anu madi' timbali opalesaya saidi mae tumuu' susa'.
16Mian anu pande de ma'isa pe'e opopikilakon ma'isa mombau apa-apaa;
panyo mian anu punga' lewa' mahataean ikaponga'annyo.
17Utusan anu madi palesaya monsaduakon kasilaka'an;
panyo utusan anu timbali opalesaya aijo' yo ko hasinnyo.
18Mian anu madi' mongka'oho' opogulu' timbali kasiasi ka' ma'ambangmo;
panyo mian anu mompajuli pokinde' saidi mae oholomati.
19Palias na ko ima'nyo de ohumpakmo na anu oka'ima'i!
Mian anu ponga' madi' mongka'oho' mompala'i palabuatan anu ma'idek.
20Mian anu mosangalu tiba mian anu pande saidi mae timbali pande;
panyo mian anu mosangalu tiba mian anu ponga' saidi mae mohumpak kasilaka'an.
21Mian anu baladosa' saja' otumput nu kasoe'an;
panyo mian anu manonong saja' mohumpak kasanangan i uno nu kantumuu'annyo.
22Mian anu manonong mombee' kakaya'annyo hi to maku-makumpunyo,
panyo kakaya'an nu mian anu baladosa' opo una'mo hi mian anu hodi' na kinyonyoanyo.
23Tano' anu ma'isa ko anu sinu'an timbali mohasinakon manjoo'na anu okaan de obee' da nu kalaja nu mian kasiasi;
panyo kalana madi' ko kaadilan sahingga aijo' na monsaduakon tano' aijo' madi' okalaja.
24Madi' mondoke anak bala alati' madi' mongkalibosi ia;
panyo de mongkalibosi ia tionyo ahi' baani na mondoke ia.
25Mian anu manonong saja' sukup nakantumuu'an nu aha;
panyo mian anu ma'idek na kinyonyoanyo saja' kakulangan.
Currently Selected:
AMSAL 13: LAILOE
Highlight
Copy
Compare
Share
Want to have your highlights saved across all your devices? Sign up or sign in
