AYUB 8
8
Bildad
1-2Lantas notataemo na i Bildad,
“Daagi' hipian na beleyum motatae sumo itina'?
Potatae nu beleyum guhan sumomo mombun.
3Tumpu Allah madi' toho' monggeo-geo'akon ka'adinan;
madi' toho' mahungku' na montinjohakon kahondoan.
4Ihe na monsumbu' ugaat to ana-anak nu beleyum binaladosa'mo hi ia,
jadi konanyomo ahi' na aha nohumpak hukuman hi Ia.
5Panyo de hi ia na pinsondo'an nu beleyum
mongkakaase da ikalibosi ka'momoita ampun.
6De kinyonyoa nu beleyum totu-totu'u hodi', ka' madi' kopisala'nyo,
Tumpu Allah sampa montulungi beleyum;
ka' salaku balosnyo,
auwan nu beleyum mompo'ule' ma'ima'.
7Kakaya'an nu beleyum anu iningkotmo aijo' madi' ko sanggonyo
de opokakanakon tiba apaa na anu nu humpakje mule'.
8Mian anu toto pande-pande na bapikin naipuan mae tionyo ahi' saja' o'inau'
ka'opotutugakon nu beleyum apaa na anu ingoa'anmo nu to mompo-mompolee'to.
9Kantumuu'anto madi' pin, madi' osumbu-sumbu'to;
sansina-sinaa kita tumuu' ola susumo lolung.
10Potombihing na potatae nu mian anu toto pande-pande na bapikin naipuan mae,
aha mompokinde'i sumo uuka hi beleyum,
11‘Ola i tampat anu ko ueenyo na kantumuu'an nu biho';
pondan ola ohumpak i tano' anu hensekon.
12De ueenyo mo'otimo, biho' aijo' mateekmo,
sahanyo hemput sangga'at na madi' sampa manggas.
Padahan daagi' molunou, ka' misa' pe'e tempo'nyo,
ia kinolong ka' ingala na hasinnyo.
13Sumo aijo'mo na mian anu madi' palesaya hi Tumpu.
Tumpu Allah nu kolilimimo sahingga madi'mo ko anu nu pitaha-taha'imani.
14Sahamba na banang anu moninis baumo kataha'imanannyo;
peta nu loa' timbalimo nu palesaya.
15Te mahoson na loa'nyo aijo' de bau paninsehaan?
Te mahoson na banangnyo aijo', de bau pintoongan?’
16Susumo padang tuu'an na tumuu', mahoson na mian anu madi' palesaya hi Tumpu;
de nu timpa'imo nu singit, ia tumuu' ka' molumba'mo ka' nusongkohimo na tampat kinatumuu'annyo aijo'.
17Bakatnyo mongkalaputimo batu anu kiijo' i tano';
mongkalekodi mahoson hondo, ia madi' dengke na mokohenggo.
18Panyo, soba gaut uuka aiya na padang aijo',
saba' sumomo ahi' ia madi' tinumuu' i kiijo'.
19Sumo aitumo, na kasanangan nu mian anu kinyonyoanyo ma'idek olamo sumo aijo';
mian sangga'at na toka ka' mombolosakon ia.
20Panyo Tumpu Allah madi' toho' mompojohok mian anu tulu-tulutan,
ka' madi' toho' suele ia montulungi mian anu uwesan.
21Nganga' nu beleyum nubaumo da kumojo,
biwi nu beleyum lewa'mo molo'ais kalana lame'mo.
22Anu mongka'ideki beleyum ma'ambangmo, ka' nu oa'i madi'mo ko angga'nyo,
ka' laigan nu mian anu uwesan o'ideimo sahingga madi'mo ko buyo'nyo.”
Currently Selected:
AYUB 8: LAILOE
Highlight
Copy
Compare
Share
Want to have your highlights saved across all your devices? Sign up or sign in
