AYUB 22
22
KINOPINTOLUNNYOMO NA BINASISIK
22:1–27:23
Elifas
1-2 #
Ayb. 35:6-8
Lantas notataemo na i Elifas,
“Iwi-iwi' na manusia,
mau pe'e ola samian madi' ko anu mingkaliangan hi Tumpu Allah.
Mian anu ma'ima' hondo na kinyonyoanyo ka' madi' toho' mombau anu ma'idek,
ola mingkaliangan hi posi butongnyo.
3Kabai pa' kogunanyo hi Tumpu Allah,
de beleyum mombau apaa na koonyo nu Tumpu Allah?
Kabai ko untungnyo hi Ia,
de kantumuu'an nu beleyum talakana'?
4Misa' kalana beleyum mabuhuk hi Tumpu Allah,
beleyum opisala'i ka' osangka sinala'mo,
5panyo kalana nanjoo'mo hondo na dosa' nu beleyum,
ka'talalo ahi' ma'idek na kalakuan anu binaumo nu beleyum.
6De utus nu beleyum madi'mo moko ala mombayan samaya'nyo,
nu agoimo nu beleyum na baju'nyo iwi-iwi'.
7Mian anu kainmo na mokalaja madi'mo nu po'inumi nu beleyum uee,
anu mo'ohopmo madi' nu bee'i nu beleyum mongkaan.
8Nupake na pangkat ka' kakuasa'an nu beleyum,
mongala tano' songko-songko.
9Misa' ola to mia-mian anu balumo na madi' nu tulungi,
panyo anu ingunonmo madi'mo ko tinanyo ka' tuumanyo suele ahi' nusansala' nu beleyum.
10Kalana aijo' beleyum tinikubanmo nu kasusa'an sumomo so'o anu kahanda'mo monsilakai beleyum,
sahingga monti-montiik kinyonyoa nu beleyum nabuhukmo.
11Sinaa ko pintu-pintuangnyomo, madi'mo moko ala montoa na beleyum;
beleyum molomosmo nu anjuhakonmo nu iyaba' anu daka' hondo.
12Te misa' Tumpu Allah jojoong ahi' aita' mae i langit anu matangkas hondo,
ka' montudang mokaiyong, mandala' haha aijo' iwi-iwi' anu matangkas hondo?
13Panyo pinokilawa nu beleyum, “Te ia apaa naanu pisumbu-sumbu'?
Ia kiita' mae i sambiha' nu kundom jadi madi' ahi' moko ala mongulus palakalanto.”
14Beleyum monsangka tukooyum Ia montoa mae nu ompo' nu kundom,
ka' tukooyum Ia lumajang i olotnyo nu langit ka' tano'?
15Jadi beleyum sabole-bolemo motululu,
i jalan anu pinile'anmo nu to mia-mian anu ma'idek na kinyonyoanyo?
16Aha ihahumbitakonmo maumo ma'isa pe'e tempo'nyo na silaka,
ka' inganjuhakonmo nu iyaba'.
17Ahamo aijo' na anu baani hondo madi' palesaya hi Anu Daka' hondo na kuasanyo,
ka' monsangka Ia madi' moko ala mombau apa-apaa hi aha.
18Padahan Tumpu Allah na anu nompokayamo aha!
Aku totu-totu'u madi' hondo monsumbu-sumbu' pikilan nu mian anu ma'idek na kinyonyoanyo!
19Mian anu ma'ima' na kinyonyoanyo, kumojo kalana i lame'mo,
de montoa mian anu ma'idek na kinyonyoanyo o hukumo.
20Iwi-iwi' na kakaya'an nu mian anu ma'idek na kinyonyoanyo nagalismo, na'idek,
ka' tinoyo'anmo nu apu na anu daagi' tinontuha'.
21Jadi, O Ayub pompaha damemo tiba Tumpu,
da bolimo saja' mangada' na kinyonyoa nu beleyum,
De nubaumo nu beleyum sumo aijo',
mohumpakmo ka'untungan na beleyum.
22Talimamo apaa na anu pinokinde'akonmo nu Tumpu hi beleyum;
boli okolilimi na aijo' iwi-iwi' i uno nu kinyonyoa nu beleyum.
23Po'ule'mo balatobat hi Tumpu ka' bolimo beleyum mindaka-daka' na kinyonyoa,
ka' hahan anu ma'idek i uno nu laigan nu beleyum bolimo daagi' nu bau.
24Bahetakonmo na mosoni' nu beleyum anu madi' ko galo-galo'nyo aijo';
lumbu'akonmo mokiijo' itotonga' nu inanggasan nu kaunyo.
25Anumo Daka' na kuasanyo na timbali mosoni' nu beleyum,
ka' salaka nu beleyum anu ma'ima' hondo.
26Sahingga beleyum timbalije saja' sabole-bole palesaya hi Tumpu Allah,
ka' nusumbu'mo nu beleyum taalu' ia ahi' na pinolengkatan nu kasanangan nu beleyum.
27De beleyum balado'a nu taamimo na beleyum,
ka' apaa na anu jinanji'mo nu beleyum hi Ia nubaumo nu beleyum.
28Apa-apaa na anu nubau saja'mo mingkaliangan,
ka' jingka monjingkaimo kantumuu'an nu beleyum.
29Mian anu saja' mohangka-hakgat butongnyo nutauakon nu Tumpu,
panyo anu madi' lewa' mohangka-hangkat butongnyo nu posalamat nu Tumpu.
30Nutulungi nu Tumpu na beleyum de beleyum madi'mo ko kasala'an,
ka' de beleyum mombau apaa na anu nuka'ima'i nu Tumpu.”
Currently Selected:
AYUB 22: LAILOE
Highlight
Copy
Compare
Share
Want to have your highlights saved across all your devices? Sign up or sign in
