AYUB 21
21
Ayub
1-2Tinaaman i Ayub,
“Potombihing pa' apaa na anu ku loakon;
ola aijo' na anu ku poita salaku bau pohase' mae.
3Pobee' pe'e mae da ku balosakon na motatae,
lapas aijo' po'ule'je alu mae nu belemiu na aku!
4Misa' tiba manusia na aku painggaga,
jadi madi' mongkuka de aku madi' saban.
5Tonto'i mae na aku, da belemiu tolokengkengje,
belemiu sainjonomo ka' nganga' nu belemiu madi'mo moko ala motatae.
6De ku potutugakon na aku aiya,
nulakatmo na aku kalana mansihimo na bulu na mongoa'i ka' mabuhukmo.
7Kadaka' mian anu ma'idek na kinyonyoanyo nupotumuu' nu Tumpu Allah pipin,
ka' halata' nu aha ola kopintu-pintuangnyo?
8Aha tumuu' pin hondo,
sahingga makumpu nu aha daagi' nutoa nu aha na daka'mo.
9Auwan nu aha sanang ka' bilahi hondo;
Tumpu Allah madi' mompotoka mae balaa' hi aha.
10Potuu'on nu aha sapomo-pomolee'nyo,
ka' madi' mahan na monganak.
11To ana-anak nu mian anu ma'idek na kinyonyoanyo nahalumpatanmo kalana i lame'mo,
sumomo domba anu daagi' anaknyo i lame'mo.
12Tiba onyi' nu labana, puloit ka' kasapi',
aha i lame'mo na nanyanyi ka' lewa'mo nonsalelei.
13Sansina-sinaa na kantumuu'an nu aha mingahen i kabilahian,
ka' de silakamo sanang hondo na kinyonyoa nu aha.
14Padahan notataemo na aha hi Tumpu Allah,
“Pala'imo na kami ka' bolimo mae mati ohani!
Kami madi'mo mongka'ima'i da monsumbu'
kahanda' ka' pongka'oho' nu Belento i uno nu kantumuu'an mami.”
15Nututugi nu aha, “Montuluti anu nupoto'i nu Tumpu Allah madi' ko kaliangannyo,
ka' balado'a hi Ia suele madi' mingguna.
16Te misa' ola ahi' posi kahosonanto,
o humpakmo na anu o tanga'into ka' anu okahanda'into?”
Panyo aku madi' hondo-hondo monsitujui,
pikilan ka' tanga'an anu sumo itina'.
17Te toho'mo na sulu' nu mian anu ma'idek na kinyonyoanyo pinoho'
ka' aha tinuda'anmo nu balaa' ka' kasusa'an?
Te toho'mo na Tumpu Allah nontambuha'i aha,
sahingga aha i hukum-Nyomo?
18Te toho' aha susumo hat ka' abu'
anu nutilahabakonmo nu antong ka' mombun anu motulu?
19Belemiu notatae, “Anak nu hukum nu Tumpu Allah kalana dosa' nu tu'anyonyo.”
Panyo aku motatae: Anu nu hukum nu Tumpu Allah aijo'mo mian anu baladosa',
da nusumbu' nu aha taalu' kalana dosa' nu aha,
sahingga Tumpu Allah nompokonamo hukumanNyo.
20Bakas da mian anu baladosa' montanggungmo posi dosa'nyo,
bakas da nu'oa'imo na tambuha' nu Tumpu Allah Anu Daka' hondo na kuasanyo.
21De manusia tokamo na tempo'nyo mompala'i dunia aiya,
te daagi' ia montutugi pa' to ana-anaknyo mohumpakmo kabilahian?
22Te nupoko ala mule' nu manusia na mompogulu' Tumpu Allah,
te misa' Tumpu Allah ahi' na momputusi palakala nu malaekat i suluga'?
23-24Daagi' ko mian anu mahoson na butongnyo tempo'nyo ia daagi' tutuu';
ia sinilakamo panyo kantumuu'annyo sinukupmo ka' sinanangmo.
Ia sinilaka madi' sinansala ka' na'ima' hondo,
ka' mule' butongnyo daagi' ahi' mahoson.
25Panyo daagi' mule' ahi' ko anu silaka sinansala hondo,
madi' toho' nongoa'i kasanangan.
26Panyo i uno nu pinolamunan, aha pokakana bubu' pinomale';
ka' nukampuhimo nu ias.
27Memang ku sumbu' apaa na anu opotutugakon nu belemiu,
ka' iwi-iwi' na kalakuan anu ma'idek anu otanga'imo nu belemiu.
28Belemiu mompokilawa, “Iya mae na laigan nu anu balakuasa
anu mombau kalakuan anu palaganta?”
29Te ma'isa toho' ileleakon nu belemiu hi mian da'isan anu lewa' mamba momoya?
Te belemiu madi' mompalesaya lele anu sinisikmo nu aha?
30Koonyo nu aha, “De tokamo na tempo'nyo Tumpu Allah mombee'imo hukuman,
to mia-mian anu ma'idek na kinyonyoanyo oposalamatmo.”
31Madi' ko anu mompisala'i kalakuannyo;
madi' ko anu mombalosakon kalakuannyo anu ma'i-ma'idek.
32Ia oboa i pinolamunan, ka' oposoopmo i bolo';
pinolamunan ia o jagai ka' saja' opilasi.
33Momada-madala na mian anu i lumajang nontuntuni ia i lembanmo aijo';
ka' mule' tano' nomalasanmo na nontabuhi ia.
34Jadi potatae nu beleyum anu kahanda' mae mohase' aijo' madi' totu'u,
ka' iwi-iwi' na anu pinontaami mae nu beleyum itina' baleko'!”
Currently Selected:
AYUB 21: LAILOE
Highlight
Copy
Compare
Share
Want to have your highlights saved across all your devices? Sign up or sign in
