AYUB 20
20
Zofar
1-2Lantas tinaamanmo i Zofar,
“O Ayub, madi' sanang na kinyonyoangku mohongo potatae nu beleyum,
uuka aiya sampamo ku taami.
3Potatae nu beleyum atina' talalomo ahi' nompopo'ambang,
panyo ku sumbu' mosia na montaami.
4Madi' nusumbu' nu beleyum na tempo'nyo naipuan mae,
salatanmo pe'e manusia momonanyo pinojoong i dunia,
5kalame'an nu mian anu ma'idek na kinyonyoanyo ola sasaingoni',
ka' kasanangan nu mian anu palaganta ola sangkinihap na mata?
6Maumo ia talasanggo toka-tokamo aita' i langa, na kotangkasnyo,
sahingga ubaknyo montokamo kundom,
7panyo ia saidi' mae madi'mo otoa-toa sampe toka sidu-sidutu',
madi'mo otoa-toa i dunia kalana han anu moko ambang hondo.
To mia-mian anu monsumbu'mo ia,
molelekimo, “E, pa' noyamo na ia?”
8Ia madi'mo otoa-toa susumo anu ola ingipi,
madi'mo otoa-toa susumo anu pinihimo.
9Ia madi'mo otoa-toa nu mata;
ia madi'mo daagi' ko anu kiijo' i kajojoongannyo.
10Anu u'utu mae tinomangnyo hi miana nu kasiasi,
tionyo ahi' nubolosi nu to ana-anaknyo.
11Maumo ia ma'isa langkai' ka' daagi' mahoson,
panyo sasaidi' uuka ia timbalimo abu'.
12-13Talalo ahi' matami' na han anu ma'idek i uno nu nganga'nyo!
Gagalannyo bolimo sampa nu lonyom;
kalana aijo' me saja' nu omu'i nu jila'nyo,
da pin na ia lewa' monyamit.
14Panyo anu o kaan aijo' sanggalasanmo na balu-balu'nyo de kiijo'mo i kompong,
timbalimo lasung anu mapakat anu momboamo kasilaka'an.
15Halata' anu tinomangnyo ka' i lonyomnyomo madi' ka' madi' tantu nu lua'akonmo;
Tumpu Allah na monsabatakon lengkat i uno nu kompongnyo.
16Anu ma'idek na kinyonyoanyo monginumo lasung sahingga monsaduakonmo da mohumpak balaa',
ia silakamo nu aijo' susumo anu nu bahe'mo nu ulo anu ko bisa'nyo.
17Ia madi'mo monyamit lanya' nu zaitun anu molabi-labimo,
kabai susu ka' juu' nu uwani' anu manjoo'mo hondo.
18Iwi-iwi' na ka'untungannyo tionyo ahi' nu sule'akonmo;
apa-apaa na anu i humpaknyomo madi'mo nu oa'i na kasanangannyo.
19Kalana ia lewa'mo nonsakisa mian ka' nomopsusa'mo mian anu kasiasi;
ia lewa'mo nongagoi laigan nu mian anu misa' ia na nombau.
20Kalana ia talalo ahi' mangoa, madi' ko kapa'osannyo,
sahingga ia sabole-bole molio apa-apaa na anu nu kahanda'i.
21De ia mongkaan iwi-iwi' nu ingkoti,
kalana aijo' kasanangannyo madi' pinin.
22Salatan kasanangannyo tinahahumo hondo,
kasansala'an ka' kasusa'an nontokaimo mae.
23Salatan ia tinasiagamo mongisi kompongnyo,
tinambuha'anmo hondo nu Tumpu Allah na ia ka' i hukum-Nyomo.
24De ia mopalai da boli nukona nu bajak anu ko aja'nyo,
ia nubelaimo nu pana' tambaga.
25Ia kinonamo nu pana', sahingga binelaonmo;
mata nu pana' anu joliotan nolampasmo butongnyo,
sahingga nabuhukmo na kinyonyoanyo.
26Halata'nyo anu lewa' pino'una'nyo i ningkotmo;
ia ka' iwi-iwi' na aha salaigan tinoyo'anmo nu apu
anu madi' pinosun nu manusia.
27Langit nompotoamo kalakuannyo anu ma'i-ma'idek aijo';
tano' nobungkutmo nongewa ia.
28Iwi-iwi' na kakayannyo ningkotmo,
kalana talalomo tinambuha'an nu Tumpu Allah.
29Aijo'mo na uki' nu mian anu madi' mompajuli Tumpu Allah,
uki' anu tinantukanmo nu Tumpu Allah hi ia.”
Currently Selected:
AYUB 20: LAILOE
Highlight
Copy
Compare
Share
Want to have your highlights saved across all your devices? Sign up or sign in
