AYUB 19
19
Ayub
1-2Panyo tinaaman i Ayub,
“Kadaka' aku saja'mo opisala'i nu belemiu,
ka' osakisamo nu belemiu na aku nu potatae?
3Saja'mo belemiu mompopo'ambang aku,
ka' madi' ma'ambang na belemiu monsakisa aku.
4De bisuannyo sala' na anu ku bau aiya,
aijo' madi' mompolugi' belemiu.
5Otutugi nu belemiu, belemiumo na lebe ma'ima' molingkudui aku;
kasusa'anku osangkamo nu belemiu aijo'mo na bukuti'nyo aku sinala'mo.
6Osumbu'mo ahi' na aku aiya sinakisamo nu Tumpu Allah,
ka' i hakop-Nyomo nu talong-Nyo.
7Aku lewa'mo tinumatuhun kalana talalomo ahi' na pinonsakisa-Nyo aijo',
panyo mau pe'e samian madi' ko anu nontoa mae aku.
“Iya na ka'adilan,” koonyo nu loboo'ku,
panyo madi' ko anu nohongo mae aku.
8Tumpu Allah nongompomo jalanku, aku madi'mo moko ala motulu,
kajalananku pinopikat-Nyomo.
9Ingagoan-Nyomo na halata'ku iwi-iwi',
ka' sanggongku anu tinalasanggomo binusikan-Nyomo.
10Iyayamae na tampat sanggongku ingidean-Nyomo,
sumomo kau' binubutmo nu mian na bakatnyo,
lantas pinojohokmo da mateekmo ka' mangkalualemo,
sumo aijo'mo na Ia nohahumbitakon iwi-iwi' na anu ku taha'imani.
11Pusa nu Tumpu Allah hi belengku nompaka moakmo;
aku sinangka-Nyomo sumomo sampobali'-Nyo.
12Suludadu-Nyo nontumbuhimo mae madi'mo pinoko tewa';
kajalananku ingompok-Nyomo, ka' kemahku tiniku-Nyomo.
13To utu-utusku pinojo'on-Nyomo hi belengku;
iwi-iwi' na mian anu mompahasumbu' tiba aku madi'mo monsumbu' aku, aha montoa mae aku sumomo mian anu i salipu'an.
14Aha anu sa'anakan mae tiba aku iwi-iwi' madi'mo mongohani mae;
to sanga-sangalungku madi'mo mae monginau' aku.
15Posaihonku boune kinoliliman-Nyomo na aku, tuan nu aha;
sinangkanyo na aku, te mian anu ma'isa sinumbu'nyo.
16Ilagangku na posaihonku aijo', panyo madi' tinaamannyo,
maumo pagala sinale'anku ma'i-ma'ima' na ia.
17Bengkele'ku nonguahimo na mongook sawongku,
Utusku omput nu pusongku madi'mo sanang na mongohani aku.
18Aku nu popo'ambang nu to ana-anak i jalan;
de aku tuminjo, aku okokojoi.
19To sanga-sangalungku anu mompahakona hondo aku, mongkahegatimo na montoa mae aku;
aku pinala'ianmo nu aha anu kuku kalibosi.
20Butongku me kilit na kampi-kampit i buku;
me ise-ise' aku sinilakamo ka' nyawangku nobotu'mo.
21O belemiu to sanga-sangalungku, kalibosiakon mae na aku,
kalana lima nu Tumpu Allah nondokemo aku.
22Tumpu Allah sabole-bolemo monsakisa aku; kadaka' belemiu montihomo Ia?
Ma'isa belemiu na'osa na nonsakisa?
23Ah de timbali, ku poita da potataengku o tulis,
sahingga saja' o'inau';
24ku poita da besak na bau pompa'atakon i batu,
da madi' sampa kangalinan sampe toka sidu-sidutu'.
25Ku sumbu' kiita' i suluga' daagi' ko anu monsangaja'i aku;
ahennyo mae Ia na toka mae montulungi aku.
26Maumo kilitku kahomo bela ka' nobehe-behe'mo,
panyo de daagi' ko butongku, Tumpu Allah saja' ku tonto'i.
27Posi matangku na pontonto'ingku Ia,
ka' aiya hi belengku Iamo aijo' na bau bela'ku.
Kinyonyoangku naidekanmo kalana belemiu notatae,
28‘Mosia na kita mombau da okalakmo na Ia?’
Belemiu moliomo jalan da mahampalakalamo.
29Panyo, uuka aiya kabuhukmo na bajak!
Kalana Tumpu Allah montambuha'i ka' mohukum mian anu baladosa';
Sahingga osumbu' miu, taalu' daagi' ko Tumpu Allah anu momputusi hukuman nu manusia.”
Currently Selected:
AYUB 19: LAILOE
Highlight
Copy
Compare
Share
Want to have your highlights saved across all your devices? Sign up or sign in
