AYUB 17
17
1Ukunku aku silaka malia'mo, malia'mo putus na nyawangku;
memo hagum na anu daagi' hi belengku.
2Mian mompotimbalimo aku anu lewa' o'alu;
tinoangkumo na aha talalomo ahi' hondo lewa' mae mompopihongo sisik.
3Aku aiya hodi' hondo na kinyonyoangku, O Tumpu Allah. Palesaya mae na aku!
Daagi' ihe na monsangaja'i mae potataengku?
4Ginunggumanmo nu Belento na kinyonyoa nu aha sahingga madi'mo nangalati';
da boli aha mohungku'i mae aku uuka aiya.
5Susumo koonyo nu kantuang, ihe na mongkalak sangalu kalana molio ka'untungan,
to ana-anaknyo saidi' mae na mohumpak balosnyo.
6Uuka aiya aku lewa'mo mae opopihongoi kantuang monsisik anu madi' ma'ima';
aha toka mae montupe'i ohupku.
7Matangku pinahamo kalana lewa'mo i humang;
songko-songko na butongku nagesukmo hondo.
8Mian anu bala'iman, tinolokengkengmo ka' binangangmo;
mian anu madi' ko kasala'annyo, nonsangkamo aku madi' palesaya hi Tumpu.
9Mian anu ma'ima' na kinyonyoanyo ka' anu madi' ko kasala'annyo,
lebemo nu oa'i totu-totu'u na kantumuu'annyo kina'ima' anmo nu Tumpu Allah.
10Panyo de bisuannyo belemiu iwi-iwi' toka mae,
madi' ko samian anu pande na bapikin toka mae.
11Kantumuu'anku pinala'iankumo, iwi-iwi' na anu tinanga'ankumo madi'mo sinidahanku;
ka' suele madi'mo ko anu daagi' iwi-iwi' na anu i niat mo nu kinyonyoangku.
12Panyo anu monsampobela' mae aku nompoto'imo,
‘Pihi aitu sumomo sinaa ka' jingka ohanimo mae bete'.’
Panyo sinumbu'kumo i uno nu kinyonyoangku
na kantumuu'anku aiya sabole-bole ahi' pintung.
13Ola dunia nu kapatean na ku taha'imani,
i kiijo'mo na kahoyotanku i uno nu kapintungan.
14Hagumku ku sanggohimo “Tuumangku”,
ka' santo ia-ias nu tano' anu mongkaanmo butongku
ku sanggohimo “Tinangku” ka' “Utuskumo boune.”
15Iya na bau daagi' kataha'imananku;
ihe na montoa kabilahian anu ku humpak?
16De aku mintatau'mo i dunia nu mian anu sinilakamo,
madi'mo daagi' ko anu ku taha'imani.
Currently Selected:
AYUB 17: LAILOE
Highlight
Copy
Compare
Share
Want to have your highlights saved across all your devices? Sign up or sign in
