AYUB 13
13
1iwi-iwi' aijo' toho'mo tinoangku ka' pinosi hongongkumo,
ka' totu-totu'u ku sumbu' hondo.
2Apaa na anu osumbu' nu belemiu aijo' suele ku sumbu';
boli osangka nu belemiu aku mati alukmo hi belemiu.
3Panyo aku ko kahanda' motatae hi Anu Daka' hondo na kuasanyo;
aku kahanda' mompoto'i kahondoanku mongkona han aijo' i ahop nu Tumpu Allah.
4kalana kaponga'an nu belemiu okulubimo nu belemiu nu han nu belemiu anu mongakali,
madi' sala' sumomo ahi' sando anu madi' totu'u.
5De bisuannyo belemiu madi' notatae,
ku gantang belemiu osangka pande na bapikin.
6Jadi soba hongo mae na bau ponggagakonku;
potombihing mae ima-ima' na aku mompoto'i kahondoanku.
7Pa' timbali kalana Tumpu Allah sahingga belemiu baleko'mo?
Pa' timbali belemiu baleko' kalana kapentingan-Nyo?
8Pa' timbali na belemiu matisangalu hi Tumpu Allah,
ka' mompototu'u Ia salaku anu montinjohi Ia?
9De Tumpu Allah na mongulus belemiu, pa' ma'ima' ahi' na pomputusi-Nyo?
Te opoko ala o'akali nu belemiu na Ia susumo mongakali manusia?
10De belemiu matisangalu, maumo opohowini,
belemiu nu hukum nu Tumpu Allah ma'idek hondo.
11Pa' katalasanggoan nu Tumpu Allah madi' mompotolokengkeng santuu' nu beleyum?
Pa' Ia anu okabuhuk aijo' madi' mompopobuhuk kinyonyoa nu belemiu.
12Iwi-iwi' na pokinde' nu belemiu sumomo abu' anu madi' ko kaliangannyo;
belemiu montinjohi, sumomo tano' ponto anu dengke hondo na mokubeng.
13Kalana aijo' pomohokotmo, sahanyo aku motatae!
Madi'mo ku pajuli maumo pa' mosia na ka'ahenannyo!
14Aku madi'mo mompele-pele' na silaka!
15Aku sabinmo, kalana madi'mo ko anu otaha'imani!
De nu silakaimo nu Tumpu Allah na aku, ku halala'akonmo na butongku aiya,
panyo ku poto'i ahi' na kahondoan nu kalakuanku i ahop-Nyo.
16Ihe na monsumbu' kalana aku baani sumo aijo' aku salamat,
kalana mian anu ma'idek na kinyonyoanyo madi' baani na mangadap hi Tumpu Allah!
17Uuka aiya hongo ima-ima' na potataengku;
hongo ima-ima' na anu ku tutuhakon.
18Anu jinadimo aiya i butongku ingitu-itumkumo da ku poto'imo;
sinumbu'kumo na aku madi' koko opisala'i!
19O Tumpu, de Belento tokamo mae ka' mompisala'imo aku,
aku momohokotmo ka' montanda'imo ajanku.
20Panyo popo'i'mo mae ohua' na anu ku kakaase aiya
da aku baani na po'ule' mangadap hi Belento:
21bolimo mae monsakisa aku,
ka' bolimo mae nu pokonai na aku nu tambuha' nu Belento anu talalo hondo mompopobuhuk aku!
22Potataemo mae, da ku taamimo,
kabai da akumo na motatae, lantas taamije mae!
23Sangkukamo na konjoo'nyo na sala' ka' dosa' anu binaungkumo?
Iwi-iwi' na kasala'an anu binaungkumo tionyo ahi' poto'imo mae Nu Belento!
24Kadaka' Belento nambamo ka' nompala'imo aku?
Apaa nasababnyo Belento monsangka aku sumomo sampobali' nu Belento.
25Aku ola sumo hon mohontang de motulumo na baleba,
madi' minsoop i akan na Belento mompopobuhukmo aku!
Aku ola sumo hat anu nanggasmo ka' nangkalualemo,
te toho' mule' na Belento lewa'mo mololoi' aku!
26Tinantukanmo nu Belento na ukunku anu ma'idek hondo hi belengku;
binalosakonmo nu Belento na kasala'anku tempo'nyo aku daagi' olitau.
27 #
Ayb. 33:11
Tengkengku pinungumo nu Belento nu lante' besak,
iwi-iwi' na ko langka-langkasku nujagai nu Belento.
Ka mule' pala nu tengkengku,
sabole-bole nutonto'i nu Belento.
28Sahingga aku napukmo susumo kau' anu nahutakmo;
susumo hude kinaanmo nu ane', aku nahu'mo.
Currently Selected:
AYUB 13: LAILOE
Highlight
Copy
Compare
Share
Want to have your highlights saved across all your devices? Sign up or sign in
