AYUB 14
14
1Salatanmo pe'e manusia aijo' pinohampe madi' moko ala mombau apa-apaa, ka' madi' mahoson;
umunnyo kodo' ka' saja' mongoa'i sansala.
2Ia minsumpe lantas mangkalualemo susumo bunga-bunga;
susumo lolung monti-montiik madi'mo otoa.
3O Tumpu Allah, madi' minsoop i akan na Belento mongka oho' monto mae aku,
ka' mompopangadap aku da oputusi nu Belento!
4Te toho' mule' na manusia anu baladosa'
moko ala mompodaagi' anu talalo hondo ma'ima'?
5Konjoo'nyo nu umun nu manusia tinantukanmo nu Belento;
konjoo'nyo nu bitu'onnyo pinatikolomo nu Belento.
Ka' mule' kinoyomo nu Belento toka iya na kantumuu'annyo;
ia madi' timbali moliu-liu.
6Bakasmo da ia mingkainmo, bolimo lewa' olingkang na ia;
da nu oa'i totu-totu'u na kasanangan nu kantumuu'annyo sampe tokamo i ka'ahenannyo.
7Daagi' ko anu nutaha'imani nu kau' anu tinaa'mo;
ia daagi' po'ule' minsumpe, ka' mimpanga'.
8Maumo i uno nu tano' bakatnyo napukmo,
ka' tu'onyo nanggasmo kalana nahutakmo,
9panyo de nukonamo nu uee ia po'ule'mo tumuu';
susumo anu sala'je sinu'an sinin na sumpenyo singkapmo lubat.
10Panyo de manusia silakamo, madi'mo daagi' ko anu lewa' monsisik;
ia silakamo lantas moyamo na ia?
11Sumo uee aijo' i talaga sinumo'oamo
sumo kaunyo tinolotutusmo ka' ilambakonnyomo no'oti na ueenyo,
12sumo aijo'mo na manusia anu sinilakamo:
ia madi'mo po'ule' tumuu'.
Ia madi'mo daagi' tolosikangkang de daagi' ko langit aita'
ia hoyo-hoyot madi'mo daagi' toho' mobula.
13Posulukmo mae na aku i uno nu dunia nu aha anu sinilakamo;
jagaiakon mae na aku sampe Belento madi'mo daagi' motambuha'.
Panyo patikolo mae ahi' na tempo'nyo sampe toka hipian
na monginau' mae butongku.
14Kalana de bisuannyo manusia silakamo
te ia daagi' po'ule' tumuu'?
Toka sansina-sinaa na aku montanda'i
sampe tokaje na tempo'nyo madi'mo ko kasansala'anku anu sumo aiya.
15Sahingga Belento molagamo aku,
ka' aku mule' montaamimo belento;
Belento po'ule'mo mule' mongkalibosi aku
manusia anu pinotimablimo nu Belento.
16Lantas pa' moya na palalangkasanku saja' nujagai nu Belento,
panyo madi'mo lewa' nu'inau' nu Belento na dosa'ku.
17Dosa'ku nu ampunimo nu Belento ka' nu alinakonmo nu belento;
kasala'anku u'utu mae madi'mo lewa' nututugi nu Belento.
18Saidi' mae sinin na bungkutnyo motuha-tuhanmo,
ka' bungkutnyo nu batu molinggi-lingginmo madi'mo ko anu manintimpas i tampatnyo.
19Iwi-iwi' na batu lewa'mo nukikisi nu uee anu mabohos hondo na mo'ili;
tano' nu anjuhakonmo nu ujan anu mabohos hondo.
Sumo aijo'mo na Belento madi'mo hondo-hondo mombee'i apaa-apaa na anu nu ima-imani nu manusia.
20Nupatundu'mo nu Belento na ia sampe toka sidu-sidutu';
sinaimo nu Belento na ia da mambamo ka' binali'anmo nu Belento na ohupnyo.
21To ana-anaknyo tinimbalimo mian anu tinalasanggomo,
panyo ia madi' nonsumbu-sumbu'.
Ka' de bisuannyo aha madi'mo o angga'i
madi' ko anu mompoto'i hi ia.
22Ola untuk nu butongnyo na nu oa'i;
ola kalibosan nu kinyonyoanyo na binaumo kasansala'annyo.
Currently Selected:
AYUB 14: LAILOE
Highlight
Copy
Compare
Share
Want to have your highlights saved across all your devices? Sign up or sign in
