AYUB 12
12
Ayub
1-2Tinaaman i Ayub, “Konanyomo, belemiu aiya mowakinimo iwi-iwi' na manusia.
De belemiu silakamo, kapandean bapikin suele silakamo ahi'.
3Aku suele manusia anu kokapandeannyo bapikin
iwi-iwi' apaa na anu pinoto'imo nu belemiu aijo' sinumbu'kumo.
Ka' mule' ihe na ma'isa nonsumbu' aijo' iwi-iwi'?
Jadi, boli belemiu monsangka au'aitu belemiumo na molingkudui aku!
4Aku kinokojoanmo nu sangalu ka' mian anu mompahasumbu',
yo aitu aku aiya hondo ahi' ka' madi' ahi' ko kasala'an.
U'utu mae tinaaman nu Tumpu Allah na do'angku,
de aku momoita tulung.
5Belemiu mongalu mian anu mohumpakmo kasilaka'an, belemiu na da madi' ahi' ko anu mompoposia,
mian anu me ise-ise' manabu'mo odoke nu belemiu.
6Panyo kantumuu'an nu mian anu saja' batololang, madi' mongoa'i kasusa'an;
mian anu baani na monggagakon Tumpu Allah, kantumuu'annyo sanang madi'ko anu mompoposia.
Padahan aha ola taha'iman hi pilogot,
ola posi kahosonan nu butong.
7Pokilawa hi tomonsi' ka' hi binatang sangga'at
sahingga belemiu nubee'i pokinde' nu aha.
8Poita na pokinde' hi iwi-iwi' na anu ko nyawanyo anu i dunia aiya ka' anu i ndalangon,
da ohongoje nu belemiu pa' mosia na koonyo.
9Iwi-iwi' aijo' ihe na madi' monsumbu',
kalana anu nompotimbali aha, aijo'mo Tumpu Allah?
10Ia na mompalentah iwi-iwi' na kantumuu'an nu anu pinotimbali-Nyomo;
ia na mongkuasai santuu' nu batu-batu manusia.
11Susumo jila'ku mongka'ima'i hondo monyamit anu o kaan,
sumo aijo'mo na bihingku mongka'ima'i hondo mohongo potatae nu mian.
12-13Tinogilelemo, kapandean bapikin ola ohumpak hi mian anu matangkasmo na umunnyo,
padahan kapandean bapikin ka' kahosonan ola ahi' hi Tumpu Allah.
Koonyo nu mian monsumbu' apa-apaa ohumpak hi mian anu matangkasmo na umunnyo,
padahan monsumbu' apa-apaa ka' kakuasa'an olamo ahi' ohumpak hi Tumpu Allah!
14Apaa na anu Nu tatakimo madi'mo daagi' opoko ala obau,
ihe na anu i hakop-Nyomo madi'mo po'ule' opolapas.
15Uee nu ompok, sahingga mo'oti ka' timbalimo inanggasan iwi-iwi';
po'ule' nu lubani da mo'ili, sahingga nu anjuhakonmo nu iyaba'!
16Tumpu Allah aijo' mahoson, madi' opoko ala ohungku'i ka' talasanggo!
Anu saja' mongakali ka' anu ingakalanmo mati aluk i kakuasa'an-Nyo.
17Po'ule'mo ingala-Nyo na kapandean bapikin hi to pama-pamalentah anu ko kakuasa-annyo,
ka' to pola-polaya' pinotimbali-Nyomo da lewa' okokojoi.
18Pinaha pobelenti-Nyomo na to tomu-tomundo ka' i hakop-Nyo na aha;
19madi'mo pinajuliannyo na to ima-imam ka' to pola-polaya' nu aha.
20Ginungguman-Nyomo na nganga' nu mian anu ma'idek na kinyonyoanyo,
po'ule'mo ingalanyo na kapandean bapikin nu to mia-mian anu langkai'mo.
21Pinopo'ambang-Nyomo na mian anu talasanggo;
ingala-Nyomo na kakuasa'an nu aha anu bala kuasa.
22Jiningkan-Nyomo na tampat-tampat anu madi' talalo majingka;
jiningkan-Nyomo na anu pikat hondo.
23To bansa-bansa pinotimbali-Nyomo nanjoo' ka' binilahimo,
lantas pinatean-Nyomo na aha sahingga nohopu'mo
24To pola-polaya' pinopusing-Nyomo,
sahingga aha lewa'mo namba madi' osumbu-sumbu' pa' moya na kalambanan.
25Aha lewa'mo nahakanyangan i uno nu pikat,
ka' nahapajokanmo mokiijo' ka' mo'uuka sumomo mian anu nalangumo kalana lewa'mo binatawa'.”
Currently Selected:
AYUB 12: LAILOE
Highlight
Copy
Compare
Share
Want to have your highlights saved across all your devices? Sign up or sign in
