AYUB 11
11
Zofar
1-2Lapas aijo' i Zofar notataemo, “Pa' madi' otaami na mian anu ola motatae madi' ko patu-patuunyo aijo'?
Pa' opototu'u ahi' na mian anu ola manjoo' na potatae?
3O Ayub, pa' koonyo nu beleyum kami madi' moko ala montaami beleyum?
Pa' koonyo nu beleyum ola ohokotakon mami na beleyum moween mae kami?
4De beleyum na mompotutugakon potatae nu beleyum atina' madi' sala';
de beleyum na mongoa'i beleyum belesi' hi ahop nu Tumpu Allah.
5Panyo, o'amalakon da Tumpu Allahje na motatae!
6Ka' o'amalakon da nupotoaje nu Tumpu Allah hi beleyum,
kalana kapandean aijo' manjoo' na ngangahannyo,
ka' madi' opoko ala nusumbu' nu manusia.
Sahingga mangalati'mo ahi' na beleyum saba' kasansala'an nu beleyum atina' ma'isa pe'e sangkuka,
de opokakanakon tiba hukuman anu memang konanyomo na nu talima nu beleyum.
7Te nupoko ala mule' nusumbu' nu beleyum totu-totu'u na tanga'an nu Tumpu Allah anu sahondo-hondonyo?
Te nupoko ala mule' nusumbu' nu beleyum na kuasa-Nyo?
8Kuasa-Nyo na lebe matangkas molingkudui kotangkasnyo nu langit;
madi' nupoko ala nu kawe nu beleyum na kuasa-Nyo ka' madi' nupoko ala nuhumpak nu beleyum.
Kuasanyo lebe maleeng molingkudui dunia nu mian anu sinilakamo,
madi' nupoko ala nusumbu' totu-totu'u.
9Kuasa nu Tumpu Allah na lebe ewa molingkudui ewa nu dunia,
ka' lebe bolaa molingkudui bolaanyo nu ndalangon.
10De Nuhakop na beleyum ka' Nuboa i tampat pomputusian-Nyo palakala,
saba' ihemo ahi' na baani montewa' apaa na anu kahanda'mo Nu bau?
11Nusumbu' hondo nu Tumpu Allah na mian anu baleko';
anu ma'idek na nubau nu aha madi' ka' madi' nutoa ahi' nu mata-Nyo.
12De keledai tinanyo ma'ela monganakmo anaknyo manyaam,
yo sumo aitumo na mian ponga' timbalimo pande ka' mangalati'.
13O Ayub, pobelesimo na kinyonyoa nu beleyum, ka' pompele-pele'mo!
Balado'amo hi Tumpu Allah!
14Alinimo na dosa' i uno nu kinyonyoa nu beleyum
ka' alinmo jo'o-jo'on na kalakuan anu ma'idek anu itina' i laigan nu beleyum!
15Sahingga moko ala saban ka' baani na mongahopi kantumuu' an nu beleyum;
beleyum tantu mahoson na tuminjo ka' madi' timbali mangada' na kinyonyoa,
16ka' mule' kasansala'an nu beleyum madi'mo nu inau' nu beleyum;
susumo iyaba' anu mo'oingmo nukolilimimo nu mian.
17Kantumuu'an nu beleyum lebemo majingka nulingkuduimo na sinaa,
ka' kantumuu'an nu beleyum anu lewa' pinintung majingkamo susumo jingkanyo daagi' subu.
18Beleyum madi'mo momosia ka' ko anumo otaha'imani;
Tumpu Allah monjagaimo beleyum sahingga beleyum madi'mo ko anu mompoposia.
19Beleyum madi'mo mabuhuk hi mian anu mongka'ideki;
manjoo' na mian momoitaje tulung hi beleyum.
20Panyo mian anu ma'idek na kalakuannyo montoa ia masakit na ubaknyo,
kalana hi aha madi' ko anu montulungi.
Me sa'a-sa'angu'nyo na anu nutaha'imani nu aha aijo'mo da ukun sampamo mae toka.”
Currently Selected:
AYUB 11: LAILOE
Highlight
Copy
Compare
Share
Want to have your highlights saved across all your devices? Sign up or sign in
