YESAYA 41
41
Tumpu nompoyakinmo Israel
1Koonyo nu Tumpu, “Pomohokotmo ka' potombihing mae na Aku,
o, to mia-mian anu jojoong ilipu' anu toto jo'o-jo'on.
Balasadiamo ka' mangadapmo hi mian kopian,
lajangmo ka' poto'imo na palakala nu beleyum.
Imbo' da kita opalesamo hingga-hinggat.
Da oputusimo pa' ihe na anu totu'u kabai pa' ihe na sala'.
2Ihe na nompotuka anu balakuasa lengkat mae i kabete'an
ka' saja'mo nompo untung ia nahampate?
Ihe na nontulungi ia sahingga nompatundu'mo bansa-bansa
ka' mule' nohungku'imo to tomu-tomundo' tina aluk hi ia?
Bajaknyo na nombau aha da nohintutu susumo abu',
pana'nyo na nompotatabumo aha
susumo hat pinuhakonmo nu mombun.
3Ia saja'mo nololoi' ka' namba madi' koanu labot nohalangi;
tengkenyo malia' hondo mompai madi'mo tudun ijalan.
4Ihe na nombaumo iwi-iwi' aijo'?
Ihe na nontantukanmo da kinosisikonnyo?
Aku, Tumpu, Akumo na anu momona,
ka' tataap sabole-boleh daagi' sampe imihinyo mae.
5Mian anu jojoong ilipu' anu toto jo'o-jo'on nontoamo mae
apaa na anu binaung-Kumo.
Aha tinolokengkengmo ka' ilakatnyomo kalana nabuhukmo,
lantas sinihukmo hingga-hinggat ka' tinokamo mae.
6Iwi-iwi' na mian nompaha tulu-tulungimo,
ka' nompaha bebee'imo pikilan da mahoson nakinyonyoa.
7Tukang kau' mompohoson kinyonyoa nu tukang mosoni'
mian anu momponipis logam nu malatelu,
mompuji' mian anu montutuk ilandasan.
Ia notatae, ‘Ma'ima' hondo na pakalaja'an nu beleyum’;
lantas pinaka pohosonnyo mule' nu paku'
da madi' gayu'an.
8 #
2Taw. 20:7, Yak. 2:23 Panyo beleyum Israel posaihon-Ku,
mian anu pinile'an-Kumo
beleyum lee' mae i Abram,
sampobela'-Ku.
9Beleyum ingalang-Kumo lengkat mae i pupus nu tano'
ilagang-Kumo lengkat mae itampat anu toto jo'o-jo'on.
Aku notatae, ‘Belentomo na posaihon-Ku;
Aku sabole-boleh ahi' montalima anu pinile'an-Kumo.’
10Boli mabuhuk kalana Aku na monsangalui beleyum,
boli baat-bata, kalana Aku na Tumpu nu beleyum.
Beleyum Ku pokododomo ka' Ku tulungimo,
Ku taka'mo nu limang-Ku anu timbali otaha'imani.
11Soba toa na mian iwi-iwi' anu notambuha'mo hi beleyum,
opatundu'mo ka' ma, ambangmo hondo.
To mia-mian anu madi' tulut hi beleyum,
silakamo ka' ingkoting.
12Beleyum moliomo aha to mia-mian anu madi' tulut hi beleyum,
panyo madi' nu kabot na aha.
Aha to mia-mian anu nahampate nongewa mae beleyum
uuka aiya singkapmo sinilaka ka' imadi'anmo.
13Kalana Aku, Tumpu, Tumpu nu belemiu
nontoongimo ‘lima koanan nu beleyum.’ ”
14Tumpu notatae, “Boli mabuhuk, Israel,
maumo ahi' beleyum ise' ka' madi' mahoson.
Aku Tumpu na montulungimo beleyum,
Anu Susi' hondo, Tumpu nu Israel
aijo'mo na Momposalamat beleyum.
15Soba toa, pinotimbalimo nu Beleyum na aku susumo dopi' anu bau pongututan,
anu salaje binau, matajom ka' kobese'nyo uanjiji'
Beleyum mongututmo bungkutnyo iwi-iwi' ka' mohansunimo;
puge'nyo iwi-iwi' nu potimbalimo susumo ota'.
16Beleyum montapimo aha
lantas aha nu lahabakonmo nu mombun ka' nu sagakonmo nu antong anu daka'.
Beleyum lame'mo kalana Aku, Tumpu,
ka' bilahimo kalana Aku, Tumpu nu Israel.
17De bansang-Ku sisinoe'mo aijo' moliomo uee,
ka' gogohong nu aha pakamo kalana negotmo,
saba' Aku, Tumpu na montaamije do'a nu aha;
Tumpu nu Israel na madi' ahi'
mompala'i mian anu palesayamo hi Ia.
18Ku bauimo kaunyo da mo ili ito puge-puge'nyo anu madi' ko anu montumuu'i;
mata nu uee lubatmo, mimbulalakmo mae itotonga' nu katano'an.
Padang tampat anu mateges Ku potimbalimo talaga;
uee lubatmo mae lengkat itano' anu kinunmo.
19Padang tampat anu mateges Ku su'animo kau' cemara,
kau' zaitun, kau' murad, tiba kau' akasia.
Padang tampat anu ewa Ku potimbalimo alas,
alas nu kau' eru, kau' berangan, tiba kau' cemara.
20Sahingga iwi-iwi' na mian montoamo ka' monsumbu'mo
taalu' Aku, Tumpu, na anu nompotimbalimo.
Aha mompalahatikanmo ka' mule' mangalati'mo
Tumpu nu Israel anu susi' na nompotimbali aijo' da jinadi.”
Tumpu nompisala'imo to pilo-pilogot
21Tumpu, tomundo' nu Israel, notataemo hi to pilo-pilogot,
“Kalakmo mae na palakala nu beleyum,
poto'i mae pa' apaa na saba-sababnyo!
22Tokamo mae, ka' kila-kilamo pa'apaa na anu saidi' mae jadi,
da osumbu' mami pa' mosia na ka ahenannyo.
Poto'i mae na hahan anu jinadimo naipuan mae,
talangkan mae na alati'nyo da opalahatikan mami.
23Poto'i mae pa' apaa na anu jadi saidi' mae,
da osumbu' mami na belemiu taalu' totu-totu'u ahi' ko kuasa nu Tumpu.
Soba bau mae na anu ko gunanyo kabai anu mompolugi',
da kami bangang na montoa.
24Memang ahi' belemiu ka' mule' palabuatan nu belemiu imadi'an ahi',
ka' anu nusombah nu belemiu ola da okaideki.
25Aku nompotukamo samian anu lengkat mae i sasu kabete'an;
Ilagang-Kumo na ia da montumbuhimo mae lengkat mae sasu utara.
To mia-mian anu balakuasa nu pahampeja'akonmo susumo hensek,
susumo mian anu lewa' mombau kuhon tano' mompahampeja'akonmo tano' ponto.
26Ihe na anu atina' hi belemiu nompoto'imo anu jadi aiya mae i ahop
sahingga kami timbali mompototu'u ia?
Panyo atina' hi belemiu madi' ahi' ko anu mae nompoto'i,
madi' ko anu nohongo belemiu notatae.
27Aku, Tumpu na momona nompolele hi Sion;
Aku na nonsai aku nomboa lele ma'ima' hi aha Yerusalem.
28Tempo'nyo Aku nolio ia hi aha to pilo-pilogot,
madi' kosamian pe'e na nompotiju mae,
madi' ko anu noko ala nontaami.
29Memang pilogot haha aijo' madi' kogunanyo,
aha na ola ahi' patong anu sinuang anu madi' moko ala mongkohenggo,
ka' madi' ahi' moko ala mombau apa-apaa.”
Currently Selected:
YESAYA 41: LAILOE
Highlight
Copy
Compare
Share
Want to have your highlights saved across all your devices? Sign up or sign in
