YESAYA 40
40
Potatae anu otaha'imani
1Sumo uuka potatae nu Tumpu nu belemiu,
“Hase'mo-hase'mo na bansang-Ku!
2Potenangmo nakinyonyoa nu aha Yerusalem,
poto'i taalu' tobotuanan imadi'anmo.
Kasala'an nu aha ingampunan-Kumo,
iwi-iwi na dosa nu aha ihukum-Kumo lipat pinduan.”
3 #
Mat. 3:3, Mrk. 1:3, Yoh. 1:23 #Luk. 3:4-6 Daagi' ko potatae anu lewa' nontaloakon,
“Posadia na jalan ipadang tampat anu mateges da bau kajalanan nu Tumpu.
Pohodi' na jalan daka' ipadang tampat anu loas da bau kajalanan nu Tumpunto!
4Iwi-iwi na bangka'nyo tionyo ahi' otabuhi,
bungkutnyo tiba puge'nyo opohata.
Tano' anu mapuge' pojadimo da mahata
ka' anu milebo-lebok opalonde'mo.
5Sahingga kaholomatan nu Tumpu oponyata'mo;
iwi-iwi' na manusia monsakisimo.
Totu-totu'u, Tumpu binalajanji'mo!”
6 #
Yak. 1:10-11, 1Ptr. 1:24-25 Daagi ko potatae anu lewa' nontaloakon, “Polelemo!”
Pinokilawangkumo, “Apaa na anu tionyo ahi' ku polele?”
“Polelemo taalu' manusia sumo hemput,
sumo bunga-bunga anu ola sasaingoni' na ia ma'ima'.
7Hemput manggasmo ka' bunga-bunga magayoumo,
de Tumpu mompuhakon mae mombun anu mapanas.
Totu-totu'u bansa aijo' sumo hemput.
8Hemput manggasmo ka' bunga-bunga magayoumo,
panyo potatae nu Tumpunto tataap sampe toka sidu-sidutu'.”
9Pindakomo pokiita ibungkutnyo mata-matangkas,
ka' poto'i na lele ma'ima' hi Yerusalem!
Loboo'akon daka-daka',
ka' poto'i na lele ma'ima' hi Sion!
Poto'i hi kota-kota' nu Yehuda,
taalu' Tumpu nu aha tokamo mae!
10 #
Yes. 62:11, Why. 22:12 Soba toa, Tumpu tokamo mae tiba kakuasa'an-Nyo
da mompalentahmo nu kabaanian-Nyo.
Ia nu tuntuni mae nu to mia-mian anu pinobebas-Nyomo.
11 #
Yeh. 34:13-15, Yoh. 10:11 Susumo samian na polaya' nu binatang na Ia mompotuu', potuu'on-Nyo;
Ia na nomposihuk aha.
To ana-anak nu domba Nu tangkung mae,
madi' Ia monsigohi mae na montuntuni to tina-tinanyo.
Tumpu nu Israel madi' ko anu mongkakanai
12Ihe na moko ala montakan ndalangon nu pala nu limanyo,
kabai mongukun aita' langa ola ojingkan nu lima?
Ihe na moko ala montakan tano' nu dunia aiya nu pontakan,
kabai montimbang bungkutnyo tiba puge'nyo nu timbangan?
13 #
Rm. 11:34, 1Kor. 2:16 Ihe na moko ala mompotiju' Tumpu,
kabai mompogulu' Ia salaku mian anu lewa' mompokinde'i Ia?
14Ihe na lewa' bau pompokilawan nu Tumpu
da timbali monsumbu' ka' mangalati'?
Ihe na nompotiju' Ia da nompalentah madi' ko anu sinala'?
15Tumpu montoa mae bansa-bansa idunia aiya ola susumo uee sanjoliji i uno nu pontauk uee,
ola susumo sangkonuku na abu' itimbangan neraca;
iwi-iwi na togong ola susumo ko laingnyo nu abu' anu ihansunmo hondo.
16Iwi-iwi' na binatang i, alas nu Libanon madi' sampa'
na bau koloban anu opotunu;
iwi-iwi' na kau'nyo talalo ahi' sangkiding
na bau kau' anu oposun.
17Iwi-iwi' na bansa madi' ko alati'nyo hi Ia,
pokakanamo ahi' madi' ko anu i ahop-Nyo.
18 #
Kis. 17:29
Jadi ihe na timbali bau pompokakana konan nu beleyum Tumpu?
Ihe na nu anggap pokakana tiba Ia?
19Ia na madi' ahi' susumo patong nunu bau nu to tuka-tukang
patong anu olapisi nu mosoni' ka' olatasi nu salaka.
20Mian anu madi' moko ala mongoli mosoni' kabai salaka
mompile'mo kau' anu madi' dengke na mahu'.
Ia moliomo tukang anu pande na mombau
da mombauakon patong anu madi' sampaa geguan.
21Madi' minsoop i, akan na beleyum madi' monsumbu-sumbu' ka' mule' ma'isa nohongo,
ka' madi' pinoto'i hi beleyum salatan pe'e nai puan mae?
Madi' minsoop i, akan na beleyum madi' mompangalati'i salatan pe'e momonanyo mae,
mosia na momonanyo mae na dunia aiya?
22Anu nompotimbali ia jojoong ibuan nu dunia aiya anu timpo-timpodon
mian anu jojoong i unonyo otoa mae me toto ise-ise' susumo kihi-kihi'.
Ia nomboka langit susumo hude,
ka' nompokona susumo kemah bau kajojoongan.
23Binau-Nyomo na to mia-mian anu balakuasa da madi'mo moko ala mombau apa-apaa,
ka' to pama-pamalentah madi'mo ko kakuasa'annyo.
24Aha aijo' sumomo ahi' sosu'anon anu ma'isa daka',
anu montampu'unije tumuu' na bakatnyo.
De nu puhakonmo nu Tumpu na mombun,
aha manggasmo ka' nulahabakonmo nu mombun susumo hat.
25Ihe na nu anggap pokakana sumo Tumpu Anu Daka' na Kuasanyo?
Ihe na bau pompokakanakonan nu beleyum Ia?
26Sinda mokiita' ilangit ka' soba palahatikan!
Ihe na nompotimbalimo iwi-iwi na mandala'?
Ia na anu nongatunmo aha susumo gombuan nu suludadu,
Nu sumbu' na konjoo'nyo nu aha iwi-iwi' ka' molaga totosamian sanggo nu aha.
Madi' ko samian pe'e na nolapus,
kalana kakuasa'an nu Tumpu daka' hondo.
27Jadi beleyum Israel kadaka' beleyum saja'mo montaeakon kasusa'an,
au' aitu Tumpu nu beleyum madi' monsumbu' kasusa'an nu beleyum?
Au' aitu Ia madi'mo monginau beleyum,
ka' madi'mo mompalahatikan hak nu beleyum?
28Minsoop i, akan mule' na beleyum madi' monsumbu' ka' mule' madi' nohongo?
Tumpu anu sampe toka sidu-sidutu' anu nompotimbalimo songko-songko na dunia aiya.
Ia madi' toho' mongoa'i lawe kabai pa' lu'us;
pikilan-Nyo madi' opoko ala osumbu'-sumbu'.
29Ia mompohoson mian anu nalawemo,
mongkakeha'i mian anu madi'mo moko ala mombau apa-apaa.
30To oli-olitau malawemo ka' mule' lu'usmo,
to ana-anak anu ma'isa talalo daka' tinombahangkangmo kalana tinosumpun.
31Panyo mian anu montakabunakon Tumpu,
saidi' mae po ule'mo mohumpak kahosonan.
Aha pokakanamo sumo bonyia',
anu lumahap matangkas kalana kahosonan nu polipiknyo.
Aha lewa' mopadeka' panyo madi' malawe,
aha lewa' lumajang panyo madi' lu'us.
Currently Selected:
YESAYA 40: LAILOE
Highlight
Copy
Compare
Share
Want to have your highlights saved across all your devices? Sign up or sign in
