YESAYA 2
2
Kadamean anu sampemo toka sidu-sidutu'
(Mi. 4:1-3)
1Sumo uuka na pinotuun nu Tumpu mongkona Yehuda tiba Yerusalem anu tinalima i Yesaya anak i Amos:
2Isinaa anu aiya mae ihop
puge'nyo tampat Laigan nu Tumpu matangkasmo
ka' tuminjo'mo hodi-hodi' aita ito bungku-bungkutnyo ka' mule' to puge-puge'nyo.
Iwi-iwi' na bansa moduyu-duyutmo mamba mokiijo',
3aha iwi-iwi' motatae,
“Imbo' da kita mokiita' mindako i ‘Bungkutnyo nu Tumpu,’
ilaigan nu Tumpu Israel.
Laje na mongajan mae kita
apaa na anu tionyo ahi' obaunto.
Kita mombatukimo kajalanan-Nyo
kalana ajalan nu Tumpu molengkat mae i Yerusalem,
Ia motatae lengkat mae i Sion.”
4 #
Yl. 3:10, Mi. 4:3 Ia na momputusi aha to bansa-bansa,
ka montantukan kaputusan nu palakala hi aha tulunan nu to bansa-bansa.
Bajak otutukmo da timbalimo aja'
ka' mule' talombo' otutukmo da timbali piso' bau pongkis.
Aha to bansa-bansa madi'mo lewa' mompaha tubu-tumbuhi,
ka' mule' madi'mo lewa' balasadia da mahampatemo.
5O, lee' mae i Yakub,
imbo' kita lumajangmo ijingka nu Tumpu!
Mian anu buulon opateimo
6O, Tumpu Belento nompala'imo mian anu palesayamo hi Belento, lee' mae i Yakub! Kalana iyaya mae ilipu' aiya mian lewa'mo mompake pangatahuan anu nolengkat ame isasu kabete'an ka' anu nolengkat mae hi aha mian nu Filistin. Aha to mia-mian montulutimo adat nua aha mian anu lengkat mae isalipu'an. 7Lipu' nu aha kaho' mosoni' tiba salaka, ka' mule' halata' nu aha manjoo' hondo. Ajahan nu aha manjoo' hondo ka' mule' kareta nu aha madi'mo opoko bilang na konjoo'nyo. 8Iyaya mae ko bapilogotan, ka' mule' aha monsombah pato-patong anu nu posi bau nu aha.
9Toto samian o'alumo ka' opopo ambangmo. Boli mongampuni aha o Tumpu!
10 #
Why. 6:15, 2Tes. 1:9 Aha saidi' mae minsoopmo liang anu i to puge-puge'nyo nu bungkutnyo nu batu gahanggan kabai mongkekemo bolo' itano' bau paninsulukan da madi' nu kona nu tambuha' nu Tumpu tiba kuasa-Nyo anu talasanggo. 11Ola-olanyomo ahi Tumpu na anu opopodaka'. 12Toka isina aijo' Tumpu Anu Daka' na Kuasanyo mompopo'ambangmo iwi-iwi' na anu montige-tige ka' mule' mohukumo iwi-iwi' na anu buulon tiba anu lewa' montige-tige. 13Iwi-iwi na kau' cemara anu toto tangka-tangkas i Libanon ka' mule' iwi-iwi' na kau' toto daka-daka' i Basan ohansunimo. 14To bungku-bungkutnyo ka' mule' to puge-puge'nyo anu toto ima-ima' opohatamo. 15Laigan toto tangka-tangkas ka' mule' iwi-iwi' na pagan mesen anu ko bentengnyo ohobo'akonmo. 16Kapan anu toto daka-daka' hondo ka' mule' ma'ima' olomosimo. 17Mian anu buulon opopo ambangmo ka' mule' mian anu lewa' montige-tige opota'alukmo. Ola-olamo ahi' Tumpu na anu opopodaka'. 18To pilo-pilogot imadi'anmo ingko-ingkot.
19-21Salatan Tumpu totinjomo ka' monggayu'mo dunia aiya mian singkapmo minsoop iliang anu i to puge-puge'nyo nu batu gahanggan kabai mongkekemo bolo' itano' da madi' nu kona nu tambuha' nu Tumpu ka' mule' kakuasa'an-Nyo anu talasanggo aijo'. De sinaa aijo' tokamo mae to pilo-pilogot anu mosoni' na binau kabai salaka nunu sombah nu aha aijo' nu pala'imo nu aha madi'mo nu kali-kalinga nu aha timbalimo bahagian nu bokoti' tiba poniki'.
22Jadi boli montaha'imani mian anu madi' tumuu' batu kalana ia madi' ko angga'nyo.
Currently Selected:
YESAYA 2: LAILOE
Highlight
Copy
Compare
Share
Want to have your highlights saved across all your devices? Sign up or sign in
