YESAYA 3
3
Kinalangkabutmo na Yerusalem
1Memang Tumpu Anu Daka' na Kuasanyo mongalamo iwi-iwi' na palasadia'an i Yerusalem tiba i Yehuda aijo'mo au okaan ka' mule' uee. Ka' suele iwi-iwi' na mian anu nu taha'imani nu aha: 2to suludadu anu toto babani tiba tiba to sulu-suludadu biasa, to mia-mian kopian, to mia-mian anu lewa' montahi'i ka' mule' to mia-mian anu lewa' mompokinde'i, 3to sulu-suludadu anu toto tangka-tangkas na pangkatnyo, to mia-mian anu matangkas na pangkatnyo, ka' mule' anu toto pande i negara, to mia-mian anu pangatahuanon, tiba to sando-sando. 4Tumpu mohangkatmo to oli-olitau da timbali polaya' nu mian da'isan ka' aha mompalentahmo madi' ko ka adilannyo. 5Aha to mia-mian mompaha bebee'mo kasusa'an. To oli-olitau madi'mo mompajuli aha to tu'a-tu'anyo ka' mian anu kasiasi madi'mo mompajuli mian anu kaya.
6Tempo'nyo aijo' mian montiju'mo sala' samian na utusnyo ka' motatae hi ia, “Ola beleyum na ko baju' anu pantas opake; kalana aitu timbalimo bau polaya' mami itempo' anu sinusa'mo sumo aiya.”
7Panyo ia montaami, “Aku misa' sando! Aku suele madi'mo ko anu okaan ka' pakean anu opusok. Boli mae opokau na aku timbali polaya' nu bansa!”
8Memang Yerusalem madi'mo kino angga'nyo! Yehuda madi'mo tinala sanggo! Kalana iwi-iwi' na potatae tiba palabuatan nu aha madi'mo nontuluti Tumpu ka' madi'mo nompajuli kakuasa'an-Nyo. 9Kalakuan nu aha bubuulon ponsumbu'anmo palabuatan nu aha ma'i-ma'idek. Nu totonggolakonmo nuaha na mombau dosa' susumo aha mian nu Sodom naipuan mae. Silakamo na aha! Aha mosi silakaimo posi butong nu aha.
10Tumpu notatae, “Poto'i hi mian anu tulu-tulutan hi beleng-Ku, saba aha mohumpakmo kantumuu'an ma'ima' ka' salamatmo. Nu lasaimo nu aha na lawe nu pakalaja'an nu aha. 11Panyo silakamo na mian anu ma'idek na kinyonyoanyo! Aha osakisamo susumo aha nonsakisamo mian sangga'at.
12Mian anu palesayamo hi beleng-Ku osakisamo nu mian anu lewa molio kauntungan ka' nu akalimo nu mian anu osanggohi linta' nu katano'an.
Mian anu palesayamo hi beleng-Ku nu pobingungmo nu to pola-polaya' sahingga madi'mo nu sumbu' nu aha na anu obau.”
Tumpu momputusimo mian anu palesayamo hi Ia
13Tumpu sinadiamo da po ule'mo obali'i nakaputusan hi aha mian anu palesayamo hi Ia. 14Tumpu mongulusmo susumo mian kopian hi aha to pola-polaya' nu aha mian anu palesayamo hi Ia. Sumo uuka na Tumpu nontudu aha; “Belemiumo na nontomang iwi-iwi' na isi nu ale' nu anggur; laigan nu belemiu kahomo balang anu ingagoan nu belemiu hi aha mian anu kasiasi. 15Kadaka' belemiu nonsakisamo mian anu palesayamo hi beleng-Ku ka' lewa'mo nongakali mian anu kasiasi? Aku, Tumpu Anu Matangkas na Kuasanyo ka' mule' Anu Daka' na Kuasanyo notataemo.”
Pokinde' hi to bou-boune nu Yerusalem
16Tumpu notatae, “Buulon hondo na to bou-boune nu Yerusalem! Aha saja' honbagaya ka' saja mata kalajang ka' mule' aha lumajang saja' kotige-tige. Aha lu majang sumo anu obau-bau ka' gilinsingan na galang nu tengkenyo. 17Panyo Ku hukumo na aha; ubak nu aha saidi' mae kahomo kumahut ka' okismo.”
18Saidi' me de tempo'nyo tokamo Tumpu mongalamo to bou-boune nu aha Yerusalem haha aijo' iwi-iwi na palahiasan anu nunu kabubuulakon nu aha; saladun nu aha, galang nu tengke nu aha, olo' nu aha, 19galaang nu lima nu aha, pikukumbung nu aha, 20sigut nu aha, ajimat anu opobobot i botokon tiba ikompong, 21sinsing nu aha tiba anting-anting nu aha anu opokait i suung. 22Baju' anu opake ibau-bauon, anu toto ima-ima' model nu mantel nu aha, dampet nu aha, 23baju moni-monipis nu aha, baju' lenan nu aha, salendang igogohong nu aha, tiba kukumbung manta-mantan nu aha.
24Uuka aiya aha mompake minya-minya anu toto noho-nohong, saidi' mae aha mamabusikmo. Pombutu' nu aha anu ma'i-ma'ima hondo obolosimo nu kahohon anu madi' ma'ima'. Ubak nu aha anu ko bulunyo nu ubak anu ma'ima' hondo saidi' mae okiismo. Baju nu aha anu toto ima-ima' saidi mae obolosimo nu anu toho'mo lewa' pinusok nu mian. Uuka aiya aha singkap handa; saidi' mae ohup nu aha ma'idekmo kalana osapmo.
25To momo'ane anu toto hoso-hoson saidi' mae silakamo i uno nu pahampatean. 26Isabatan toto daka-daka' nu kota' mian humangmo ka' lewa'mo tumando' ka mule' kota' aijo' saidi' mae sumomo boune anu ilanggo'anmo anu suha-suhang i tano'.
Currently Selected:
YESAYA 3: LAILOE
Highlight
Copy
Compare
Share
Want to have your highlights saved across all your devices? Sign up or sign in
