YESAYA 1
1
1 #
2Raj. 15:1-7, 15:32-38, 16:1-20, 18:1–20:21, 2Taw. 26:1-23, 27:1-9, 28:1-27, 29:1–32:33 Kitab aiya isinyo to potu-potunon toka i Yehuda ka' Yerusalem anu pinonyata'mo nu Tumpu hi Yesaya anak i Amos tempo'nyo i Uzia, Yotam, Ahas ka' Hizkia nompalentah Yehuda.
Tumpu mompokinde'imo mian anu palesayamo hi Ia
2Potombihing pe'e mae langit, palahatikan pe'e mae tano'! Tumpu notatae, “To ana-anak anu kinale sangkumo notomuhukmo hi beleng-Ku. 3Sapi' monsumbu' tumpunyo, keledai nusumbu' na pongkaanannyo anu saja' nuposadia nu tumpunyo. Panyo mian-Ku Israel anu palesayamo madi'mo aha madi' monsumbu'.”
4Silakamo na belemiu bansa anu binaladosa', to mia-mian anu palalente ka' mian anu ma'idek na kinyonyoanyo! Belemiu inanabu'mo kalana-binaladosa'mo na belemiu. Belemiu madi'mo nonsumbu' Tumpu ka' nohikuhakonmo Tumpu anu Talalo hondo susi' anu tionyo ahi' osombah nu belemiu. 5Kadaka' belemiu me saja' monggagakon? Mongka'oho' na belemiu da o hukum nu anu lebe talalo maboat hondo? Ubak nu beleyum sinongkomo nu kumahut anu minana' ka' mabusik, ma'idekanmo na kinyonyoa nu beleyum ka' pikilan nu beleyum. 6Lengkat pe'e i ubak toka-toka i pala nu tengke madi'mo daagi' ko anu ma'ima i butong nu beleyum. Kahomo binangkak na butong nu beleyum, kahomo ningkalubabang ka' mule' kahomo bela. Bela haha aijo' ma'isa dinagusan kabai binobodan, ma'isa mule' pinakuli'an nu lanya'.
7Lipu' nu belemiu ingideanmo; kota-kota' nu belemiu pinapuanmo iwi-iwi'. Mian anu i salipu'an nongalamo tano' nu belemiu ka' ingideannyomo na isinyo. 8Ola Yerusalem na madi' ingidean, panyo susumo kota anu tinumbuhan mo, ka' madi'mo noko ala gawe, susumo tahop i ale' nu anggur ka' tahop i ale' nu kantimun. 9#Kej. 19:24, Rm. 9:29 De bisuannyo Tumpu Anu Daka' hondo na Kuasanyo madi' nongala aha to pia-piangkuka na mian, kita sinilakamo iwi-iwi' mimbalu-balu' mo Sodom ka' Gomora.
10Yerusalem tiba to pola-polaya' ka' bansa nu belemiu tinimbalimo nimbalu-balu'mo mian nu Sodom ka' Gomora. Apaa na anu pinalentahkon nu Tumpu hi belemiu hongo mae; apaa na anu ingajanakonmo nu Tumpu-nto opalahatikan. 11#Am. 5:21-22 Tumpu notatae, “O sangka nu belemiu Aku mongka'ima'i koloban anu saja' osombahkon nu belemiu hi beleng-Ku? Aku na'osamo nu koloban nu to domba-domba anu otunui nu belemiu, ka' lompo' nu anak nu sapi' nu belemiu. Baso' nu sapi' lakinyo domba ka' mee' madi' Ku ka'ima'i. 12Ihe na nonsai mae belemiu momboa mae iwi-iwi na anu osombahkon tempo'nyo belemiu mamba mae monsomba hi beleng-Ku? Ihe na nonsai mae belemiu mahalajangan i Laigan-Ku anu Susi'? 13-14Palasuma hondo na momboa mae anu osombahkon nu belemiu aijo. Aku monguahimo mamongook nohongnyo. Ku ka'ideki ka' madi' ko poko tahan na montoa belemiu molame'akon Bitu'on Bu'ou, to sina-sinaa nu Sabat ka' to sina-sinaa anu olame'akon ka' mule' kasintomuan-kasintomuan nu agama. Iwi-iwi' aijo' ihumimianmo nu dosa-dosa' nu belemiu sumomo boaon-Ku; Aku kinainmo na nonsimbu.
15De komiu balado'a mohangkat lima nu belemiu, saba' Aku madi' mompalahatikan. Aku madi' mompajuli mau manjoo' na do'a nu belemiu, Aku madi' mohongo, kalana lima nu belemiu aijo'mo na anu pinatean nu belemiu. 16Baso'i na butong nu belemiu sampe belesi'. Iwi-iwi' na palabuatan ma'idek aijo' bolimo ahi' obau nu belemiu, 17o'ajan na mombau ka'ima'an. O toongi dodo-dodo na ka'adinan ka' boli obau na mongkabisa'i; bee'akon na hak nu aha anak anu madi'mo kotuumanyo ka'tinanyo ka'otinjohi na palakala nu anu balumo.”
18Tumpu notatae, “Imbo' da oputusi na palakala aiya. Mau mule' belemiu imea'anmo tala-talalu nu dosa' nu belemiu, panyo belemiu Ku baso'imo sahingga timbalimo mopute' susumo kapas. Mau mule dosa' nu belemiu talalo manjoo' ka' maboat, belemiu totu-totu'u Ku ampunimo. 19De belemiu kahanda' ahi' tulu-tulutan hi beleng-Ku, belemiu timbali mongoa'i iwi-iwi' anu ma'ima' anu nu hasinakon nu lipu' nu belemiu. 20Panyo de belemiu madi mohongo-hongo Aku, belemiu matemo i uno nu pahampatean. Akumo na Tumpu anu notataemo.”
Kota' anu tobuntus
21Imonanyo kota' aijo' tulu-tulutan, uuka aiya sumomo samian na anu lewa' masala'! Imonanyo iwi-iwi' na miannyo anu monjojoongi adin ka' mohongo-hongo, panyo uuka aiya jinojoonganmo nu anu topopatei mian. 22Yerusalem u'utu mae beleyum sumo salaka, panyo uuka aiya madi'mo ko olinyo. U'utu mae beleyum sumo anggur anu matami' panyo uuka aiya sumomo uee tolang. 23To pola-polaya' nu belemiu la lewa' motomuhuk ka' lewa' mombulingakon obee' hi mian; aha mongka'ima'i mongala palasen, ka' doi anu pontamboi nu mian. Aha madi' mongka'oho' montinjohi anu madi'mo ko tuumanyo ka' tinanyo iulusan nu aha mian kopian; ka' mule' madi' mongka oho' kabalatan nu tobalu-balu.
24Kalana aijo' Tumpu Anu Daka' na Kuasanyo, Tumpu Israel notatae, “O, mian anu monsampobali' Aku, Ku balosakonmo na idekku hi belemiu sahingga belemiu madi'mo monsusa'i Aku. 25Aku nongalamo sa'angu' na kantantuan mongkona hi belemiu. Susumo mompotimbalimo mosoni' anu madi' kogalo'nyo, belemiu Ku potimbalimo da madi' ahi' kogalo'nyo; iwi-iwi' na anu mahenyu anu atina' hi belemiu Ku alinakonmo. 26Belemiu po ule'mo Ku bee'i to mia-mian ko pian ka' mule' anu lewa' mompokinde'i susumo nai puan mae. Sahingga Yerusalem osanggohimo kota' anu adin ka' mule' susi'.”
27Tumpu adin kalana aijo' Nu posalamatmo na Yerusalem tiba miannyo anu i kiijo' anu mombabali'imo palabuatannyo. 28Panyo aha to mia-mian anu baladosa' anu saja' motomuhuk hi Ia na opateimo ahi'.
29Aha ma'ambangmo kalana lewa'mo nonsombah to ka-kau' ka' nontantukan ale' da baumo bagi nu to pilo-pilogot. 30Aha saidi' mae sumomo kau' anu daka' pada han nangkalualemo na honnyo, ka' sumomo ale' anu madi'mo opojalani uee. 31Susumo hat motoyo'mo ola kalana bohotika' nu apu, sumo aijo'mo na aha anu balakuasa saidi' mae posi palabuatanmo nu aha ma'i-ma'idek na monsilakai aha, ka' madi'mo o anu moko ala mompobelenti han anu hansunmo aijo'.
Currently Selected:
YESAYA 1: LAILOE
Highlight
Copy
Compare
Share
Want to have your highlights saved across all your devices? Sign up or sign in
