NYANYIAN ANU TALASANGGO 8
8
1O, de ugaat beleyum utus omput nu pusongku,
anu toho' nonsusu hi tinangku,
beleyum tantu ku ookimo de singkabot i jalan,
madi' ko anu mongalu aku.
2Beleyum ku boamo i laigan nu tinangku,
da beleyum mompogulu' mae aku,
Beleyum ku po inumimo anggur anu ma'ima' hondo,
tiba ueenyo nu bua' nu dalima.
3Lima kowi nu beleyum na monsakan mae aku,
lima kowi nu beleyum na montanggogoli mae aku.
4Balajanji'mo na belemiu to lalangkoyang nu Yerusalem,
saba' belemiu madi' monggoda sindua'anku,
sampe ia ma osamo.
Nyanyian anu ko anomnyo
To bou-boune
5Ihe na aijo' anu tinokamo lengkat mae i padang anu mateges,
natisehamo hi sindua'annyo?
Boune
Ku bulaakon na beleyum male-male' i patu nu kau' apel,
i tampat beleyum kinandung ka' pinohampe.
6Pojadi mae na aku anu saja' nu una' ikinyonyoa nu beleyum,
boli montanggogoli maumo pa' ihe, ola ahi' samata-mata aku;
saba' sindua'an aijo' kohosonnyo sumo kohosonnyo nu kapatean,
ka' napisu aijo' balakuasa susumo suele kapatean.
Moaknyo sumomo moak nu apu,
anu kinonyela-nyelakmo daka' hondo.
7Uee mau manjoo' madi' moko ala mompopoho' sintaku,
ka' mule' iaba' madi' moko ala monganjuhakon.
De daagi ko samian mombee' iwi-iwi' na halata'nyo,
da bau ponsulang sinta,
tantu ola ahi' ia mohumpak pompopo' ambang.
To utu-utus mo'ane ka' boune
8Kami daagi ko samian na boune utus ise',
anu daagi ise' na susunyo,
Apaa na anu obau mami hi ia,
de ko samian anu tokamo mae monduta ia?
9De bisuanyo ia sa'angu' na pagan mesen,
kami mompotinjomo menara salaka aita i buannyo.
De bisuanyo ia sa'angu' na sabatan daka'
kau'mo lontio' na bau ponsupati mami.
Boune
10Aku aiya sumomo sa'angu' na pagan mesen,
ka' susungku na baumo menaranyo,
Sindua'anku nonsumbu'mo saba' hi iamo na aku
mohumpak kabilahian.
Mo'ane
11I Salomo ko ale' nu anggur kiijo' i Baal-Homon;
ale aijo' binee'nyomo hi anu lewa' nonjagai.
Toto samian mombayan samadala na takeannyo nu doi salaka salaku bau hasinnyo,
12ka' mohumpak ua' atu bau tambo nu lawenyo.
Bakasmo na doi aijo' baumo bagi nu beleyum Salomo,
ka' mule baumo bagi nu anu lewa' monjagai ale' nu beleyum nabahagian sangga'at
Panyo ale' nu anggurku na aku ahi' na tumpunyo,
aiya i ahopku.
13O, anu jojoong i ale'
to sanga-sangalu kahanda'mo mohongo potatae nu beleyum,
pohongoakon mae na aijo' hi belengku!
Boune
14Sindua'anku tokamo mae susumo kijang,
Sumomo anak nu jonga i bungkutnyo nu Beter.
Currently Selected:
NYANYIAN ANU TALASANGGO 8: LAILOE
Highlight
Copy
Compare
Share
Want to have your highlights saved across all your devices? Sign up or sign in
