KAJADIAN 39
39
I Yusuf ka' bengkele' i Potifar
1I Yusuf binoamo namba i Mesir nu mian Ismael haha aijo', ka' pinobalukmo hi Potifar, samian na kapala nu suludadu nu tomundo anu montoongi pangkat kapala nu anu monjagai laigan nu tomundo. 2#Kis. 7:9 Tumpu nontulungimo i Yusuf sahingga saja' mingkaliangan na anu nu kalaja iwi-iwi'. Ia jinojoongmo i laigan nu tuannyo, mian nu Mesir aijo'. 3Tuannyo nontoa taalu' Tumpu montulungi i Yusuf, ka' kalana aijo' apaa na anu nu bau i Yusuf, iwi-iwi' saja' mingkaliangan ma'i-ma'ima'. 4I Potifar sanang hondo hi Yusuf, sahingga i hangkatnyomo na ia binau posi posaihonnyo, lantas binee'annyomo kalaja na i Yusuf mongulus ulusan nu laigan, ka' iwi-iwi' apaa na halata' nu aha. 5Mulai tempo'nyo aitu kalana i Yusuf, Tumpu nombalakatimo aha salaigan mian nu Mesir aijo' ka' iwi-iwi' apaa na halata' nu aha, mau anu i laigan ka' suele anu i ale'. 6Iwi-iwi' apaa na halata' i Potifar pinotoongnyomo hi Yusuf. Kalana aijo' i Potifar madi'mo daagi' hondo-hondo monsumbu ulusan nu aha salaigan, me samata-mata mongkaan.
I Yusuf olitau hondo ka' ma'ima' hondo na otoa. 7Madi' pinin na tempo'nyo, bengkele' i Potifar nongka'ima'imo moduhus tiba i Yusuf, lantas olitau aijo' sinale'annyomo male' hingga-hinggat. 8I Yusuf madi' mongka'oho' sahingga ia notataemo hi ia, “Momoita ampun, hi belento bengkele' nu tomundo, i tuan Potifar nompotoongmo iwi-iwi' na halata'nyo hi belengku. Ia madi' mo daagi' palalu mompotutugakon apa-apaa i laigan aiya. 9I aiya kuasangku pokakanamo tiba kodaka'nyo nu kuasanyo. Madi' ko sa'angu' pe'e na madi' pinotoongnyo hi belengku, panyo belento bengkele' nu tomundo na madi' ahi'. Te toho' mule' aku mombau palabuatan anu ma'idek aijo', ka' moko baladosa' hi Tumpu Allah?” 10Mau mule' bengkele' i Potifar sansina-sinaa na pagala mohase' i Yusuf, olitau aijo' sabole-boleh madi' mongka'oho' male' tiba ia.
11Daagi' kino sansinaan salatan i Yusuf ninsoopmo i uno nu laigan kahanda' mombau anu okalaja, madi' ko samian pe'e ikiijo'. 12Bengkele' i Potifar nohela'mo i Yusuf, i juba'nyo ka' notatae, “Imbo' da kita male'mo hingga-hinggat.” Kinakiotohakon i Yusuf sahingga tinalabakas, lantas nopadeka'mo namba i sambiha'nyo, panyo juba'nyo tinoonganmo nu boune aijo'. 13Salatan tinoa nu bengkele' i Potifar taalu' i Yusuf nopalai mo ka' juba'nyo tinoongannyomo, 14ia nolagamo to posa-posaihonnyo ka' notatae, “Soba toa! Mian nu Ibrani anu binoa mae nu langkai'ku i laigan aiya, nongambangimo kita. Ia ninsoopmo i uno nu salipi'ku ka' mongka'oho'mo mompakisa aku, panyo aku noloboo'mo hoso-hoson. 15Salatan nohongomo loboo'ku, ia nalaimo nosabat sahingga juba'nyo tinoongankumo.”
16Lantas bengkele' i Potifar nonguna'mo juba' aijo' sampe langkai'nyo ninsusule' mae. 17Salatan langkai'nyo tinokamo nalia-lia' na ia nonsisik hi ia, pinoto'inyo, “Mian nu Ibrani anu binoa mae nu belento aijo', ninsoopmo i uno nu salipi' kahanda'mo mongambangi aku. 18Panyo salatan aku noloboo'mo ia nopalaimo namba si sambiha'nyo ka' juba'nyo tinoongankumo.”
19I Potifar notambuha'mo hondo-hondo. 20Ka' pinalentahkonnyomo da i Yusuf sampamo o hakop ka' oposoop i uno nu talungku', tampat pontalungku'an to tomu-tomundo. 21#Kis. 7:9 Panyo Tumpu nontulungimo i Yusuf ka' saja' mongkalibosi ia, sahingga kapala nu talungku' nongkanonongimo ia. 22Ia nompalentah da otoakon na batu-batu anu tinalungku' sangga'at, hi Yusuf, ka' i Yusufmo na binee'an kalaja montoa iwi-iwi' apaa na anu obau i uno nu talungku' aijo'. 23Kapala nu talungku' aijo' madi'mo daagi' monjagai iwi-iwi' anu pinalentahkonnyomo hi Yusuf, kalana Tumpu nontulungimo ia, sahingga ningkalianganmo iwi-iwi' na anu binaunyo.
Currently Selected:
KAJADIAN 39: LAILOE
Highlight
Copy
Compare
Share
Want to have your highlights saved across all your devices? Sign up or sign in
